KPT+

ក្បួន ៣ យ៉ាងរបស់ ជប៉ុន ជួយគ្រប់គ្រងកំហឹង និងអារម្មណ៍អវិជ្ជមាន

បានផុស

៤ years មុន

នៅ

ថ្ងៃព្រហស្បតិ៍ ១ កញ្ញា ២០២២

ដោយ

យើងមានទាំងអារម្មណ៍វិជ្ជមាន ដូចជាភាពរីករាយ រំភើប និងសុភមង្គល និងអារម្មណ៍អវិជ្ជមានដូចជាឆាប់ខឹង ឆេវឆាវខុសទំនង។ បញ្ហាទាំងនោះ ពេលខ្លះវាពិបាកក្នុងការគ្រប់គ្រង។ ជាពិសេស អារម្មណ៍អវិជ្ជមាននេះតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញប្រជាជនជប៉ុនមានសិល្បៈក្នុងការគ្រប់គ្រងកំហឹងដោយណែនាំថា ប្រសិនបើធ្វើវាជាប្រចាំ នឹងជួយអ្នកគ្រប់គ្រងអារម្មណ៍ពីការខកចិត្ត និងកំហឹងនានា។ ការគ្រប់គ្រងអារម្មណ៍ល្អ គឺការទទួលយកគំនិតរបស់អ្នកដោយមនសិការលើអ្វីដែលធ្វើឲ្យអ្នកមានអារម្មណ៍ស្រួល ដូចជាការដឹងគុណចំពោះរឿងតូចតាច សេចក្តីសប្បុរស និងសុភមង្គលកើតឡើង។ ខាងក្រោមនេះ ជាវិធីមួយចំនួនដើម្បីការពារខ្លួនអ្នក ពីការញាប់ញ័រ និងកំហឹងផ្សេងៗ៖

១ ស្វែងយល់ពីបុគ្គលិកលក្ខណៈរបស់អ្នក

ពេលខ្លះនៅពេលមានអ្វីដែលមិននឹកស្មានដល់ និងអវិជ្ជមានកើតឡើង វាធ្វើឲ្យមនុស្សងាយស្រួលក្នុងការបញ្ចេញអារម្មណ៍ខឹង អន់ចិត្ត និងអារម្មណ៍មិនល្អជាដើម។ ដូច្នេះយើងខ្ញុំសូមឲ្យអ្នកកំណត់អំពីមូលហេតុដែលអ្នកមានអារម្មណ៍មិនសប្បាយចិត្ត ដូចជាពេលត្រូវបានគេប្រព្រឹត្តដោយអាកប្បកិរិយាឈ្លើយ មានគេនិយាយស្ដីមិនល្អ ឬពេលគេងមិនលក់ច្រើនថ្ងៃជាប់ៗគ្នា។ វានឹងធ្វើឲ្យអ្នកយល់ និងស្វែងយល់ពីខ្លួនឯងបានយ៉ាងល្អ។ នៅពេលដែលយើងបានដឹងពីចរិតលក្ខណៈផ្ទាល់ខ្លួន និងមូលហេតុដែលខឹង នេះនឹងអនុញ្ញាតឲ្យយើងរៀនគ្រប់គ្រងអារម្មណ៍របស់យើងបានប្រសើរជាងមុន ហើយចៀសវាងការខកចិត្ត និងកំហឹងនានា។

២ ទទួលយកអារម្មណ៍របស់អ្នក

អារម្មណ៍ខកចិត្ត សោកសៅ និងការអន់ចិត្ត គឺជាអារម្មណ៍ដែលមនុស្សភាគច្រើនមិនចង់ទទួលយក ប៉ុន្តែតាមពិតវាមិនមែនជារឿងអាក្រក់នោះទេ។ ទទួលស្គាល់ថាអ្នកមានអារម្មណ៍ខកចិត្ត ខឹងនិងឆេវឆាវ វាជារឿងសំខាន់ដែលយើងត្រូវគ្រប់គ្រងអារម្មណ៍ ហើយសូមអនុញ្ញាតឲ្យរឿងអាក្រក់ទាំងនោះទៅចុះ។ ផ្ទុយទៅវិញ បើអ្នកនៅតែលាក់បាំងខ្លួនឯងមិនឲ្យខឹង ឬអន់ចិត្ត។ នៅពេលដែលបញ្ហានេះ មកជំរុញម្តងហើយម្តងទៀត វាអាចធ្វើឲ្យយើងមានអារម្មណ៍ខឹង និងអន់ចិត្តដដែលៗឡើងមក។ ដូច្នេះ ជាការសំខាន់ណាស់ ដែលមិនត្រូវមានអារម្មណ៍អាក្រក់ចំពោះអារម្មណ៍អវិជ្ជមានទាំងនេះ។ ទទួលយកវា ហើយរកវិធីដោះស្រាយឲ្យបានលឿន ជាជាងទុកចោលមិនអើពើ។

៣ ផ្ដោតលើការដោះស្រាយបញ្ហា

បន្ទាប់ពីរៀនទទួលយកអារម្មណ៍អវិជ្ជមាន ព្យាយាមតាំងចិត្តដោះស្រាយបញ្ហា។ អ្វីដែលត្រូវធ្វើគឺគិតដោយស្ងប់ស្ងាត់ដើម្បីវិភាគអារម្មណ៍។ សួរខ្លួនឯងនូវសំណួរដូចជា ហេតុអ្វីបានជាខ្ញុំមានអារម្មណ៍បែបនេះ? តើខ្ញុំអាចឆ្ពោះទៅមុខដោយរបៀបណា? តើខ្ញុំគួរមានគំនិតបែបណា ដើម្បីកុំឲ្យមានការរំខានដោយរឿងដដែលៗ ដែលអាចនឹងកើតឡើងនាពេលអនាគត? ដោយអនុវត្តការសួរសំណួរ និងស្វែងរកចម្លើយម្តងហើយម្តងទៀត។ វានឹងអនុញ្ញាតឲ្យយើងយល់ពីខ្លួនយើងកាន់តែប្រសើរ។ ធ្វើបែបនេះវាក៏ជួយឲ្យមានការសន្ទនាកាន់តែប្រសើរឡើង រវាងគំនិត និងអារម្មណ៍ផ្ទាល់ខ្លួនដូចគ្នា។

ការអនុវត្តបែបនេះ អាចថាពិបាក ហើយក៏មិនងាយដូចការរៀបរាប់នោះទេ។ ប៉ុន្តែពេលអនុវត្តទម្លាប់ទាំង៣នេះឲ្យបានញឹកញាប់ អ្នកនឹងរស់នៅឲ្យបានស្រួល មិនឆាប់រំជួលចិត្តដូចមុនទៀត ហើយបើចិត្តរបស់យើងបានសុខសាន្ត នោះស្នាមញញឹមនឹងកើតឡើងនៅគ្រប់ស្ថានភាពផងដែរ៕

អត្ថបទ៖ សាង ស្រីល័ក្ខ

ចុចអាន៖ហេតុផល ៥ យ៉ាង កុំគិតច្រើនក្នុងពេលតែមួយ

ចុចអាន៖ចង់សម្រេចគោលដៅធំៗ ចៀសរឿងទាំង ៥ នេះសិន

Related Topics:សិល្បៈគ្រប់គ្រងកំហឹង ការលើកទឹកចិត្ត