​ស្ពានកាត់ទន្លេ និងផ្លូវ ៥០ C នៅកំពង់ឆ្នាំង​ចំណាយថវិកាប្រមាណ ២៥០ លានដុល្លារ នឹងបើកការដ្ឋាននាឆ្នាំក្រោយ​

លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបាន​គូស​បញ្ជាក់ថា គម្រោងសាង​សង់ស្ពានវែងជាងគេនៅកម្ពុជាឆ្លងកាត់ទន្លេសាប តភ្ជាប់ខេត្តកំពង់ឆ្នាំងទៅកំពង់ធំ ដែលត្រូវចំណាយថវិកាប្រមាណ ២៥០ ដុល្លារ នឹងបើកការដ្ឋានសាងសង់​នៅឆ្នាំ ២០២៤ ខណៈប្រមុខរាជរដ្ឋាភិបាលបានឯកភាពរួចហើយនិងប្ដេជ្ញារកថវិកាឱ្យបាន​។

​លោក ទេសរដ្ឋមន្ត្រី ស៊ុន ចាន់ថុល​ មានប្រសាសន៍ប្រាប់អ្នកសារព័ត៌មាន​អំឡុងពេលចុះពិនិត្យទីតាំង​សាង​​សង់កំពង់ផែ​ពហុបំណង និងមណ្ឌលភស្តុភារកម្មកំពង់ឆ្នាំងនៅថ្ងៃទី ៩ ខែមីនា ឆ្នាំ ២០២៣នេះថា សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានឯកភាពឆ្នាំ ២០២៤ រកថវិកាឱ្យបានបើកការដ្ឋានសាងសង់ស្ពានកំពង់ឆ្នាំង-កំពង់ធំ និងផ្លូវ ៥០ C។

លោកទេសរដ្ឋមន្ត្រីបញ្ជាក់ថា ផ្លូវ ៥០C មានសក្តានុព​ល​លើការ​ដឹកជញ្ជូន​បានលឿន​ពី​ខេត្តព្រះវិហារ ខេត្តកំពង់ធំ កាត់​មក​កំពង់ឆ្នាំង។​

ផ្លូវ ៥០C មានប្រវែង ៥៨ គីឡូម៉ែត្រ និងស្ពាន ៣ ៣០០ ម៉ែត្រ ដែលចំណាយថវិកាប្រមាណ ២៥០ លានដុល្លារ។ ក្នុងនោះបែងចែកផ្លូវ ១៥០ លានដុល្លារ និងស្ពាន ១០០ លានដុល្លារ៕