ក្រសួង​ច្រាន​ចោល​ការចុះផ្សាយ​ មូលហេតុ​នៃការ​ឡើង​ថ្លៃជ្រូករស់​

ក្រសួងកសិកម្ម រុក្ខាប្រមាញ់ និងនេសាទ បានច្រានចោលការផ្សព្វផ្សាយរបស់ គេហទំព័រសារព័ត៌មានសង្គមថ្មី ដែលបានចុះផ្សាយដាក់ចំណងជើងថា “លោក អូន ព័ន្ធមុនីរ័ត្ន ប្រាប់រដ្ឋមន្ត្រីកសិកម្មថា ការឡើងថ្លៃជ្រូករស់ដោយសារកង្វះយន្តការប្រកួតប្រជែង”។

ក្រសួងកសិកម្មអះអាងថា ការចុះផ្សាយអត្ថបទនេះ គឺខុសពីការពិត និងគ្មានមូលដ្ឋានច្បាស់លាស់ ធ្វើឱ្យសាធារណជនយល់ច្រឡំលើក្រសួងកសិកម្ម។

សេចក្ដីប្រកាសព័ត៌មាន របស់ក្រសួងកសិកម្ម បានឱ្យដឹងថា អនុវត្តតាមអនុសាសន៍របស់សម្ដេចតេជោ ហ៊ុន សែន ជុំវិញការពិនិត្យលទ្ធភាពកាត់បន្ថយការនាំចូល និងបង្កើនការដាំដុះបន្លែ ចិញ្ចឹមត្រី និងសត្វ កាលពីដើមឆ្នាំ ២០២០ ក្រសួងបានចេញគោលការគ្រប់គ្រងការនាំចូលជ្រូករស់ពីបរទេសមកផ្គត់ផ្គង់ទីផ្សារកម្ពុជា តាំងពីថ្ងៃទី ១ ខែធ្នូ ឆ្នាំ ២០២០ ដើម្បីទប់ស្កាត់ជំងឺឆ្លងដែនសត្វ ពិសេសជំងឺប៉េស្តជ្រូកអាហ្វ្រិក និងទប់ស្កាត់ការនាំចូលជ្រូករស់លើសតម្រូវការមកបំផ្លាញអ្នកចិញ្ចឹម និងធានាស្ថិរភាពតម្លៃជ្រូករស់លើទីផ្សារ។

ក្រសួងបញ្ជាក់ថា បច្ចុប្បន្ន តម្លៃជ្រូករស់តម្លៃជ្រូករស់ក្នុងស្រុកមិនមានការប្រែប្រួលខ្លាំងនោះទេ ស្ថិតនៅចន្លោះ ១១ ៥០០ ទៅ ១៣០០០ រៀល ក្នុងមួយគីឡូ អាស្រ័យទៅតាមតំបន់នីមួយៗ និងប្រភេទជ្រូកសាច់។ ចំពោះតម្លៃសាច់ជ្រូកនៅលើទីផ្សារ បានប្រែប្រួលចន្លោះពី ២ ម៉ឺនរៀល ទៅ ២ ៥០០០ រៀល ក្នុង១គីឡូក្រាម គឺតម្លៃមួយមានការប្រែប្រួលតិចតួចបើប្រៀបនឹងឆ្នាំ ២០២១៕