ព័ត៌មានអន្ដរជាតិ

យន្តហោះដឹកអ្នកដំណើររបស់អាមេរិកឆេះទៀតហើយ នៅរដ្ឋ Colorado

បានផុស

៣ ខែ មុន

នៅ

ថ្ងៃសុក្រ ១៤ មីនា ២០២៥

ដោយ

យន្តហោះរបស់ក្រុមហ៊ុន American Airlines ដែលមានផ្ទុកអ្នកដំណើរ១៧២នាក់ ព្រមទាំងបុគ្គលិកអាកាសចរណ៍រួមទាំងអាកាសយានិក៦នាក់ បានឆាបឆេះ ក្រោយមានបញ្ហាគ្រឿងម៉ាស៊ីនពេលហោះឡើង និងបង្វែរទិសដៅសម្រាប់ការចុះចតយ៉ាងប្រញាប់។

តាមសេចក្តីជូនដំណឹងរបស់អាជ្ញាធរអាកាសចរណ៍(FAA) ដែលត្រូវបានបណ្តាញសារព័ត៌មានអន្តរជាតិរាយការណ៍នៅមុននេះ យន្តហោះនោះបានហោះចេញពីរដ្ឋ Colorado Springs ហើយត្រូវបានធ្វើដំណើរទៅកាន់អាកាសយានដ្ឋាន DFW នៅពេលដែលវាត្រូវបង្វែរទៅទីក្រុង Denver ។

តាមសេចក្តីរាយការណ៍នោះ FAA បានអះអាងថា នាវិកបានរាយការណ៍ពីការរំញ័រម៉ាស៊ីន។ ក្រុមហ៊ុនអាកាសចរណ៍បាននិយាយថា បន្ទាប់ពីយន្តហោះបានចុះចតដោយសុវត្ថិភាពនៅទីក្រុង Denver យន្តហោះបានជួបប្រទះ «បញ្ហាទាក់ទងនឹងម៉ាស៊ីន»។

ក្នុងឧបទ្ទវហេតុនេះ ក្រុមហ៊ុនអាកាសចរណ៍ បាននិយាយថា អ្នកដំណើរចំនួន៦នាក់ត្រូវបាន «បញ្ជូនទៅកាន់មន្ទីរពេទ្យដើម្បីធ្វើការវាយតម្លៃបន្ថែម» ប៉ុន្តែមិនបានបញ្ជាក់លម្អិតអំពីរបួសដែលអាចកើតមាននោះទេ។ ប៉ុន្តែមានសេចក្តីរាយការណ៍ដែលដកស្រង់ពីអាកាសយានដ្ឋាន បានអះអាងថា មនុស្ស១២នាក់ត្រូវបានបញ្ជូនទៅមន្ទីរពេទ្យ ដោយសាររបួសស្រាល។

វីដេអូដែលបានចែករំលែកនៅលើប្រព័ន្ធផ្សព្វផ្សាយសង្គមបង្ហាញពីអ្នកដំណើរជាច្រើននាក់បានចេញពីស្លាបយន្តហោះ ខណៈដែលមានផ្សែងហុយចេញពីយន្តហោះ។

រហូតដល់ពេលនេះ មានមិនសេចក្តីរាយការណ៍ពីគ្រោះថ្នាក់និងការខូចខាតកម្រិតណានេះទេ ដោយ FAA និយាយថា ខ្លួនកំពុងស៊ើបអង្កេតឧប្បត្តិហេតុ និងមូលហេតុនៃអគ្គីភ័យ៕

ដោយ រ៉ាន់ រើយ