កម្ពុជា-ជប៉ុន ពង្រីកកិច្ចសហប្រតិបត្តិការដោះមីននៅប្រទេសដទៃផ្អែកលើការងារមនុស្សធម៌

លោក ប្រាក់ សុខុន រដ្ឋមន្ត្រីការបរទេសកម្ពុជា និងលោក ហាយ៉ាហ្ស៊ី យ៉ូហ្ស៊ីម៉ាសា រដ្ឋមន្ត្រីការបរទេសជប៉ុន បានគូសបញ្ជាក់ថា កិច្ចសហប្រតិបត្តិការត្រីភាគីដែលកំពុងដំណើរក្នុងការដោះមីនសម្រាប់អ៊ុយក្រែន គឺធ្វើឡើងផ្អែកលើមូលដ្ឋានមនុស្សធម៌ ខណៈកម្ពុជា–ជប៉ុន ក៏ឯកភាពពង្រីកកិច្ចសហការនេះដល់ប្រទេសទីបីផ្សេងទៀត។

ក្នុងដំណើរទស្សនកិច្ចនៅជប៉ុន ក្រៅពីការពិភាក្សាលើកិច្ច​សហប្រតិបតិ្តការ​ទ្វេភាគី លោក ប្រាក់ សុខុន និងលោក ហាយ៉ាហ្ស៊ី យ៉ូហ្ស៊ីម៉ាសា បានពិភាក្សាលើ​កិច្ច​សហប្រតិបតិ្តការ​ពហុភាគី​ និង​ឯ​កភាពគ្នា​ពង្រឹងភាពជាដៃគូ និង​កិច្ច​សហប្រតិបតិ្តការ​បន្ថែមទៀត​ ពិសេសក្នុង​ក្របខណ្ឌ​​អង្គការ​សហប្រជាជាតិ និង​ក្របខណ្ឌអាស៊ាន។

បើតាមសេចក្ដីប្រកាសរបស់ក្រសួងការបរទេសកម្ពុជា នៅថ្ងៃទី ២៥ ខែមករានេះ បានឲ្យដឹងថា រដ្ឋមន្ត្រី​ការបរទេសទាំងពីរ​កម្ពុជា–ជប៉ុន ​បាន​ផ្លាស់ប្តូរទស្សនៈគ្នា​លើបញ្ហា​ជាសកលមួយចំនួនទាំងនៅក្នុង​តំបន់ និង​អន្តរជាតិដែល​ជាកង្វល់​រួម​ ជាអាទិ៍ ​សង្គ្រាមនៅអ៊ុយក្រែន និងសភាពការណ៍នៅឧបទ្វីបកូរ៉េ។

ទាក់ទិននឹងសង្គ្រាមនៅអ៊ុយក្រែន រដ្ឋមន្ត្រីទាំងពីរ បានសម្តែងការពេញចិត្តចំពោះកិច្ចសហប្រតិបតិ្តការត្រីភាគីដែលកំពុងដំណើរការ ស្តីពីការដោះមីនសម្រាប់អ៊ុយក្រែន ដោយផ្អែកលើមូលដ្ឋានមនុស្សធម៌។

សម្រាប់​​​ស្ថានការណ៍នៅមីយ៉ាន់ម៉ា លោករដ្ឋមន្ត្រីការបរទេសជប៉ុនបាន​បង្ហាញការកោតសរសើរចំពោះកិច្ចខិតខំប្រឹងប្រែងរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងនាមជាប្រធានអាស៊ាន កាលពីឆ្នាំ២០២២ កន្លងទៅនេះ ជាពិសេសលោក ប្រាក់ សុខុន ក្នុងនាមជាប្រេសិតពិសេសប្រធានអាស៊ានក្នុងការ​ជួយ​មីយ៉ាន់ម៉ាស្វែងរក​សន្តិភាព ស្ថិរភាព និង​ការ​វិលត្រឡប់មករក​ប្រក្រតីភាពឡើងវិញ។

ទោះបីជាកម្ពុជាបានផុតអាណត្តិជាប្រធានអាស៊ានក៏ដោយ ប៉ុន្តែលោក ហាយ៉ាហ្ស៊ី យ៉ូហ្ស៊ីម៉ាសា សង្ឃឹមថា​ កម្ពុជានឹងនៅតែបន្តចូលរួមក្នុងកិច្ចប្រឹងប្រែងនេះក្នុងការជួយមីយ៉ាន់ម៉ា។​

ដោយឡែក ក្របខណ្ឌអន្តរជាតិ លោក ប្រាក់ សុខុន បាន​បញ្ជាក់សាជាថ្មី​នូវ​ការគាំទ្រ​ឥតងាករេរបស់កម្ពុជាចំពោះជប៉ុ​ន ជា​​សមាជិក​អចិន្ត្រៃយ៍​​របស់​ក្រុមប្រឹក្សា​សន្តិសុខអង្គការ​សហប្រជាជាតិ និងគាំទ្រចំពោះកិច្ចខិតខំប្រឹងប្រែងរបស់ជប៉ុនក្នុងការ​ពន្លឿន​​ឲ្យ​មាន​ដំណោះ​ស្រាយឆាប់រហ័ស​​លើបញ្ហាការ​ចាប់ពង្រាត់​ជនជាតិជប៉ុនដោយកូរ៉េខាងជើង។

លោករដ្ឋមន្ត្រី​​ក៏ បានបញ្ជាក់ការគាំទ្ររបស់កម្ពុជាចំពោះគោលការណ៍សំខាន់បីនៃយុទ្ធសាស្ត្រសន្តិសុខជាតិជប៉ុន​ដែលផ្តោតលើវិភាគទានប្រកបដោយបុរេសកម្ម ដើម្បីសន្តិភាព គុណតម្លៃសកល និងសន្តិសហវិជ្ជមាន ព្រមទាំងវិបុលភាពរួមគ្នាជាមួយនឹងបណ្តាប្រទេសនានាដទៃទៀត៕

ដោយ៖ ធឿន វ៉ាន់សុង