ជាថ្មីម្ដងទៀត សម្ដេចតេជោ ប្រកាសថា នឹងលើកលែងទោសដល់បុគ្គលដែលផ្ដាច់ខ្លួនចេញពីមេអនុវត្តនយោបាយជ្រុលនិយម

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាថ្មីម្ដងទៀត បានប្រកាសថា បុគ្គលដែលផ្ដាច់ខ្លួនចេញពីមេអនុវត្តនយោបាយជ្រុលនិយមនោះ សម្ដេច នឹងស្នើសុំព្រះមហាក្សត្រ​ លើកលែងទោសឲ្យ។

សម្តេចតេជោ ហ៊ុន សែន បានក្នុងពិធីប្រគល់វិញ្ញាបនបត្រ និងសញ្ញាបត្រជូនដល់សិស្សថ្នាក់វិជ្ជាជីវៈ និងនិស្សិតសាកលវិទ្យាល័យធនធាន​មនុស្ស​ចំនួន ១,៩៤៦នាក់ នាព្រឹកថ្ងៃទី ២០ ខែកុម្ភៈនេះថា មានតែបុគ្គលម្នាក់តែប៉ុណ្ណោះ ដែលសម្ដេច នឹងមិនលើកលែងទោសឲ្យ ហើយបុគ្គលដែលផ្ដាច់ខ្លួនចេញពីបុគ្គលម្នាក់នោះ សម្ដេច នឹងស្នើសុំព្រះមហាក្សត្រ​ លើកលែងទោសឲ្យ។

សម្ដេចតេជោ ហ៊ុន សែន បានថ្លែងបែបនេះថា «តែខ្ញុំបើកចំហឲ្យអ្នកដទៃ តែមានតែម្នាក់ទេ ដែលខ្ញុំមិនអត់ឱន តែអ្នកដទៃប្រកាសផ្ដាច់ខ្លួនចេញ ខ្ញុំលើកលែងទោសឲ្យ ព្រោះច្បាប់ពន្ធនាគារ អនុញ្ញាតឲ្យនាយករដ្ឋមន្ត្រី ស្នើសុំទៅព្រះមហាក្សត្រ លើកលែងទោសឲ្យពេលណាក៏បានដែរ ប៉ុន្តែលក្ខខណ្ឌផ្ដាច់ខ្លួនចេញពីអាមេអនុវត្តនយោបាយជ្រុលនិយមៗ»។

ជាមួយគ្នានេះ សម្ដេចតេជោ ហ៊ុន សែន ក៏បានបន្តអំពាវនាវដល់ប្រជាពលរដ្ឋខ្មែរ រស់នៅក្រៅប្រទេស អញ្ជើញមកលេងស្រុកកំណើតរបស់ខ្លួន ដោយកុំព្រួយបារម្ភអំពីបញ្ហាអ្វីឡើយ ទោះបីជាធ្លាប់ជេររាជរដ្ឋាភិបាល ក៏ដោយ។ សម្ដេចតេជោ ហ៊ុន សែន ក៏បានកត់សម្គាល់ឃើញថា ប្រជាពលរដ្ឋខ្មែរ រស់នៅក្រៅប្រទេសកាន់តែច្រើនឡើងៗ បានចូលរួមជីវភាពនយោបាយជាមួយគណបក្សប្រជាជនកម្ពុជា៕