KPT+

៥ កន្លែងលើយន្តហោះ ផ្ទុកដោយមេរោគភាគច្រើនសឹងមើលមិនដឹង

បានផុស

៣ years មុន

នៅ

ថ្ងៃពុធ ២៩ មីនា ២០២៣

ដោយ

បន្ថែមពីលើបង្គន់ ឡានក្រុង រថភ្លើង យន្តហោះជាកន្លែងមួយទៀតដែលប្រមូលមនុស្សរាប់សែននាក់មកពីជុំវិញពិភពលោកផងដែរ។ នោះមានន័យថា ជារៀងរាល់ចំណុចរបស់យន្តហោះត្រូវបានប្រើប្រាស់ទាំងអស់ ទាំងការប៉ះរាប់មិនអស់ពីអ្នកដំណើរ ដូច្នេះហើយ អនាម័យ គឺជាអ្វីដែលយើងគួរតែប្រុងប្រយ័ត្នតាមដែលអាចធ្វើទៅបាន។

ទោះបីជាក្រុមហ៊ុនអាកាសចរណ៍បានសម្អាតនិងធានាថាគ្មានមេរោគក៏ដោយ ប៉ុន្តែប្រសិនបើយើងចៀសវាងហានិភ័យនៃការកខ្វក់ ឬជាប្រភពនៃមេរោគច្រើនជាងគេ នោះយើងនឹងមានសុវត្ថិភាពសម្រាប់សុខភាពយើងផងដែរ។

១ ថាសអាហារបត់នៅខាងក្រោយកៅអីអ្នកដំណើរ

ការសិក្សាឆ្នាំ ២០១៥ ពី TravelMath បានរកឃើញថាបាក់តេរី ៨ដងត្រូវបានគេរកឃើញលើលើថាសអាហារក្នុងយន្តហោះរួមមាន ផ្ដាសាយ មេរោគ norovirus ដែលបណ្ដាលឲ្យរាគ និងក្អួត ឬបង្កឲ្យមានការឆ្លងមេរោគលើស្បែក។មូលហេតុដែលបាក់តេរីជាច្រើនត្រូវបានរកឃើញនៅលើថាសអាហារ វាអាចដោយសារកាលវិភាគជើងហោះហើរណែនតាន់តាប់។ រហូតដល់បុគ្គលិកមិនមានពេលគ្រប់គ្រាន់ក្នុងការសម្អាតថាសអាហារឲ្យបានល្អគ្រប់គ្រាន់ ហើយមិនអាចប្រើផលិតផលសម្អាតដែលអាចសម្លាប់មេរោគបានល្អ។

២ សំណាញ់ខ្យល់ និងខ្សែក្រវ៉ាត់សុវត្ថិភាព

បាក់តេរី ២៨៥ CFU ក្នុងមួយអ៊ីញការ៉េត្រូវបានគេរកឃើញនៅលើសំណាញ់ខ្យល់នៅលើក្បាល ដែលវានៅតែមានច្រើនជាងមេរោគនៅលើបង្គន់។ គន្លឹះសុវត្ថិភាពរបស់ខ្សែក្រវ៉ាត់ក៏ត្រូវគេរកឃើញមេរោគរហូតដល់ ២៣០ CFU ក្នុងមួយអ៊ីញការ៉េ ព្រោះវាជាផ្នែកដែលអ្នកដំណើរតែងតែប៉ះយ៉ាងហោចណាស់២ដង ឬច្រើនជាងនេះ។ ដំណោះស្រាយសាមញ្ញគឺត្រូវយកទឹកលាងដៃមួយដបតូចឡើងយន្តហោះនៅពេលរធ្វើដំណើរ។

៣ បន្ទប់ទឹក

ទោះបីជាក្រុមហ៊ុនអាកាសចរណ៍ល្បីៗលើពិភពលោកជាច្រើនទទូចឲ្យបុគ្គលិករបស់ពួកគេសម្អាតបង្គន់ និងសម្លាប់មេរោគក៏ដោយ ប៉ុន្តែនៅតែរកឃើញមេរោគច្រើន។ ជាពិសេសសារធាតុ E choline ដែលទុំជាប់នៅលើកន្លែងលាងដៃ ធុងទឹកបង្គន់ និងកៅអីបង្គន់ TravelMath បានរកឃើញ 265 CFU ក្នុងមួយអ៊ីញការ៉េនៅលើធុងទឹកបង្គន់។ ការណែនាំដ៏សាមញ្ញមួយគឺត្រូវបាញអាលកុរនៃចំណុចទាញទ្វារ ឬប្រើក្រដាសបង្គន់ដើម្បីកាន់ទ្វារពេលបើកចេញចូល ជំនួសឲ្យការកាន់វាដោយដៃទទេរបស់អ្នក នេះនឹងជួយកាត់បន្ថយការឆ្លងមេរោគបាក់តេរីនៅលើដៃពីបង្គន់តាមយន្តហោះ។

៤ កន្លែងផ្ទុកនៅខាងក្រោយកៅអីអ្នកដំណើរ

អ្នកដែលធ្លាប់ឡើងយន្តហោះនឹងដាក់កែវទឹក ដបទឹកឬរបស់មួយចំនួនដាក់ក្នុងបន្ទប់នេះ (ខណៈពេលកំពុងរង់ចាំបុគ្គលិកប្រមូល) ទោះបីជាបុគ្គលិកអាចប្រមូលសំរាមបន្ទាប់ពីអ្នកដំណើរបានចុះពីលើយន្តហោះក៏ដោយ។ ប៉ុន្តែមានឱកាសដែលមេរោគនឹងជាប់គាំងនៅខាងក្រោយកៅអី ប្រសិនបើវាមិនត្រូវបានគេសម្អាតជាមួយនឹងថ្នាំសំលាប់មេរោគនោះទេ។

៥ កៅអីច្រកផ្លូវ

អ្នកខ្លះជ្រើសរើសអង្គុយនៅតាមច្រកផ្លូវ ព្រោះវាស្រួលអង្គុយ។ ប៉ុន្តែវាក៏ជាភាពងាយស្រួលដល់ហានិភ័យសុខភាពដ៏គ្រោះថ្នាក់ផងដែរ។ ដោយសារតែបង្កាន់ដៃនៅតាមច្រកផ្លូវនឹងត្រូវប៉ះដោយដៃអ្នកដទៃ ដែលទើបតែដើរចេញពីបន្ទប់ទឹកជាច្រើន។ ជាពិសេសនៅតាមបណ្តោយកៅអី។ ដូច្នេះ បើអង្គុយនៅតាមច្រកផ្លូវពេលងងុយគេង យកល្អកុំឱនក្បាលទៅទិសនោះហើយប្រសិនបើវាជាពេលវេលាធ្វើដំណើរខ្លី ការជ្រើសរើសកៅអីបង្អួចនឹងមានសុវត្ថិភាពជាងពីមេរោគផ្សេងៗ៕

ប្រែសម្រួល៖ សាង ស្រីល័ក្ខ

ចុចអាន៖កំពូលអាហារទាំង ៥ ល្អបំផុតចំពោះស្បែក សក់ និងក្រចក

ចុចអាន៖៥ កំហុសអ្នកជំនាញសរសៃសក់មិនធ្វើដាក់សក់ខ្លួនឯងដាច់ខាត