លែងពិបាកដើរលើផ្លូវភក់ជ្រាំទៀតហើយ! រដ្ឋបាលខេត្តបាត់ដំបង ផ្ដល់ផ្លូវបេតុង ១ ខ្សែ ចាប់ពីផ្សារពោធិវង្សដល់រង្វង់មូលពោធិ៍ម៉ស្រី ពលរដ្ឋត្រេកអរក្រៃលែង

ផ្លូវ ១ ខ្សែ ដែលធ្លាប់តែមានជង្ហុក ភក់ជ្រាំ ពិបាកក្នុងការធ្វើដំណើរនោះ ពេលនេះ រដ្ឋបាលខេត្តបាត់ដំបង បានដាក់ក្រុមការងារជំនាញ ចុះធ្វើការឈូសឆាយ និង ចាក់បេតុងជាបណ្ដើរៗ ហើយ។ ក្នុងនោះ ដោយពេលនេះជារដូវវស្សា ក្រុមការងារ កំពុងសម្រុកធ្វើការយ៉ាងញាប់ដៃញាប់ជើង ដើម្បីសម្រួលដល់ការធ្វើដំណើររបស់ប្រជាពលរដ្ឋឲ្យបានទាន់ពេលវេលា។

លោក ព្រួញ រិទ្ធថា ប្រធានមន្ទីរសាធារណការ និង ដឹកជញ្ជូនខេត្តបាត់ដំបង បានបញ្ជាក់ថា ផ្លូវ ១ ខ្សែនេះ តភ្ជាប់ពីផ្សារពោធិវង្សទៅទល់នឹងរង្វង់មូលពោធិ៍ម៉ស្រី ដោយបន្តភ្ជាប់ជាមួយផ្លូវភ្លោះទៅកាន់រមណីយដ្ឋាន ប្រាសាទឯកភ្នំ ដែលជាតំបន់ភ្ញៀវទេសចរទៅកម្សាន្តនៅទីនោះរាល់ពេលមានពិធីបុណ្យទានម្ដងៗ។

លោកប្រធានមន្ទីរ បន្ថែមថា ផ្លូវបេតុង ១ ខ្សែនេះ គឺជាគម្រោងរបស់ខេត្ត ដោយប្រគល់នាទីឲ្យក្រុមការងាររបស់លោកឧកញ៉ា ទុយ គី ជាអ្នកស្ថាបនាបើកផ្លូវនេះមានទទឹង ៨ ម៉ែត្រ និង បណ្ដោយ ជាង ២.០០០ ម៉ែត្រ បើកភ្ជាប់ពីក្បែរវត្តពោធិវង្ស ទៅទល់នឹងរង្វង់មូលពោធិ៍ម៉ស្រី ហើយបន្តភ្ជាប់ជាមួយនឹងផ្លូវភ្លោះទៅកាន់ប្រាសាទឯកភ្នំតែម្ដង។

បើគិតមកទល់នឹងថ្ងៃទី ២៦ ខែកក្កដា ឆ្នាំ ២០២៦ នេះ ការស្ថាបនាផ្លូវបេតុង ១ ខ្សែនេះ បានប្រមាណ ៣៥% ហើយ ដោយក្រុមការងារកំពុងបន្តយ៉ាងសកម្ម ដើម្បីឲ្យសម្រេចបានក្នុងពេលឆាប់ៗ ខាងមុខនេះ និង ប្រគល់ឲ្យប្រជាពលរដ្ឋងាយស្រួលក្នុងការប្រើប្រាស់។ កន្លងមក​ ផ្លូវនេះមានលក្ខណៈតូចចង្អៀត និង ជង្ហុកជាច្រើន ពិបាកធ្វើដំណើរ តែនៅពេលនេះ ប្រជាពលរដ្ឋហាក់មានអារម្មណ៍រីករាយសប្បាយចិត្ត ក្រោយពីផ្លូវបេតុងនេះលេចចេញជារូបរាងរួចមក៕
អត្ថបទ ៖ សោ និយមរ័ត្ន