គណបក្ស​នយោបាយ​អាច​ឃោសនា​ក្នុងផ្សារ​បាន​ត្រឹម​១០ នាក់​ ហើយ​មិនអាច​ប្រើឧបករណ៍​បំពង​សំឡេង

ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក ប្រាជ្ញ ចន្ទ​ បានធ្វើសេចក្ដីណែនាំ​មួយ ស្តីពីការហក្បួនឃោសនាបោះឆ្នោត​ និងការធ្វើសកម្មភាពចែក​ខិត្តប័ណ្ណនៅក្នុងផ្សារ​របស់​គណបក្សនយោបាយ​ឈរឈ្មោះបោះឆ្នោតជ្រើសរើស​ ក្រុមប្រឹក្សាឃុំ ​សង្កាត់ អាណត្តិទី៥​ ឆ្នាំ​២០២២។

​បើតាមលោក ប្រាជ្ញ ចន្ទ​ អនុលោមតាមច្បាប់ស្តីពីការបោះឆ្នោតជ្រើស​រើសក្រុមប្រឹក្សាឃុំ​ សង្កាត់ បទបញ្ជ និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ​ សង្កាត់ និងដើម្បីឱ្យការឃោសនាប្រព្រឹត្តទៅ​បានត្រឹមត្រូវ ក្នុងករណីគណបក្ស​នយោបាយ​មាន​បំណង​ហែក្បួនឃោសនាឆ្លងកាត់ឃុំ សង្កាត់ ពីរ ឬច្រើន ដែលមានព្រំប្រទល់ជាប់​គ្នា ឬក្នុងករណី​ត្រូវធ្វើដំណើរ ឆ្លងកាត់ព្រំប្រទល់ដើប្បីទៅកាន់ឃុំ សង្កាត់ ឬទីកន្លែងផ្សេង ដែលគណបក្សមាន​បញ្ជី​បេក្ខ​ជនឈរឈ្មោះបោះឆ្នោត សាមីគណបក្សនយោបាយនោះត្រូវជូនដំណឹងជាលាយលក្ខណ៍អក្សរទៅ គឃ.សប ពាក់ព័ន្ធ យ៉ាងតិចឱ្យបាន៣ថ្ងៃមុនថ្ងៃហែក្បួនឃោសនា។

​ក្នុងការធ្វើដំណើរឆ្លងកាត់​ដូចករណីខាងលើ​សាមីគណបក្សត្រូវបិទ​ឧបករណ៍បំពងសំឡេង ​និងមិនត្រូវធ្វើ​សកម្មភាពឃោសនាបោះឆ្នោតឡើយ។​ ​នៅពេលទទួលបានការជូនដំណឹងពីគណបក្សនយោបាយ​ គឃ.សប​ ត្រូវរាយការណ៍ជាបន្ទាន់ទៅ​ ​គធ.ខប ដើម្បីស្នើសុំកិច្ចអន្តរាគមន៍សម្របសម្រួល និងចាត់វិធានការការពារសន្តិសុខ សណ្តាប់ធ្នាប់ និងរបៀបរៀបរយសាធារណៈ។​

​ចំពោះការហែក្បួនឃោសនា​ និងធ្វើសកម្មភាពក្នុងផ្សារ គណបក្សនយោបាយ​ដែលមានបំណង​ហែរ​ក្បួនឃោសនាបោះឆ្នោត ត្រូវជូនដំណឹងជាលាយលក្ខណ៍អក្សរទៅគណៈកម្មការឃុំ សង្កាត់រៀប​ចំការ​បោះឆ្នោត (គឃ.សប) យ៉ាងតិចឱ្យបាន៣ ថ្ងៃមុនថ្ងៃ​ហែរក្បួនឃោសនា​ ហើយ​ការជូនដំណឹង​នេះ ត្រូវបញ្ជាក់ឱ្យបានច្បាស់អំពីនាមត្រកូល នាមខ្លួន និងអាសយដ្ឋានអចិន្ត្រៃយ៍របស់​តំណាង​គណបក្សនយោបាយ កាលបរិច្ឆេទ និងពេលវេលានៃការហែក្បួន ទីតាំងប្រមូលផ្តុំ និងតម្រាយ​ផ្លូវដែល​ត្រូវហែក្បួន ចំនួនអ្នកចូលរួម ចំនួនយានជំនិះតាមប្រភេទនីមួយៗ។

បើតាមប្រធាន គ.ជ.ប រូបនោះអះអាងថា ការធ្វើសកម្មភាពក្នុងផ្សារ ត្រូវកម្រិតយ៉ាងច្រើនត្រឹមតែ១០នាក់ប៉ុណ្ណោះ ហើយត្រូវគោរព និងរក្សាឱ្យបាននូវសន្តិសុខ សុវត្ថិភាព សណ្តាប់ធ្នាប់ និងមិនត្រូវយកតាមខ្លួន ឬមិនត្រូវបើនូវឧបករណ៍បំពងសំឡងឡើយ។

លោក ប្រាជ្ញ ចន្ទ បញ្ជាក់ថា គណបក្សនយោបាយ ត្រូវយកចិត្តទុកដាក់គោរព និងរក្សាឱ្យបាននូវ​សណ្ដាប់​ធ្នាប់ល្អ តាមដងផ្លូវ ទីប្រជុំជន ទីសាធារណៈ និងត្រូវយកចិត្តទុកដាក់គោរពតាមច្បាប់ស្តីពីចរាចរណ៍ផ្លូវគោក ហើយអគ្គលេខាធិការ គ.ជ.ប គណៈកម្មការរៀបចំការបោះឆ្នោតគ្រប់ លំដាប់ថ្នាក់ អាជ្ញាធរមានសមត្ថកិច្ច និងគណបក្ស​នយោបាយ ត្រូវយកចិត្តទុកដាក់សហការអនុវត្តឱ្យមានប្រសិទ្ធភាព និងក្នុងស្មារតីទទួលខុសត្រូវខ្ពស់៕

អត្ថបទ៖ កោះកែវ