Connect with us

ព័ត៌មានជាតិ

អាងប្រព្រឹត្តិកម្មទឹកកខ្វក់ថ្មីបន្ថែម​ទៀត នឹង​សាងសង់​​នៅ​ខេត្តព្រះសីហនុ

បានផុស

នៅ

ខេត្តព្រះសីហនុ គ្រោងសិក្សារៀបចំអាងប្រព្រឹត្តិកម្មទឹកកខ្វក់បន្ថែមទៀត ដើម្បីរំដោះទឹកសំអុលឱ្យបានទាន់ពេលវេលាទោះបីខេត្តមានអាងប្រព្រឹត្តកម្មទឹកកខ្វក់ចំនួន៣ទីតាំង ដែលមានសមត្ថភាពរំដោះទឹកសំអុយបានប្រមាណជាង​៣២០០០​ម៉ែត្រគីបក្នុង១ថ្ងៃក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍នៅ ព្រឹកថ្ងៃទី១៤ធ្នូនេះថា បច្ចុប្បន្ននេះការរំដោះទឹកសំអុយនៅ ក្នុងក្រុងព្រះសីហនុ រំដោះទៅ តាមប្លុកនីមួយៗក្នុងនោះអាងប្រព្រឹត្តកម្មទឹកកខ្វក់ទី១ រំដោះទឹកក្នុងប្លុកឆ្នេរឯករាជ្យ។ អាងប្រព្រឹត្តកម្មទឹកកខ្វក់ទី២ រំដោះនៅ ឆ្នេរសុខា និងអាងប្រព្រឹត្តកម្មទឹកកខ្វក់ទី៣ រំដោះនៅ ប្លុកឆ្នេរអូឈើ​ទាល។

លោក ឃាង ភារម្យបានបន្តទៀតថា អាងប្រព្រឹត្តកម្មទឹកកខ្វក់៣ទីតាំងនេះ នៅ មិនទាន់មានការឆ្លើយតបទៅ នឹងតម្រូវការជាក់ស្តែងនាពេលបច្ចុប្បន្ននៅ ឡើយទេ។ អីចឹងហើយបានជារដ្ឋបាល​ខេត្ត​គ្រោងនឹងរៀបចំសិក្សាអាងប្រព្រឹត្តិកម្មជាបន្តបន្ទាប់ទៀត​ទៅ តាមលទ្ធភាព។

បើតាមលោក គួច ចំរើន អភិបាលខេត្តព្រះសីហនុធ្លាប់បានមានប្រសាសន៍ថា បច្ចុប្បន្ន​នេះខេត្តព្រះសីហនុមានអាងប្រព្រឹត្តកម្មទឹកកខ្វក់ចំនួន០៣កន្លែង ក្នុងនោះស្ថានីយ៍ប្រព្រឹត្តិកម្មទឹកកខ្វក់ទី១ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ៥,២00 ម៉ែត្រគូប ក្នុងមួយថ្ងៃ។ ស្ថានីយ៍ប្រព្រឹត្តិកម្មទឹកកខ្វក់ទី២ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ៧,២00 ម៉ែត្រគូប ក្នុងមួយថ្ងៃ។ ចំណែកឯស្ថានីយ៍ប្រព្រឹត្តិកម្មទឹកកខ្វក់ទី៣ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ២០,០០០ម៉ែត្រគូបក្នុងមួយថ្ងៃបានចាប់ផ្តើមសាងសង់កាលពីថ្ងៃទី១៨ខែកញ្ញាឆ្នាំ២០២១ ហើយគ្រោងបញ្ចប់ការសាងសង់នៅ ខែមិថុនា ឆ្នាំ២០២៣ ក្នុងទឹកប្រាក់ប្រមាណ ២០លានដុល្លារ។

លោក គួច ចំរើនបានបន្តថា ការសាងសង់ស្ថានីយ៍ប្រព្រឹត្តកម្មទី៣ ក្នុងគោលបំណងដើម្បីបន្សុទ្ធទឹកកខ្វក់ ទឹកស្អុយ ឱ្យក្លាយជាទឹកដែលស្អាត ស្របតាមស្តង់ដារបរិស្ថាន មុននឹងបញ្ចេញចោលទៅ ក្នុងសមុទ្រ ដោយប្រើបចេ្ចកវិទ្យា MABR និងត្រូវបានទទួលស្គាល់ថាជាបច្ចេកវិទ្យាដែលមានស្ថេរភាព ប្រសិទ្ធភាពខ្ពស់ សន្សំសំចៃថាមពល គ្មានសំឡេងរំខាន និងគ្មានក្លិនប៉ះពាល់ដល់អ្នករស់នៅ ជុំវិញ។

លោកអភិបាលខេត្តបានបញ្ជាក់ទៀតថាមូលហេតុដែលត្រូវសាងសង់អាងប្រព្រឹត្តកម្មទឹកកខ្វក់ទាំងនេះឡើង គឺដើម្បីធ្វើឱ្យឆ្នេរសមុទ្ររបស់យើងក្លាយជាឆ្នេរស្អាត ទឹកសមុទ្រពណ៌ខៀវស្រងាត់ និងបរិស្ថានល្អ គ្រប់គ្រងបានសំណល់រាវ ទាក់ទាញភ្ញៀវទេសចរជាតិអន្តរជាតិពិសេសធ្វើឱ្យខេត្តព្រះសីហនុប្រែមុខមាត់ថ្មី ដែលរាជរដ្ឋាភិបាលកំណត់យកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណងនាពេលខាងមុខ៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម