លោក ប្រាជ្ញ ចន្ទ អញ្ជើញភាគីបារាំងមកចូលរួមសង្កេតមើល ការបោះឆ្នោតតំណាងរាស្រ្ដនៅកម្ពុជា

លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានអញ្ជើញភាគីបារាំងមកចូលរួមសង្កេតមើល ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅកម្ពុជា ដែលនឹងប្រព្រឹត្តទៅនៅខែកក្កដា ឆ្នាំ ២០២៣ខាងមុខ។

ការអញ្ជើញនេះ គ្រាដែលលោក ប្រាជ្ញ ចន្ទ បានដឹកនាំគណៈប្រតិភូជាន់ខ្ពស់កម្ពុជា អញ្ជើញទៅបំពេញទស្សនកិច្ចផ្លូវការ ដើម្បីសិក្សាស្វែងយល់ និងផ្លាស់ប្ដូរបទពិសោធន៍ ពាក់ព័ន្ធនឹងការរៀបចំការបោះឆ្នោត នៅទីក្រុងប៉ារីស ប្រទេសបារាំង ចាប់ពីថ្ងៃទី ១៣ ដល់ថ្ងៃទី ១៩ ខែមីនា ឆ្នាំ ២០២៣។

នៅក្នុងឱកាសនោះ លោកប្រធាន គ.ជ.ប ក៏បានជម្រាបជូនអំពីការត្រៀមរៀបចំការបោះឆ្នោត ជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ នៅកម្ពុជា ដែលមានលក្ខណៈល្អប្រសើរ។ បន្ថែមពីលើនេះ លោក ប្រាជ្ញ ចន្ទ គ.ជ.ប ក៏បានអញ្ជើញភាគីបារាំងមកសង្កេតការណ៍ ការបោះឆ្នោតនៅកម្ពុជា នាខែកក្កដា ឆ្នាំ២០២៣ ខាងមុខ។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប បានឲ្យកម្ពុជាថ្មីដឹងនៅថ្ងៃទី ២១ ខែមីនានេះថា នៅក្នុងដំណើរទស្សនកិច្ចផ្លូវការនេះ ប្រធាន គ.ជ.ប បានជម្រាបជូនអំពីការត្រៀមរៀបចំការបោះឆ្នោត ជ្រើសតាំងតំណាង រាស្ត្រ នីតិកាលទី ៧ ឆ្នាំ ២០២៣ នៅកម្ពុជា ដែលមានលក្ខណៈល្អប្រសើរ។ បន្ថែមពីលើនេះ លោក ប្រាជ្ញ ចន្ទ គ.ជ.ប ក៏បានអញ្ជើញភាគីបារាំង ដើម្បីចូលរួមជាអ្នកសង្កេតការណ៍ សង្កេតមើលការបោះឆ្នោតនេះ ផងដែរ។

ដោយឡែក​ តាមរយៈការជូនព័ត៌មានពីក្រសួងការបរទេស​ និងសហប្រតិបត្តិការអន្តរជាតិ​កម្ពុជា​ ក៏បានឲ្យដឹងដែរថា សហភាពអ៊ឺរ៉ុប ហាក់ដូចជាបង្ហាញពីបំណងចូលរួមសង្កេតការណ៍បោះឆ្នោត ជ្រើសតាំងតំណាងរាស្ត្រ ឆ្នាំ ២០២៣​ដែរ។

លោក សោម សូរីដា បានឲ្យដឹងដែរថា តាមប្រតិទិនសម្រាប់ការបោះឆ្នោតជ្រើសតាំង តំណាងរាស្ត្រនីតិកាលទី ៧​ ឆ្នាំ ២០២៣​ ការចុះឈ្មោះអ្នកសង្កេតការណ៍អន្តរជាតិ​ ចាប់ផ្ដើមពីថ្ងៃទី ១​ ខែមេសា​ ដល់ថ្ងៃទី ១៩​ ខែកក្កដា​ ឆ្នាំ ២០២៣​។

សូមជម្រាបថា​ ការបោះឆ្នោតជ្រើសរើសក្រុមប្រឹក្សាឃុំ​-សង្កាត់ អាណត្តិទី ៥​ ឆ្នាំ ២០២២​ គ.ជ.ប​ បានទទួលចុះឈ្មោះអ្នកសង្កេការណ៍អន្តរជាតិចំនួន ១១០រូប​ មកពីអង្គការ​ និងបណ្ដាប្រទេសចំនួន​ ១៩​៕