សុខភាព

កុំមើលរំលង ការរាករូសរ៉ាំរ៉ៃ វាអាចជាផលរំខានក្នុងជីវិតរស់នៅប្រចាំថ្ងៃ !

បានផុស

៦ years មុន

នៅ

ថ្ងៃអង្គារ ១ ធ្នូ ២០២០

ដោយ

ការរាគរ៉ាំរ៉ៃ ជាបញ្ហាមួយ ដែលក្រុមវេជ្ជបណ្ឌិតយើងតែងតែបានជួបប្រទះជាញឹកញាប់។ និយមន័យពិតប្រាកដនៃការរាគរ៉ាំរ៉ៃនេះ គឺជាការរាគដោយលាមកមានសភាពជ្រាយ (Semi liquide) ឬក៏ទឹកសុទ្ធ (liquide) ដែលមានរយៈពេលលើសពី២១ថ្ងៃឡើងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក) មូលហេតុ

កត្តាបង្កឲ្យមានការរាគរ៉ាំរ៉ៃ គឺមានច្រើនហើយពេលខ្លះ គឺតម្រូវឲ្យមានការពិនិត្យ និងតាមដានដោយយកចិត្តទុកដាក់ ក៏ដូចជាបច្ចេកទេសវេជ្ជសាស្ត្រលក្ខណៈឯកទេសផងដែរដូចជាៈ

– ជំងឺរលាកពោះវៀនធំដោយមេរោគឆ្លង (colite infectieuse) ក្នុងនោះក៏មានជំងឺរបេងពោះវៀនធំផងដែរ។

– ជំងឺរលាកពោះវៀនធំ ដោយគ្មានមេរោគឆ្លង (colite inflamatoire ou MICI)។

– ជំងឺខ្សោយពោះវៀន ឬពោះវៀនដើរខុសធម្មតា (troubles fonctionnels intestinaux form diarrhée) ។

– មានដុំសាច់ដុះ នៅក្នុងពោះវៀនធំ (មហារីកពោះវៀនធំ)។

– ជំងឺឡើងជាតិពុលនៃក្រពេញបំពង់ក (hyperthyroidie) ។

– ជំងឺរាគនៅលើអ្នកជំងឺអេដស៍ ដែលភាគច្រើនជាងគេនោះ គឺបង្កឡើងដោយពពួកផ្សិតនៅពោះវៀនធំ។

– ពពួកប៉ារ៉ាស៊ីត (ព្រូន តេនញ៉ា អាមីប ជាដើម។ល។) ។

– វាក៏អាចបណ្តាលមកពីការពិសាឱសថមួយចំនួនផងដែរ (ជាពិសេសប្រភេទថ្នាំព្យាបាលជំងឺទឹកនោមផ្អែម។ល។) ។

ខ) រោគសញ្ញា

រោគសញ្ញា ដែលអាចមានអមមកជាមួយការរាករូសរ៉ាំរ៉ៃមាន

– ក្តៅខ្លួន រងាញាក់

– ឈឺចុកចាប់ក្នុងពោះ

– លាមកមានលាយឈាម សំបោរ ឬខ្ទុះ

– ស្រកទម្ងន់លឿន និងខុសពីធម្មតា

– អស់កម្លាំង ល្ហិតល្ហៃ

– ស្លេកស្លាំង ចុះឬបាត់គ្រាប់ឈាមក្រហម

– មានដុំពោះ ដែលយើងអាចស្ទាបទៅប៉ះ

– ការខ្វះ ឬខ្សោះជាតិទឹក គឺយើងកម្រនឹងកើតមានណាស់ចំពោះការរាករូសរ៉ាំរ៉ៃនេះ។ល។

គ) ការធ្វើរោគវិនិច្ឆ័យ

ការរាគរ៉ាំរ៉ៃ យើងអាចធ្វើរោគវិនិច្ឆ័យតាមរយៈ៖

– ការសាកសួរដោយលំអិតអំពីប្រវត្តិជំងឺ និងរោគសញ្ញាផ្សេងៗដែលអមជាមួយជំងឺ

– ការពិនិត្យឈាម និងលាមក

– ការពិនិត្យអេកូពោះ ឬក៏ការថតស្គេនពោះ (CT-Scan)

– ការបណ្ដុះមេរោគក្នុងលាមក (coproculture)

– ការឆ្លុះសុងមើលពោះវៀនធំ និងការវិភាគកោសិការបស់ពោះវៀនធំ (Coloscopie totale avec biopsie et anapath) គឺជាវិធីតែមួយគាត់សម្រាប់ធ្វើរោគវិនិឆ្ឆ័យបានយ៉ាងល្អប្រសើរ ចំពោះករណីរាគរ៉ាំរ៉ៃនេះ។

ឃ) ការព្យាបាល

ចូលចងចាំដែរថា ការរាករូសរ៉ាំរ៉ៃនេះវាមិនមែនជាជំងឺនោះទេ វាគឺជារោគសញ្ញាដែលបង្កឡើងដោយជំងឺ និងមូលហេតុដូចដែលបានជម្រាបជូនពីខាងលើ។ ដូច្នេះហើយចំពោះការព្យាបាល គឺតម្រូវឲ្យយើងដឹងមូលហេតុពិតប្រាកដថាមកពីអ្វី ហើយការព្យាបាលឲ្យចំមូលហេតុទាំងនោះហើយ ទើបជាការព្យាបាលត្រឹមត្រូវតាមបច្ចេកទេស និងមានប្រសិទ្ធភាពខ្ពស់បំផុត។

“អ្នកជំងឺដែលមានរោគសញ្ញាដូចការរៀបរាប់ខាងលើ គួរគប្បីជួបពិគ្រោះជាមួយក្រុមវេជ្ជបណ្ឌិតឯកទេស និងជំនាញផ្នែក ថ្លើម-ក្រពះ-ពោះវៀន នៅមន្ទីរពេទ្យកាល់ម៉ែត ដើម្បីទទួលបានរោគវិនិច្ឆ័យច្បាស់លាស់ និងទទួលនូវសេវាព្យាបាលឲ្យបានត្រឹមត្រូវ ប្រកបដោយប្រសិទ្ធិភាពខ្ពស់”៕

អត្ថបទ៖ រស្មី

សូមចុចអាន៖ សូមស្វែងយល់ពីគ្រោះថ្នាក់ប៉ះទង្គិចក្បាល!

Related Topics:សុខភាព

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា