ព័ត៌មានជាតិ

ព្រះមហាក្សត្រកម្ពុជា គ្រោងយាងទៅបំពេញទស្សនកិច្ចនៅប្រទេសឥណ្ឌា

បានផុស

២ years មុន

នៅ

ថ្ងៃព្រហស្បតិ៍ ១៩ ឧសភា ២០២២

ដោយ

ក្នុងជំនួបជាមួយនាយករដ្ឋមន្រ្តីឥណ្ឌាតាមវិដេអូកាលពីម្សិលមិញ ប្រមុខថ្នាក់ដឹកនាំកម្ពុជាបានបញ្ជាក់ពីគម្រោងយាងទៅបំពេញទស្សនកិច្ចរបស់ព្រះមហាក្សត្រកម្ពុជានៅប្រទេសឥណ្ឌា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានលើកនៅក្នុងជំនួបពិភាក្សាការងារជាមួយ លោក ណារិនដ្រា ម៉ូឌី (Narendra Modi) នាយករដ្ឋមន្រ្តីឥណ្ឌា តាមរយៈប្រព័ន្ធវីដេអូថា ឥឡូវនេះភាគីទាំងពីរកម្ពុជានិងឥណ្ឌា កំពុងតែស្វែងរកពេលវេលាសក្តិសមនៅក្នុងព្រះរាជទស្សនកិច្ចរបស់ព្រះមហាក្សត្រ ព្រះបាទសម្ដេចព្រះ បរមនាថ នរោត្តម សីហមុនី ដែលគ្រោងយាងទៅបំពេញទស្សនកិច្ចនៅប្រទេសឥណ្ឌាក្នុងឆ្នាំ២០២៣។

ជាមួយគ្នានេះដែរ មេដឹកនាំកម្ពុជាក៏បានលើកពីដំណើរទស្សនកិច្ចរបស់លោក ហ៊ុន ម៉ាណែត មេបញ្ជាការកងទ័ពជើងគោកកម្ពុជាទៅទស្សនកិច្ចប្រទេសឥណ្ឌាក្នុងឆ្នាំ២០២២ នេះ ដើម្បីចូលរួមពង្រីកទំនាក់ទំនងទ្វេភាគី ជាពិសេសក្នុងការប្រារព្ធខួបទី ៧០ នៃទំនាក់ទំនងការទូតរវាងប្រទេសទាំងពីរ។

ក្នុងជំនួបជាមួយនាយករដ្ឋមន្រ្តីឥណ្ឌា សម្ដេចតេជោក៏បានគូសបញ្ជាក់អំពីការបង្កើតទំនាក់ទំនងការទូតគិតមកដល់ឆ្នាំ២០២២នេះ គឺជាខួបលើកទី ៧០ ឆ្នាំហើយនៃទំនាក់ទំនងការទូតរវាងកម្ពុជា និងឥណ្ឌា។ ដើម្បីប្រារព្ធខួបបនៃទំនាក់ទំនងការទូតនេះ កម្ពុជានិងឥណ្ឌា នឹងត្រៀមរៀបចំពិធីអបអរសាទរខួបលើកទី៧០ឆ្នាំនេះក្នុងស្មារតីសាមគ្គីភាព និងកិច្ចសហប្រតិបត្តិការរវាងប្រទេសទាំងពីរ៕