ព័ត៌មានជាតិ

ព្រះមហាក្សត្រផ្ញើព្រះរាជសារជូនពរជនរួមជាតិក្នុងឱកាសបុណ្យចូលឆ្នាំថ្មី

បានផុស

៣ ខែ មុន

នៅ

ថ្ងៃពុធ ៨ មេសា ២០២៦

ដោយ

ព្រះមហាក្សត្រសម្ដេចព្រះបរមនាថ នរោត្តម សីហមុនី សព្វព្រះរាជហរទ័យផ្ញើសារជូនជនរួមជាតិខ្មែរក្នុងឱកាសពិធីបុណ្យចូលឆ្នាំថ្មីសូមរីករាយ រក្សាបាននូវទំនៀមទម្លាប់វប្បធម៌ សាមគ្គីជាតិឱ្យបានស្ថិតស្ថេរគង់វង្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងព្រះរាជសារឡាយព្រះហស្តលេខាថ្ងៃទី៨ ខែមេសា ឆ្នាំ២០២៦នេះ សម្ដេចព្រះ នរោត្តម សីហមុនី បានសម្ដែងនូវហឫទ័យសោមនស្សរីករាយក្នុងពេលដែលពិធីបុណ្យចូលឆ្នាំប្រពៃណីជាតិខ្មែរនឹងឈានមកដល់នាសប្ដាហ៍ក្រោយនេះ។ ព្រះអង្គមានរាជអង្កាថា ពិធីបុណ្យចូលឆ្នាំខ្មែរគឺជាវប្បធម៌ដ៏យូរអង្វែង និងផូរផង់ដែលបុព្វបុរសដូនតាខ្មែរបានបន្សល់ទុករហូតមកដល់បច្ចុប្បន្ន ហើយមានអត្ថន័យធំធេងចំពោះការចាប់ផ្ដើមឆ្នាំថ្មី និងបង្សុកូលឧទ្ទិសកុសលដល់បុព្វការីជន ក៏ដូចជាការបង្កើនភាពស្និទ្ធស្នាលរវាងសមាជិកគ្រួសារ និងចងសម្ព័ន្ធមេត្រីភាពរវាងអ្នកស្រុកភូមិជិតឆ្ងាយ។

ក្នុងរាជសារនោះព្រះអង្គទ្រង់លិខិតថា៖ «ពិធីបុណ្យនេះក៏បានបង្ហាញពីអត្តសញ្ញា និងអរិយធម៌របស់ជាតិខ្មែរ បណ្ដុះស្មារតីសាមគ្គីជាតិ និងថែរក្សា ការពារស្រលាញ់ ទំនៀមទម្លាប់ប្រពៃណីជាតិខ្មែរ ឱ្យស្ថិតស្ថេរគង់វង្សជានិរន្ត»។

ព្រះអង្គបានថ្វាយព្រះពរប្រគេនថ្វាយសម្ដេចមហាសង្ឃរាជទាំងពីរគណៈ និងពរជ័យជូនដល់ពលរដ្ឋខ្មែរទាំងអស់សូមប្រកបនឹងព្រះពុទ្ធពរគ្រប់ប្រការ កុំបីឃ្លៀងឃ្លាត។

គួរឱ្យដឹងផងដែរថា ពិធីបុណ្យចូលឆ្នាំប្រពៃណីជាតិខ្មែរ និងចាប់ផ្ដើមនៅអង្គារ ទី១២រោច ដល់១៤រោច ខែចេត្រ ពុទ្ធសករាជ២៥៦៩ ត្រូវនឹងថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ សប្ដាហ៍ក្រោយនេះ។ ពេលវេលាចូលឆ្នាំថ្មីនេះជាពេលវេលាដ៏សំខាន់មួយរបស់ជនជាតិខ្មែរដែលបានជួបជុំគ្រួសារ ធ្វើបុណ្យរួមគ្នា និងធ្វើដំណើរកម្សាន្តផងដែរ៕