ព័ត៌មានជាតិ

អាជ្ញាធរជាតិអប្សរា ភ្ជាប់ភ្លុកដំរីចំនួនមួយទៅក្បាលដំរីនៅជ្រុងអាគ្នេយ៍ នៃខ្លោងទ្វារតាកាវ

បានផុស

១ year មុន

នៅ

ថ្ងៃពុធ ២២ មីនា ២០២៣

ដោយ

ក្រុមការងារបច្ចេកទេសជួសជុល និងអភិរក្សថ្ម នៃអាជ្ញាធរជាតិអប្សរា បានតភ្ជាប់ភ្លុកដំរីចំនួនមួយទៅក្បាលដំរីកណ្ដាលផ្នែកខាងស្ដាំរបស់ដំរីក្បាលបីនៅជ្រុងអាគ្នេយ៍ នៃខ្លោងទ្វារតាកាវ។ ការភ្ជាប់នេះ បានធ្វើឡើងបន្ទាប់ពីក្រុមការងារធ្វើកំណាយរកឃើញភ្លុកដំរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មុំ សុផុន មន្ត្រីបច្ចេកទេសជួសជុល និងអភិរក្សថ្ម បានលើកឡើងថា ក្រុមការងារបានកំណាយសម្អាតកំណកដីនៅបរិវេណជុំវិញខ្លោងទ្វារតាកាវ បានរកឃើញបំណែកភ្លុកដំរីចំនួន ២ គឺ ទី១-ស្ថិតនៅជ្រុងដំរីក្បាលទិសអាគ្នេយ៍ និងទី២-បានឃើញនៅជ្រុងដំរីក្បាលបីទិសនិរតី។

ក្នុងចំណោមភ្លុកដំរីទាំង ២ មានតែមួយប៉ុណ្ណោះដែលមានរូបរាងពេញលេញ និងរកឃើញទីតាំងដើម គឺនៅក្បាលដំរីកណ្ដាលផ្នែកខាងស្ដាំ ជ្រុងអាគ្នេយ៍របស់ខ្លោងទ្វារ ដែលមានបណ្ដោយ ០.៤៤ សង់ទីម៉ែត្រ ទទឹង ០.២៣ សង់ទីម៉ែត្រ កម្រាស់ ០.២០ សង់ទីម៉ែត្រ។ ចំណែកបំណែកភ្លុកដំរីទី ២ បាក់ផ្នែកកណ្ដាល មិនមានរូបរាងពេញអាចសម្គាល់ថានៅទីតាំងណាមួយ នៃដំរីក្បាលបីទាំងនោះបានឡើយ។

មន្ត្រីបច្ចេកទេសរូបនេះ បានឲ្យដឹងទៀតថា ការតភ្ជាប់បំណែកភ្លុកដំរីទៅទីតាំងដើម គឺក្នុងគោលបំណង ដើម្បីបង្ហាញឲ្យសាធារណជន ភ្ញៀវទេសចរជាតិ-អន្តរជាតិ បានឃើញនូវរូបរាងពេញលេញរបស់ដំរីដែលដូនតាខ្មែរយើងបានឆ្លាក់ គឺមានភ្លុកក្នុងទម្រង់បែបណា និងជាពិសេសលើកតម្លៃប្រវត្តិសិល្បៈ ដែលដូនតាបានបន្សល់ទុកឲ្យ គឺមិនបាត់សាបសូន្យទាំងស្រុងនោះទេ។

ក្នុងនាមជាអ្នកជួសជុល និងអភិរក្សថ្មមួយរូប លោក មុំ សុផុន គិតថា នេះជាការល្អណាស់ដែលភ្លុកដំរីដែលបានបាក់កប់ទៅក្នុងដីជាយូរឆ្នាំមកហើយ ត្រូវបានរកឃើញមកវិញ។ មិនត្រឹមតែប៉ុណ្ណោះ យើងក៏បានរកឃើញទីតាំងដើមវិញ ហើយសាធារណជនអាចមកទស្សនាស្វែងយល់បាន នៅខ្លោងទ្វារតាកាវជ្រុងអាគ្នេយ៍ ព្រោះចម្លាក់ដំរីក្បាលបីដែលមានភ្លុកពេញលេញ កម្រឃើញមាននៅសេសសល់តាមខ្លោងទ្វារចេញចូលក្រុងអង្គរធំទាំង ៥៕

អត្ថបទ ៖ កុសល