បង្ហោះ Tik Tok ថាជនជាតិចិនរត់គេចពីការធ្វើចត្តាឡីស័ក ចូលសារភាពកំហុស សមត្ថកិច្ចអប់រំហើយដោះលែងវិញ

បុរស​ម្នាក់​ដែល​បាន​បង្ហោះ​ព័ត៌មាន​មិនពិត​ ថា​មាន​ជន​ជាតិចិន​មួយក្រុម​រត់​ចេញ​ពីកន្លែងធ្វើ​ចត្តា​ឡីស័ក​ ត្រូវបា​នសមត្ថកិច្ចធ្វើការកោះហៅឱ្យចូលខ្លួនមកបំភ្លឺ​ និង​បាន​សារភាពទទួល​កំហុស​ដែល​បានផុសព័ត៌មានមិនពិត។

កម្លាំងជំនាញនៃអធិការដ្ឋាននគរបាលខណ្ឌដូនពេញ នៅរសៀលថ្ងៃទី១១​ ខែមិថុនា​ ឆ្នាំ២០២១​ បាន​ធ្វើការកោះហៅ​បុរសម្នាក់ឈ្មោះ អ៊ួង សារឿន ដែលជាម្ចាស់គណនី Tik Tok ដែលបានផុសវីដេអូ​ ដែល​ជា​ព័ត៌មាន​មិន​ពិត​ថា​មាន​ជនជាតិមួយក្រុមមានគ្នា ០៥នាក់​បានរត់ចេញ​ពីកន្លែង​ធ្វើ​ចត្តាឡីស័ក​។

ស្នងការនគរបាលរាជធានីភ្នំពេញ បញ្ជាក់ថា បុរសម្ចាស់គណនី​ Tik Tok នេះបានចូល​ខ្លួនមកបំភ្លឺ​ចំពោះ​សមត្ថកិច្ចថាជាព័ត៌មានមិនពិត​ មិនមានជនជាតិជនណា​ម្នាក់រត់ចេញ​ពីកន្លែង​ធ្វើចត្តាឡីស័ក​នោះទេ​ ក្រុមជនជាតិចិននោះគ្រាន់តែជិះរថយន្តមក​ទីនោះហើយ​ឈប់រកកន្លែងនោមតែប៉ុណ្ណោះ​ ហើយបានសារភាពទទួលកំហុស​ និងបានធ្វើ​ការសុំទោសជាសាធារណ:ដែល​ខ្លួនបានផុសព័ត៌​មាន​មិនពិតនេះដែលធ្វើឱ្យប្រជាពលរដ្ឋ​ និងមជ្ឈដ្ឋានទូទៅមានការយល់ច្រឡំ​។

ក្រោយពី​ធ្វើការសុំទោស​រួចរាល់​ ហើយសមត្ថកិច្ច​បា​នអប់រំណែនាំបុរសរូបនេះ ហើយអនុញ្ញាត​ឱ្យ​សាមីខ្លួន ត្រឡប់ទៅផ្ទះវិញ៕