ព្រះគ្រូសូត្រស្តាំ វត្តបុព្វារាម បរិច្ចាគបច្ច័យ​ទេយ្យទាន​បម្រុងទុកឆ្លើយតប​គ្រោះមហន្តរាយ

(ខេត្តស្វាយរៀង): នៅថ្ងៃទី២៧ ខែកក្កដា ឆ្នាំ២០២២ ព្រះគ្រូសុភធម្មញាណ ភួង សុភ័ណ្ឌ ព្រះគ្រូសូត្រស្តាំ វត្តបុព្វារាម (ហៅវត្តព្រៃយាយ) ក្នុងក្រុងបាវិត មានព្រះទ័យចូលរួមចំណែកក្នុងវិស័យមនុស្សធម៌ ជាមួយកាកបាទក្រហមកម្ពុជា ដោយបាននាំយកបច្ច័យទេយ្យទានចំនួន១៣មុខ គិតជាថវិកាសរុប ៦,៤៨២,៥០០រៀល ប្រគល់ដល់អនុសាខា​ក្រុងបាវុតសម្រាប់ទុកបម្រុងដើម្បីត្រៀមឆ្លើយតបនៅពេលមានគ្រោះមហន្តរាយកើតឡើង។

ព្រះគ្រូ ភួង សុភ័ណ្ឌ បានមានថេរដីការថា ព្រះអង្គគាំទ្ររាល់សកម្មភាពមនុស្សធម៌របស់អនុសាខា​ជាពិសេសកាក​បាទក្រហម​កម្ពុជា ក្រោមការដឹកនាំដ៏ឈ្លាសវៃប្រកបដោយភាពត្រឹមត្រូវរបស់សម្តេចកិត្តិព្រឹទ្ធបណ្ឌិត ប៊ុន  រ៉ានី ហ៊ុនសែន ប្រធានកាកបាទក្រហមកម្ពុជា ក្នុងការខិតខំប្រឹងប្រែងជួយសង្រ្គោះដល់ប្រជាពលរដ្ឋដែលរងគ្រោះ និងងាយរងគ្រោះ ដោយប្រការផ្សេងៗដោយមិនប្រកាន់ពីជាតិសាសន៍ សាសនា វណ្ណៈ ពណ៌សម្បុរ ឬនិន្នាការ នយោបាយឡើយ។

លោក លឹម សៀងហេង ប្រធានកិត្តិយសអនុសាខាក្រុងបាវិត បានថ្លែងអំណរគុណប្រគេនចំពោះព្រះតេជគុណ​គ្រប់ព្រះអង្គ ឧបាសក ឧបាសិកា ដែលមានព្រះទ័យ និងទឹកចិត្តជ្រះថ្លាបានយកបច្ច័យ និងសម្ភារៈទាំងអស់នេះ​មកប្រគល់ជូន ដល់អនុសាខាកាកបាទក្រហម ក្រុង ដែលត្រូវការចាំបាច់ក្នុងការជួយសង្គ្រោះដល់​ប្រជាពល​រដ្ឋដែលរងគ្រោះ ដោយសារគ្រោះមហន្តរាយផ្សេងៗ ។

លោកប្រធានកិត្តិយសអនុសាខាក្រុងបាវិត ក៏បានពាំនាំនូវការ ផ្តាំផ្ញើសាកសួរសុខទុក្ខ និងសេចក្តីថ្លែងអំណរ​គុណយ៉ាងជ្រាលជ្រៅពីសំណាក់លោក ម៉ែន វិបុល ប្រធាន គណៈកម្មធិការសាខា ប្រគេនចំពោះព្រះតេជ គុណ គ្រប់ព្រះអង្គ ដែលជានិច្ចជាកាលព្រះអង្គតែងតែ ផ្សារភ្ជាប់គាំទ្រដល់សកម្មភាព មនុស្សធម៌របស់សាខា អនុសាខា ក្នុងការរួមចំណែកជួយរំលែកនូវការលំបាករបស់ប្រជាពលរដ្ឋ ដែលងាយរងគ្រោះ។

លោក លឹម សៀងហេង មានប្រសាសន៍ថា អំណោយទាំងអស់នេះ អនុសាខានឹងធ្វើការ បែងចែកជូនដល់ដៃ​ប្រជាពលរដ្ឋដែលរងគ្រោះគ្រប់ៗគ្នា ឲ្យបានទាន់ពេលវេលាឲ្យសមស្របទៅនឹងព្រះទ័យ របស់ព្រះអង្គជាម្ចាស់ទាន៕ ដោយ:ភក្ដី