​បើក​ឲ្យ​ហោះ​ហើរ​​លើក​ដំបូង ព្រលានយន្តហោះ​ថ្មី​​​ខេត្ត​កោះកុង​នៅ​ចុង​ឆ្នាំ​នេះ

មន្រ្តីជាន់ខ្ពស់អាកាស​ចរ​ស៊ីវិល បាន​បញ្ជាក់​ពី​ការ​ត្រៀមឲ្យ​ដំណើរការ​​​សាកល្បង​ហោះហើរ​ជា​​លើក​ដំបូង​នៅព្រលាន​យន្តហោះ​ថ្មី​តារា​សាគរ​ ដែល​​បញ្ចប់​ការ​សាងសង់​នៅ​អំឡុង​ខែ​តុលា​នេះ។

ឯកឧត្តមនាយឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលបាន​ឲ្យ​ដឹង​ ក្រោយ​ពេល​តំណាង​ក្រុមហ៊ុន​បាន​ចូល​ជួប​ពិភាក្សា​ការងារ​កាល​ពី​ព្រឹកមិញនេះ។

បើ​តាម​តំណាង​ក្រុមហ៊ុន​បាន​បញ្ជាក់​ថា ព្រលានយន្តហោះ​តារាសាគរ​នឹង​​បញ្ចប់ការ​សាងសង់​នៅក្នុង​ខែ​តុលា​នេះ។ ជាមួយ​គ្នា​នេះ​ ក្រុមហ៊ុន​នឹង​ត្រៀមបើកដំណើរការសាកល្បងនៅថ្ងៃទី៣០ ខែធ្នូ ឆ្នាំ២០២១ ខាងមុខ។

ជាការឆ្លើយតប ឯកឧត្តមបណ្ឌិតរដ្ឋមន្ត្រី បានឯកភាពក្នុងការត្រៀមបញ្ចប់ការសាងសង់ និងការដាក់ឱ្យដំណើរការសាកល្បងស្របតាមលក្ខណៈបច្ចេកទេស។ ចំពោះការសម្ភោធដាក់ឱ្យប្រើប្រាស់ជាផ្លូវការ និង​ត្រូវធ្វើនៅពេលក្រោយតាមពេលវេលាសមស្របណាមួយ។

អាកាសយានដ្ឋានអន្តរជាតិតារាសាគរនេះ អភិវឌ្ឍដោយក្រុមហ៊ុនចិនឈ្មោះ Tianjin Union Development Group(UDG) ដែលទទួលបានដីសម្បទានសេដ្ឋកិច្ចសរុបរាប់ទាំងព្រលានយន្ដហោះ និងការអភិវឌ្ឍតំបន់ផ្សេងៗទៀតដល់ទៅ៤ម៉ឺន៥ពាន់ហិកតា នៅក្នុងស្រុកបទុមសាគរ ខេត្តកោះកុង ក្បែរឈូងសមុទ្រថៃ។

ការសាងសង់ព្រលានយន្ដហោះតារាសាគរ នៅដំណាក់កាលទី១ បាន​ចំណាយ​ថវិកាប្រមាណ ៣៥០លានដុល្លារ ​នៅ​លើផ្ទៃដីជាង២១៨ហិកតា។ អាកាសយានដ្ឋាននេះ មានសមត្ថភាពអាចផ្ទុកយន្តហោះធុន Boeing 777 និងAirbus A34០ ដែលជាប្រភេទយន្តហោះខ្នាតធំ ។ ដោយឡែកក្នុងដំណាក់កាលទី២និងទី៣ គឺត្រូវរង់ចាំមើលកំណើន​ពី​១០​ទៅ​១៥​ឆ្នាំបន្ថែមទៀតថាតើមានតម្រូវការប៉ុណ្ណា បើសិនមានតម្រូវការបន្ថែមក្រុមហ៊ុននឹងពង្រីកបន្ថែមទៀត៕

អត្ថបទ៖ ប៊ុណ្ណារ៉ា