សង្ក្រាន្ត​យុវជន​វិទ្យាល័យ​ខេត្ត​ព្រះសីហនុ​ ជាការ​អភិរក្ស​នូវទំនៀម​ ទម្លាប់​ ប្រពៃណី​ វប្បធម៌​ជាតិខ្មែរ​ដ៏ល្អផូរផង់

សង្ក្រាន្តយុវជនវិទ្យាល័យខេត្តព្រះសីហនុ​ បានស្តែងឱ្យឃើញ​អំពីឆន្ទៈរបស់យុវជន​ជាទំពាំងស្នង​ឬស្សី​ក្នុងការស្វែងយល់​ អភិវឌ្ឍន៍​ និងអភិរក្សនូវទំនៀម​ទម្លាប់​ ប្រពៃណី​ វប្បធម៌ជាតិ​ខ្មែរ។

កម្មវិធី “សង្ក្រាន្តយុវជនវិទ្យាល័យខេត្តព្រះសីហនុ” បានរៀបចំឡើងនៅថ្ងៃទី ១០ ខែមេសា ២០២២ នៅឆ្នេរពយជំទាវម៉ៅ ភូមិគគីរ ឃុំបិតត្រាង ស្រុកព្រៃនប់ ខេត្តព្រះសីហនុ។

លោក ឡុង ឌីម៉ង់​អភិបាលរងខេត្តព្រះសីហនុ​ បាន​ថ្លែងគាំ​ទ្រយ៉ាងពេញ​ទំហឹង និង​កោត​សរសើរ​ដោយ​ស្មោះចំពោះប្អូនៗ​ និងក្មួយៗ​ជាយុវជនទាំង​ ១៨៤នាក់​ ដែលបានផ្តួចផ្តើម​ រៀបចំកម្មវិធី​ “សង្ក្រាន្តយុវជនវិទ្យាល័យខេត្តព្រះសីហនុ” នេះឡើង ដែលនេះពិតជាស្តែងឱ្យ​ឃើញអំពីឆន្ទៈរបស់​យុវជនជាទំពាំងស្នងឬស្សីក្នុងការស្វែងយល់ អភិវឌ្ឍន៍ និងអភិរក្សនូវទំនៀម ទម្លាប់ ប្រពៃណី វប្បធម៌ជាតិខ្មែរដ៏ល្អផូរផង់ ជាកេរ្តិ៍តំណែលដ៏ឧត្តុងឧត្តមពីដូនតាយើងមក។

លោក ឡុង ឌីម៉ង់ ក៏អំពាវនាវឱ្យ ប្រជាពលរដ្ឋ​ចូលរួមទប់ស្កាត់នូវការរីករាលដាលនៃជំងឺកូវីដ-១៩ ជាពិសេសនៅតាមទីកន្លែងជួបជុំតាមទីសាធារណៈនានាដោយសូមចូលរួមឱ្យបានម៉ឺងម៉ាត់នូវវិធានការសុខាភិបាល និង៣កុំ ៣ការពារ ព្រមទាំងស្តង់ដា SOP របស់ក្រសួងទេសចរណ៍ជាដើម៕

អត្ថបទ៖ ស្រីរ័ត្ន