អគារសិក្សា​ សោ ហឺ សាងសង់​ប្រើ​​​បច្ចេកទេស​​ប្លង់សេ​ខ្សែកាប​មុនគេ​នៅ​កម្ពុជា

កាលពីព្រឹកថ្ងៃទី១៧ ខែសីហា ឆ្នាំ២០២២ នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអញ្ជើញជាអធិបតីក្នុងពីធីបញ្ចុះបឋមសីលាសាងសង់អគាសិក្សា១ ខ្នង​នៅអនុវិទ្យាល័យ សោ ហឺ ក្រុងបាត់ដំបង ខេត្តបាត់ដំបង។

លោកសុខ លូ អភិបាលខេត្តបាត់ដំបង បានបញ្ជាក់ផងថា អគារសិក្សាថ្មីនេះត្រូវដំណើរការសាងសង់​រយៈពេល​ ១២ ខែ មានចំនួន ១ខ្នង ៤ជាន់ មាន ២០បន្ទប់ មានបំពាក់តុ កៅអី ភ្លើងអគ្គិសនី និងទឹកស្អាត។

ការ​សាងសង់​អគារសិក្សា​​ថ្មី​នេះ ប្រើប្រាស់បច្ចេកទេសសាងសង់ដំបូងគេក្នុងខេត្តបាត់ដំបង គឺប្លង់សេ​ខ្សែកាប ធ្វើឱ្យកាន់​តែ​រឹងមាំ ធន់ និងចំណេញពេលវេលា និងអាចចាត់ទុកបានថាជាអគារសិក្សាដំបូងគេនៅកម្ពុជា ដែលប្រើបច្ចេកទេសនេះ។

ថ្លែងក្នុងពិធីនោះដែរ សម្តេច ស​ ខេង បានមានប្រសាសនគូសបញ្ជាក់ថា វិស័យអប់រំនិងការសិក្សាធិការ គឺពិតជាមាន​សារះសំខាន់​ណាស់ ក្នុងការផលិតនៅធនធានមនុស្ស ដើម្បីផ្តល់ទៅគ្រប់វិស័យក្នុងសង្គមជាតិ។ នៅគ្រប់ផ្នែកទាំងអស់នៅក្នុងសង្គម វិស័យអប់រំសុទ្ធតែត្រូវបានអភិវឌ្ឍ ទាំងថ្នាក់ដឹកនាំ ក្រុមការងាររាជរដ្ឋាភិបាល របៀបរបប ការផ្សារភ្ជាប់​គោល​នយោបាយទៅនឹងជីវភាពប្រជាពលរដ្ឋ ពោលគឺគោលនយោបាយ និងកម្មវិធីនយោបាយត្រូវធ្វើឡើងតាមសេចក្ដីត្រូវការសង្គម និងប្រជាពលរដ្ឋ។ ជាមួយគ្នានេះ សម្តេចលើកឡើងថា «ប្រជាពលរដ្ឋយើង ខ្ញុំដើរច្រើនកន្លែង ហើយក៏ទទួលបានសំណូមពរច្រើនដែរ។ គាត់អត់ដែលសុំលុយទិញឡាន ទិញម៉ូតូ ទិញរទះគោ រទះក្របី​ដើម្បីបម្រើក្រុមគ្រួសារផ្ទាល់របស់គាត់ទេ។ គាត់មានតែសុំសាលារៀន សុំវត្ត សុំផ្លូវ សុំអ្វីៗដែលបម្រើប្រយោជន៍សាធារណៈ»។

សម្តេចបាន បន្ថែមផងថា តាមរយៈសំណើរទាំងអស់នេះបានឆ្លុះបញ្ចាំងច្បាស់ថា ប្រជាពលរដ្ឋចង់ឲ្យសហគមន៌របស់គាត់មានភាពរីកចម្រើន៕

អត្ថបទ៖ ឌឿនចាន់ ថារី