បង្ក្រាបមិនចេះអស់ ទីតាំងដដែលៗ ដំណាំកញ្ឆាក្នុងស្រុកគិរីវង់

ស្រុកគិរីវង់ គឺជាស្រុកមួយក្នុងចំណោមស្រុកទាំងអស់ក្នុងខេត្តតាកែវ ជាជំរកដំណាំកញ្ឆា​ខុស​ច្បាប់​ ដែលជនខិល​ខូច​លួចដាំ ហើយក៏ត្រូវបានកម្លាំងនគរបាលស្រុក និង​ខេត្តចុះកាប់ដុតបំផ្លាញជាច្រើន​កន្លែង និងញឹកញាប់ផងដែរ តែទោះយ៉ាងណា ជនដែលលួចដាំដំណាំកញ្ឆាខុសច្បាប់ទាំងនោះ នៅ​មិនទាន់ចាប់​ខ្លួនយកមកផ្ដន្ទាទោសបាននៅឡើយ។

នៅ​ថ្ងៃ​ទី​២៨ ខែមិថុនា ឆ្នាំ​២០២១ កម្លាំង​ជំនាញ​អធិការដ្ឋាន​នគរបាល​ស្រុក​គិរីវង់​ សហការ​ជាមួយ​កម្លាំង​ប៉ុស្តិ៍នគរបាល​រដ្ឋបាល​ឃុំ​ទាំង​១២ បាន​ឡើង​រុករក​​ និង​កាប់​ដុតបំផ្លាញដំណាំ​កញ្ឆា​ដែល​ជន​ខិល​ខួច​លួច​ដាំ​ខុសច្បាប់ បាន​ចំនួន​១១​ទីតាំង លើ​ផ្ទៃដី​ប្រមាណ​២,៨១៨​ម៉ែត្រក្រឡា នៅ​ចំណុច​ដុប​ថ្ម​ចង្ក្រាន​ ស្ថិតនៅ​ភូមិសាស្ត្រ ឃុំ​ព្រះបាទ​ជាន់ជុំ ស្រុក​គិរីវង់។

ក្នុងនោះកម្លាំងក៏បានបំផ្លាញអាង​ស្តុក​ទឹក​សិប្បនិម្មិត​០៩​អាង ​និង​កំពុង​បន្ត​ស្រាវជ្រាវ​ស្វែងរក​ជន​ល្មើស​លួច​ដាំ​ដំណាំ​កញ្ឆា​ដើម្បី​យកមក​ផ្តន្ទាទោស​តាមច្បាប់។

គួរបញ្ជាក់ថា ការបង្ក្រាបដំណាំកញ្ឆាខុសច្បាប់នៅក្នុងមូលដ្ឋានស្រុកគិរីវង់​​នៃខេត្តតាកែវនេះ បើ​តាម​របាយការណ៍របស់សមត្ថកិច្ច ទីតាំងដែលបង្ក្រាបនោះ គឺនៅមិនឆ្ងាយពីគ្នាប៉ុន្មាននោះទេ គឺនៅ​ទី​តាំងក្បែរគ្នាដដែលៗ ហើយនៅតែក្នុងភូមិសាស្ដ្រឃុំព្រះបាទជាន់ជុំតែមួយគត់ តែអាជ្ញាធរហាក់​មិន​ទាន់​គ្រប់គ្រងនឹងការលួចដាំដំណាំកញ្ឆាខុសច្បាប់បាននៅឡើយ ពីសំណាក់ក្រុមជនខិលខូចទាំង​នេះ៕

អត្ថបទ ៖ រស្មី​