មន្ត្រីជាន់ខ្ពស់ក្រសួងសុខាភិបាល លើកឡើងនូវចំណុចមួយចំនួន ដើម្បីកាត់បន្ថយកំណើនជំងឺមិនឆ្លង

មន្ត្រីជាន់ខ្ពស់ក្រសួងសុខាភិបាល បានលើកឡើងនូវចំណុចមួយចំនួន ដើម្បីកាត់បន្ថយការកើនឡើងនៃជំងឺមិនឆ្លង ដែលមានការវិវត្តគួរឲ្យកត់សម្គាល់ ហើយត្រូវមានការចូលរួមទប់ស្កាត់ពីប្រជាពលរដ្ឋម្នាក់ៗ។

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល មានប្រសាសន៍ក្នុងសន្និ​សីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងសុខាភិបាល” នាព្រឹកថ្ងៃទី ១៥ ខែកញ្ញានេះថា ទន្ទឹងនឹងការព្រួយបារម្ភអំពីជំងឺឆ្លង ក៏យើងមានការព្រួយបារម្ភអំពីជំងឺមិនឆ្លងដែរ ដោយសារតែការប្រែប្រួល នៃការរស់នៅរបស់ប្រជាពលរដ្ឋ។

លោកស្រីលើកឡើងថា កាលពីមុន ប្រជាពលរដ្ឋត្រូវស្វែងរកម្ហូបអាហារដើម្បីទទួលទាន តែនាពេលបច្ចុប្បន្នប្រជាពលរដ្ឋត្រូវរើសម្ហូបអាហារដើម្បីទទួលទាន ដើម្បីសុខភាពរបស់យើងម្នាក់ៗ។ លោកស្រី ឱ វណ្ណឌីន បា​នបន្ថែមថា​ «ចឹងអ្វីដែលសំខាន់ ខ្ញុំលើកគ្រាន់តែឧទាហរណ៍ខ្លីទេ ឥឡូវធ្វើម៉េច ដើម្បីការ​ពារកុំឲ្យមានការកំណើននៃជំងឺមិនឆ្លង អ្វី? ងាយស្រួលបំផុត កុំពិសារប្រៃពេក កុំពិសារផ្អែមពេក កុំពិសារខ្លាញ់ពេក ហើយធ្វើលំហាត់ប្រាណឲ្យបានទៀងទាត់ ចឹងឥឡូវយើងអាចកាត់បន្ថយបានទេអាហ្នឹង?»។

អ្នកនាំពាក្យក្រសួងសុខាភិបាល លើកឡើងទៀតថា ប្រសិនបើអាចកាត់បន្ថយនូវចំណុចខាងលើនេះបាន សុខភាពរបស់ប្រជាពលរដ្ឋម្នាក់ៗ នឹងមានការប្រែប្រួលល្អ ហើយមានពេលវេលាច្រើនសម្រាប់រកប្រាក់កម្រៃ និងការបំពេញការងារផងដែរ៕

អត្ថបទ៖ ឃួន សុភ័ក្រ