ព័ត៌មានជាតិ

តំណាង WHO ប្រចាំកម្ពុជា៖ ហានិភ័យនៃការកើនឡើងករណីឆ្លងកូវីដ១៩ ប្រភេទ Delta គឺខ្ពស់ណាស់

បានផុស

៤ ខែ មុន

នៅ

ថ្ងៃសុក្រ ១៣ សីហា ២០២១

ដោយ

តំណាងអង្គការសុខភាពពិភពលោកប្រចាំកម្ពុជា ក្នុងរបាយការណ៍របស់ខ្លួន ដែលបានចេញផ្សាយកាលពីយប់ថ្ងៃទី ១២ ខែសីហា បានសរសេរថា ខណៈដែលមានសញ្ញានៃការថយចុះនូវការចម្លង និង ការស្លាប់នៅតាមខេត្តខ្លះ ហានិភ័យនៃការកើនឡើងនៃករណីឆ្លងកូវីដ១៩ ដោយសារវីរុសកូវីដ១៩ បំប្លែងថ្មី ដែលតា គឺខ្ពស់ណាស់ ជាពិសេសប្រសិនបើយើងឆាប់បន្ធូរបន្ថយ ហើយនិងបន្ធូរបន្ថយការអនុវត្តអន្តរាគមន៍សុខភាពសាធារណៈមិនមែនឱសថលឿនពេក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី១០ ខែសីហា ឆ្នាំ២០២១កន្លង កម្ពុជាបានរកឃើញករណីឆ្លងកូវីដ១៩ បំប្លែងថ្មី ដែលតាចំនួន ៤៤ករណីបន្ថែមទៀត ខណៈ២៤នាក់ជាករណីឆ្លងក្នុងសហគមន៍ ក្រៅពីនោះភាគច្រើនជាការនាំចូលពីក្រៅប្រទេស។ ដូច្នេះសរុបអ្នកឆ្លងកូវីដ១៩ បំប្លែងខ្លួនថ្មី ដែលតា គិតចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី១០ ខែសីហា ឆ្នាំ ២០២១ មានសរុបទាំងអស់ ៤២៩នាក់( ស្រីចំនួន ២០៩នាក់)។

អង្គការសុខភាពពិភពលោកប្រចាំកម្ពុជាឱ្យដឹងទៀតថា ទាំងអស់គ្នាបន្តប្រណាំងប្រជែងជាមួយនឹងវីរុសកូវីដ១៩ បំប្លែងថ្មី ដែលតា ។ វីរុសកូវីដ១៩ បំប្លែងថ្មីប្រភេទដែលតា ឆ្លងរាលដាលលឿនបំផុតបច្ចុប្បន្ននេះ និងមិនមានវិធានការតែមួយណា អាចទប់ស្កាត់ការចម្លងបានទេ ពោលគឺទាមទារឱ្យមានការរួមបញ្ចូលគ្នាប្រកបដោយប្រសិទ្ធភាពនៃវិធានការសុខភាពសាធារណៈ និងសង្គមដែលផ្អែកលើហានិភ័យ ព្រមទាំងពន្លឿនកម្មវិធីការចាក់វ៉ាក់សាំង។ ការចាក់វ៉ាក់សាំងបង្ការជំងឺកូវីដ១៩ ដែលត្រូវបានចាត់ទុកជាយុទ្ធសាស្រ្តដ៏ខ្លាំងមួយ ប៉ុន្តែវាមិនមែនដំណោះស្រាយវេទមន្ត ដើម្បីបញ្ចប់ជំងឺរាតត្បាតកូវីដ១៩ នោះទេ។ នេះបើតាមការអះអាងរបស់អង្គការសុខភាពពិភពដដែល។

គិតត្រឹមសប្ដាហ៍នេះវីរុសបំប្លែងខ្លួនថ្មីប្រភេទដែលតា បានឆ្លងរីករាលដាលចូលសហគមន៍ រហូតដល់១៧ រាជធានី-ខេត្តហើយ។ ដូច្នេះដើម្បីធានាបានប្រសិទ្ធភាពនៃការអនុវត្តវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩ ជាពិសេសក្នុងបរិបថដែលកម្ពុជាកំពុងប្រឈមនឹងការមកដល់នៃរលកទី៣ នៃការឆ្លងរាលដាលទ្រង់ទ្រាយធំនៃកូវីដ១៩ ដែលបណ្តាលមកពីវិរុសបំប្លែងខ្លួនថ្មីដែលតា រាជរដ្ឋាភិបាលបានដាក់ចេញនូវយុទ្ធសាស្រ្ត និងទប់ស្កាត់ការឆ្លងរាលដាលនៃជំងឺកូវីដ១៩ នៅទូទាំងប្រទេស និងវិធានការបិទខ្ទប់បណ្តាខេត្តជាប់ព្រំដែនកម្ពុជា-ថៃ និងខេត្តសៀមរាប សម្រាប់រយៈពេល៧ ថ្ងៃបន្ថែមទៀត គិតចាប់ពីថ្ងៃទី ១២ ដល់ថ្ងៃទី១៩ ខែសីហា ឆ្នាំ២០២១៕