ម៉ាស៊ីនសង្កត់ពុម្ពប្រាក់កាសសម័យព្រះអង្គឌួងរកឃើញក្នុងភូមិតូចមួយក្បែរអតីតរាជធានីឧដុង្គ

ម៉ាស៊ីនសង្កត់ពុម្ពកាស ត្រូវបានរកឃើញនៅក្នុងភូមិតូចមួយ ក្បែរអតីតរាជធានីឧដុង្គ ខេត្តកំពង់ស្ពឺ។

បើតាមឯកសារស្រាវជ្រាវដោយសារមន្ទីរព្រះស្រីឦសានវរ្ម័ន បានឲ្យដឹងថា ព្រះបាទអង្គដួង បានទិញម៉ាស៊ីនសង្កត់ពុម្ពនេះ ជាមួយម៉ាស៊ីន២គ្រឿងផ្សេងទៀត ដែលប្រហែលជាម៉ាស៊ីនគេប្រើរួច ប៉ុន្តែមានលក្ខណៈទំនើបជាង វាត្រូវបានគេប្រើពីឆ្នាំ ១៨៥៣ ដើម្បីផលិតកាសដែលមានតម្លៃចរឹកតូច។

ម៉ាស៊ីននេះ ត្រូវបានប្រជាជនចាត់ទុកថា មាននាគចូលសណ្ឋិត ដែលជាវិញ្ញាណពោរពេញទៅដោយអំណាចវេទមន្តអស្ចារ្យ។

លោក នូ គួយ មគ្គុទេសនៃសារមន្ទីរព្រះស្រីឦសានវរ្ម័ន បានឲ្យដឹងថា ម៉ាស៊ីននេះមានទម្ងន់ប្រហែល២តោន និងជាម៉ាស៊ីនសង្កត់ពុម្ពដែលមាន​អាយុកាលចំណាស់ជាងគេនៅក្នុងប្រទេសកម្ពុជា។ ចំណែករូបថតនេះ ត្រូវបានថតទុកនៅឆ្នាំ ១៩៦០ ដោយលោក Ch. Mayer។

បច្ចុប្បន្នម៉ាស៊ីនសង្កត់ពុម្ពនេះ ត្រូវបានរក្សាទុកនៅក្នុងសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន កណ្តាលរាជធានីភ្នំពេញ។

ប្រធានសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន លោក Klaise Killian បានឲ្យដឹងថា ភ្ញៀវទេសចរទាំងជាតិ និងអន្តរជាតិ អាចចូលទស្សនាសារមន្ទីរព្រះស្រីឦសានវរ្ម័ន បានរៀងរាល់ថ្ងៃអង្គារ ដល់ថ្ងៃអាទិត្យ ចាប់ពីម៉ោង៩ព្រឹក ដល់ម៉ោង៦ល្ងាច ដើម្បីស្វែងពីរូបិយវត្ថុរបស់កម្ពុជា តាំង​ពី​សម័យ​កាល​ហ្វូណន រហូតដល់បច្ចុប្បន្ន៕ អត្ថបទ៖ ទូន សុផល