បាក់តេរី សាហាវ ត្រូវបានរកឃើញលើទឹកដី សហរដ្ឋអាមេរិក ជាលើកដំបូង

មជ្ឈមណ្ឌលគ្រប់គ្រង និងបង្ការជំងឺអាមេរិក (CDC) បានបង្ហាញកាលពីថ្ងៃព្រហស្បតិ៍ទី២៨ខែកក្កដាថា បាក់តេរីដែលទទួលខុសត្រូវចំពោះជំងឺ ដែលសម្លាប់មនុស្សរហូតដល់ទៅ ៥០ភាគរយនៃអ្នកឆ្លងវា ត្រូវបានរកឃើញនៅលើទឹកដីសហរដ្ឋអាមេរិក ជាលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាក់តេរី Burkholderia pseudomallei ដែលជាមូលហេតុនៃជំងឺ មេឡូអ៊ីដ (Meliodosis) ត្រូវបានគេរកឃើញក្នុងសំណាកដី និងទឹក នៅឈូងសមុទ្រ Mississippi។

បាក់តេរីនេះ ត្រូវបានរកឃើញ ជាផ្នែកមួយនៃការស៊ើបអង្កេតលើករណីចំនួនពីរ នៅក្នុងតំបន់នារយៈពេលប៉ុន្មានឆ្នាំថ្មីៗនេះ។ ជនជាតិអាមេរិករាប់សិបនាក់ បានឆ្លងជំងឺដ៏កាចសាហាវនេះជារៀងរាល់ឆ្នាំ ប៉ុន្តែករណីភាគច្រើនគឺជាប់ទាក់ទងនឹងការធ្វើដំណើរទៅបរទេស។

ពីមុន គេដែលមិនគិតថា បាក់តេរីនេះ ត្រូវបានរកឃើញនៅសហរដ្ឋអាមេរិកនោះទេ ប៉ុន្តែការរកឃើញនេះមានន័យថា ជនជាតិអាមេរិក ឥឡូវអាចឆ្លងជំងឺនៅក្នុងប្រទេស។ យ៉ាងណាក្តី ក្រុមមន្ត្រីបាននិយាយភ្លាមៗថា ហានិភ័យចំពោះសាធារណជន នៅតែមានកម្រិតទាប។

នៅទូទាំងពិភពលោក ពាក់កណ្តាលនៃអ្នកជំងឺនេះ បានទទួលមរណភាព។ អ្នកជំនាញបានព្រមានថា ការរកឃើញនេះគឺជារឿងមិនធម្មតាឡើយ ហើយបានព្រមានអ្នកស្រុកឲ្យមានការប្រុងប្រយ័ត្នខ្ពស់។

CDC បាននិយាយនៅក្នុងសេចក្តីជូនដំណឹងរបស់ខ្លួនថា វាមិនច្បាស់ទេថា តើបាក់តេរីនេះមាននៅក្នុងសហរដ្ឋអាមេរិករយៈពេលប៉ុន្មានហើយ ឬថាតើវាស្ថិតនៅក្នុងរដ្ឋផ្សេងទៀតដែរឬទេ។ ប៉ុន្តែ​ពួកគេ​បាន​សង្កត់​ធ្ងន់​ថា លក្ខខណ្ឌ​បរិស្ថាន​នៅ​តាម​បណ្តោយ​ឆ្នេរ​​សមុទ្រ គឺ​អំណោយ​ផល​ដល់​បាក់តេរី ​អាច​រស់នៅ​បាន។

ដូចការឆ្លងបាក់តេរីដទៃទៀតដែរ, ជំងឺ មេឡូអ៊ីដ ត្រូវបានបង្កឡើងនៅពេលដែលមនុស្សម្នាក់ប៉ះពាល់នឹងបាក់តេរី Burkholderia pseudomallei តាមរយៈដី ឬទឹក។ ការឆ្លងជំងឺនេះពីមនុស្សម្នាក់ទៅមនុស្សម្នាក់ គឺអាចកើតឡើង ប៉ុន្តែកម្រណាស់។

ក្រោយប៉ះពាល់ជាមួយបាក់តេរី អ្នកខ្លះអាចចេញរោគសញ្ញាក្នុងរយៈពេល២៤ម៉ោង ខណៈអ្នកខ្លះមិនមានអាការអ្វីសោះ រហូតដល់ពេល២ ទៅ៤ សប្តាហ៍។

ជាញឹកញយ ជំងឺនេះត្រូវបានអ្នកជំនាញសុខភាព ច្រឡំថាជារោគរបេង រលាកសួត ឬបញ្ហាសួតផ្សេងទៀត ព្រោះវាមានរោគសញ្ញាស្រដៀងគ្នា៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ សហរដ្ឋអាមេរិក ក្លាយជាប្រទេសមានករណីឆ្លងជំងឺអុតស្វា ច្រើនជាងគេបំផុត លើពិភពលោក