ចាប់ខ្លួនឈ្មួញទិញ លក់រថយន្តជំពាក់ប្រាក់១៥មុឺនដុល្លារចេញសែកស្អុយ

អាវុធហត្ថរាជធានីភ្នំពេញ នារសៀលថ្ងៃទី ២៣ ខែកក្ដដា ឆ្នាំ២០២១នេះ បានចាប់បញ្ជូនអ្នកទិញ លក់ រថយន្តម្នាក់ បញ្ជូនមកតុលាការ ពាក់ព័ន្ធបទល្មើសចេញសែកស្អុយអោយដៃគូររកសុីលើប្រាក់បំណុលជាង១៥មុឺនដុល្លារ ។

ជនសង្ស័យឈ្មោះ ហុក ហេង អាយុ៣៩ឆ្នាំ មានលំនៅស្ថានលេខ ១០៣ បុរីប៉េងហួតបឹងស្នោ សង្កាត់និរោធ ខណ្ឌច្បារអំពៅ ។

សមត្ថកិច្ចបានបញ្ជាក់ថា ការឃាត់ខ្លួនឈ្មោះ ហុក ហេង គឺអនុវត្តតាមដីកាបញ្ជាអោយចូលខ្លួនរបស់អយ្យការអមសាលាដំបូង បន្ទាប់ពីជននេះបានគេចវេសមិនចូលខ្លួនតាមការកោះហៅរបស់សមត្ថកិច្ចចំនួន២លើក ជាប់គ្នា ក្រោយពេលម្ចាស់បំណុលឈ្មោះ ឃី ស្រ៊ុន បានដាក់ប្ដឹងមកសមត្ថកិច្ច ។

តាមសាវតាអង្គហេតុឈ្មោះ ហុក ហេង បានសារភាពថា ខ្លួនបានស្គាល់រាប់អានគ្នាជាមួយ ឃី ស្រ៊ុន ៣ឆ្នាំមកហើយ ដោយខ្លួនបានយករថយន្តពី ឃី ស្រ៊ុន ចំនួន៣គ្រឿង មានតម្លៃសរុបចំនួន៥៥ ,០០០ដុល្លារ មកលក់ យកប្រាក់ចំណេញ ។ ចំពោះប្រាក់ដើមខ្លួនមិនទាន់អោយទៅ ឃី ស្រ៊ុន វិញទេ គឺទុករកសុីបន្ត ដោយអោយការប្រាក់២ភាគរយប្រចាំខែ ។ ក្រោយមកខ្លួនបានខ្ចីប្រាក់បន្ថែមពី ឃី ស្រ៊ុន ចំនួន១០មុឺនដុល្លារទៀតដើម្បីពង្រីមុខរបរ ។ ក្នុងនោះខ្លួនក៏បានចេញសែកមួយសន្លឹកលេខ ៧៣២៧៤៧ ចុះថ្ងៃទី០១ ខែមេសា ឆ្នាំ២០២១ មានទឹកប្រាក់ចំនួន១៥៥ ,០០០ ដុល្លារ អោយទៅឈ្មោះ ឃី ស្រ៊ុន ប៉ុន្តែសែកនោះគ្មានលុយទេ ដោយសារនៅក្នុងតំណាក់កាលកូវីដឆ្លងរាលដាល ខ្លួនរកសុីខាតអស់ដើមហើយ ទើបមិនចូលខ្លួនដោះស្រាយ ក៏ត្រូវសមត្ថកិច្ចចាប់ខ្លួនតែម្ដង ៕

អត្ថបទ ៖ មករា