អ្នកជំនាញព័ត៌មាន៖ សារព័ត៌មានថៃមើលបាន តែយកជាការមិនបាន កុំជឿតាមឱ្យសោះ

ស្របពេលដែលកម្ពុជាកំពុងមានជម្លោះព្រំដែនជាមួយថៃ សារព័ត៌មានថៃមួយចំនួនបានផ្សព្វផ្សាយបំភ្លើស និងបំភ្លៃការពិត ដើម្បីឱ្យសាធារណៈមតិ មានការភាន់ច្រឡំ ជាពិសេសរឿងវិវាទព្រំដែនកម្ពុជា-ថៃ។ ការចុះផ្សាយរបស់សារព័ត៌មានថៃនៅពេលនេះ មានទាំងពិត និងប្រឌិត បង្កឱ្យមានការយល់ច្រឡំពីសាធារណៈជន។

ពាក់ព័ន្ធទៅនឹងការចុះផ្សាយរបស់សារព័ត៌មានថៃ ក្នុងពេលដែលមានជម្លោះព្រំដែនជាមួយកម្ពុជានេះ​ លោក ហ៊ុយ វណ្ណៈ ប្រធាន​សហភាព​សហព័ន្ធ​សារព័ត៌មាន​កម្ពុជា ​(ស.ស.ស.ក) បានថ្លែងប្រាប់ «កម្ពុជាថ្មី» ថា នៅក្នុងកាលៈទេសៈនេះ ថៃបានឈានដល់សមរភូមិសារព័ត៌មាន ដោយភាគីថៃបានប្រើគ្រប់មធ្យោបាយ ក្នុងការធ្វើព័ត៌មានទាំងពិត និងប្រឌិត បំភាន់ផង បំភ័យផង ក្នុងគោលបំណងបម្រើឱ្យសមរភូមិសង្គ្រាម ដើម្បីយកប្រៀបពីខាងសាធារណៈមតិ។

លោកបានលើកឡើងថា «ព័ត៌មានដែលគេធ្វើ គឺបម្រើឱ្យអ្វីដែលហៅថាសមរភូមិព័ត៌មាន យើងត្រូវតែមើល គ្រាន់តែថាកុំឱ្យងាយជឿទៅលើអ្វីដែលគេបានផ្សាយហ្នឹង ហើយយកមកថ្លឹង និងជឿទៅលើអ្វីដែលជាផលប្រយោជន៍ជាតិយើង»។ លោកបន្តថា នៅក្នុងដំណាក់កាលនេះ មិនទាញទៅដល់ការបដិសេធចោល ប៉ុន្តែត្រូវមានជំហរណាមួយ ដើម្បីដឹងថាអ្វីជាការពិត ហើយអ្វីដែលក្លែងក្លាយ។ ជាងនេះទៅទៀត​ ត្រូវមើលដោយការពិចារណា ប្រកបដោយហេតុ និងផល កុំជឿទៅតាមការផ្សាយរបស់គេទាំងស្រុង ព្រោះព័ត៌មានដែលគេធ្វើពេលនេះជាចេតនាធ្វើឱ្យរំជួលទៅលើសមរភូមិសាធារណៈមតិ។

ចំណែក លោក ពុយ គា ប្រធាន​ក្លិប​អ្នក​កាសែត​កម្ពុជា បានបញ្ជាក់ប្រាប់ កម្ពុជាថ្មីថា នៅក្នុងសម័យសង្គ្រាមកម្ពុជា-ថៃនេះ សារព័ត៌មានថៃមួយចំនួនបានផ្សាយនូវព័ត៌មានមិនពិតជាច្រើន ដោយធ្វើការផ្សាយតាមតែប្រភពមួយដែលមិនបានធ្វើការផ្ទៀងផ្ទាត់ច្បាស់លាស់។

លោកបានសង្កត់ធ្ងន់ថា «បញ្ហាធំរបស់សារព័ត៌មានថៃពេលនេះ ជាពិសេស Khaosod English និង The Nation Thailand ត្រូវបានគេកត់សម្គាល់ថា ពិបាកជឿ»។ ជាក់ស្តែង ការចុះផ្សាយរបស់សារព័ត៌មានទាំងពីរនេះ ត្រូវបានបាត់បង់ជំនឿ ដូច្នេះរាល់ពេលដែលផ្សាយមក គេតែងតែផ្ទៀងផ្ទាត់ជាមួយសារព័ត៌មានដ៏ទៃទៀត ថាតើពិត ឬមិនពិត។

បើតាមលោក ពុយ គា ក្លិប​អ្នក​កាសែត​កម្ពុជា ក៏ធ្លាប់បានអំពាវនាវដល់ការសែតថៃ រួមមាន Khaosod English និង The Nation Thailand សូមឱ្យគោរពវិជ្ជាជីវៈ និងក្រមសីលធម៌ ឱ្យបានម៉ត់ចត់ ជាពិសេសត្រូវផ្ទៀងផ្ទាត់ឱ្យបានច្បាស់លាស់ មុននឹងផ្សាយ ព្រោះការផ្សាយទាំងនោះបានធ្វើឱ្យប៉ះពាល់ដល់កម្ពុជា និងធ្វើឱ្យមានការច្របូកច្របល់ដល់មតិជាតិ អន្តរជាតិ ព្រមទាំងប្រជាជននៃប្រទេសទាំងពីរ៕

អត្ថបទ៖ គេន ម៉ាលិះ