លោក ពេជ្រ កែវមុនី នាំយក​បច្ច័យប្រគេនព្រះសង្ឃព្រះជន្ម ១០៨ព្រះវស្សានៅវត្តចាក់អង្រែលើ

លោក ពេជ្រ កែវមុនី អភិបាលនៃគណះអភិបាលខណ្ឌមានជ័យ បាននាំយកបច្ច័យរួមទាំងទេយ្យទានទៅប្រគេនដល់ព្រះសង្ឃព្រះជន្ម១០៨ព្រះវស្សា ដែលគង់ចាំព្រះវស្សានៅវត្តចាក់អង្រែលើ សង្កាត់ចាក់អង្រែលើខណ្ឌមានជ័យ រាជធានីភ្នំពេញ។

ការនាំយកបច្ច័យទៅប្រគេននេះ គឺប្រព្រឹត្តិធ្វើឡើងនៅវេលាថ្ងៃត្រង់ថ្ងៃទី១១ ខែសីហា ខណះដែលលោកពេជ្រ កែវមុនី អភិបាលខណ្ឌមានជ័យ រួមដំណើជាមួយលោក កែវ សាវឿន ចៅសង្កាត់ចាក់អង្រែលើចុះទៅពិនិត្យការសាងសង់មហាកុដ្ឋិដែលសម្តេចតេជោ និងសម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន ធ្វើប្រគេនដល់ព្រះសង្ឃព្រះជន្ម១០៨ព្រះវស្សា ព្រមទាំងសាងសង់បន្ទប់ថ្មជូនដល់តាជីនិងដូនជីដែលរស់នៅគ្មានទីពឹងក្នុងវត្តចាក់អង្រែលើនេះផងដែរ។

ក្នុងពេលពិនិត្យមើលការសាងសង់កុដ្ឋិដែលសម្តេចទាំងទ្វេ ធ្វើប្រគេនដល់ព្រះសង្ឃព្រះជន្ម១០៨វស្សាព្រមទាំងតាជីនិងដូនជី លោក ពេជ្រ កែវមុនី ក៏បាននាំយកបច្ច័យនិងទេយ្យទានប្រគេនដល់ព្រះសង្ឃព្រះជន្ម១០៨ព្រះវស្សា ក៏ដូចជាដូនជីនិងតាជីទៀតផង។

តាងនាមជាអាជ្ញាធរនិងជាតំណាងដល់ព្រះសង្ឃនិងដូនជី តាជី សូមលើកដៃសំពះគោរពថ្លែងអំណរគុណដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលសម្តេចបានជួយសាងសង់កុដ្ឋិថ្មីនិងបន្ទប់ថ្មីប្រគេននិងជូនដល់ព្រះសង្ឃព្រមទាំងតាជីដូនជី បានគង់និងស្នាក់នៅបានល្អស្អាតបែបនេះ។គុណរបស់សម្តេចធ្វើឲ្យកូនចៅថ្នាក់ក្រោមសូមគោរពនិងអនុវត្តន៍តាមជារៀងរហូត៕

អត្ថបទ ៖ នរា