រដ្ឋមន្ត្រី នេត្រ ភក្ត្រា ថា ថៃបានប្រើយុទ្ធសាស្ត្របង្កើតព័ត៌មានបំភ្លៃការពិត ជាលេសដើម្បីឈ្លានពានកម្ពុជា

«ព័ត៌មានក្លែងក្លាយ»បានក្លាយជាយុទ្ធសាស្ត្ររបស់ថៃក្នុងការប្រើប្រាស់ជាលេសដើម្បីចូលឈ្លានពានលើដែនអធិបតេយ្យ និងបូរណភាពទឹកដីកម្ពុជា។នេះជាការលើកឡើងរបស់រដ្ឋមន្ត្រីក្រសួងព័ត៌មានកម្ពុជា ដោយលោកបានអះអាងថា នៅក្នុងសង្គ្រាមឈ្លានពានរបស់ថៃលើទឹកដីប្រទេសកម្ពុជា គឺថៃបានប្រើយុទ្ធសាស្ត្របង្កើតព័ត៌មានបំភ្លៃ បំផ្លើសការពិត ក្រោមរូបភាពចោទប្រកាន់លាបពណ៌កម្ពុជា ហើយបង្កើតជាជម្លោះប្រដាប់អាវុធនៅតាមព្រំដែន។

«ឱ្យតែគេចង់វ៉ៃកម្ពុជា ចង់ឈ្លានពានកម្ពុជា គឺគេបង្កើតលេសដើរជាន់មីន ឬក៏បង្កើតបញ្ហាផ្សេងៗទៀត ប៉ុន្តែពេលប្រយុទ្ធគ្នា អត់ដើរជាន់មីនមួយគ្រាប់ តែពេលឈប់ជាន់មីន»។ លោករដ្ឋមន្ត្រី នេត្រ ភក្ត្រា និយាយដូច្នេះកាលពីរសៀលថ្ងៃទី១២ ខែមីនា ឆ្នាំ២០២៦ ក្នុងកម្មវិធីបើកសម្ពោធគម្រោងកិច្ចសហប្រតិបត្តិការមេគង្គ-ឡានឆាង ដោយផ្ដោតលើយុទ្ធនាការលុបបំបាត់ព័ត៌មានក្លែងក្លាយ ដំណាក់កាលទី២ នៅស្ដីទីការក្រសួងព័ត៌មាន។

រដ្ឋមន្ត្រី នេត្រ ភក្ត្រា បានលាតត្រដាងអំពីឧបាយកលរបស់ថៃ ដែលតែងតែព្យាយាមបង្កើតសមរភូមិព័ត៌មាន មុនឈានទៅបង្កើតសមរភូមិប្រដាប់អាវុធនៅតាមព្រំដែនជាមួយកម្ពុជា ដោយលោកពណ៌នាថា ព័ត៌មានទាំងអស់ដែលភាគច្រើនចេញពីកងទ័ពថៃ គឺមានលក្ខណៈជានិទានកថា ក្នុងចេតនាលាបពណ៌ និយាយបង្ខូច និងចោទប្រកាន់ដោយគ្មានមូលដ្ឋានមកលើកម្ពុជា។

ខណៈរយៈពេលចុងក្រោយ ថៃ ក៏បានភ្ជាប់កម្ពុជាទៅនឹង Scams នៅតាមព្រំដែន ដើម្បីជាលេសប្រើប្រាស់កម្លាំងទ័ពធ្វើសកម្មភាពវាយប្រហារមកលើកម្ពុជា តាមរយៈការប្រើយន្តហោះចម្បាំងទម្លាក់គ្រាប់បែកលើសំណង់អគារឯកជនក្នុងទឹកដីកម្ពុជា ដែលថៃចោទថា ជា​ Scams Online។

ប៉ុន្តែលោករដ្ឋមន្ត្រី ថា នេះជាលេសដែលគ្រាន់បិទបាំងទង្វើឈ្លានពានរបស់ពួកគេតែប៉ុណ្ណោះ ហើយយុទ្ធសាស្ត្ររបស់ថៃក្នុងការបង្កើតឡើងព័ត៌មានក្លែងក្លាយបែបនេះត្រូវបានរដ្ឋមន្ត្រីព័ត៌មានកម្ពុជា សង្កត់ធ្ងន់ថា ធ្វើឡើងក្នុងចេតនានយោបាយសុទ្ធសាធ។ ត្រង់ចំណុចនេះ លោក បានរំលឹកឡើងវិញពីការណែនាំរបស់ក្រសួងព័ត៌មាន ដែលបានអំពាវនាវឱ្យអ្នកសារព័ត៌មានក្នុងស្រុកមានការប្រុងប្រយ័ត្ន ក្នុងការយកប្រភពព័ត៌មានពីថៃមកផ្សព្វផ្សាយបន្ត ជុំវិញបញ្ហាជម្លោះព្រំដែនកម្ពុជា និងថៃ៕

ដោយ៖ ធឿន វ៉ាន់សុង