សង្ក្រាន្តខេត្តស្វាយរៀងរៀបចំដាក់តាំងសម្ភារជាង ៧០ ភាគរយរំពឹងអ្នកចូលរួមជាង ៥០ ម៉ឺននាក់

រដ្ឋបាលខេត្តស្វាយរៀង សហការជាមួយសហសហភាព​សហព័ន្ធ​យុវជនកម្ពុជា​ខេត្ត​ស្វាយរៀងបានរៀបចំដាក់តាំងសម្ភារសម្រាប់ សង្ក្រានស្វាយរៀងប្រមាណ ៧០ ភាគរយ។

សង្ក្រាន្តស្វាយរៀងឆ្នាំនេះ រៀបចំឡើងក្រោមប្រធានបទ «ជួបជុំរីករាយ បញ្ចេញស្នាមញញឹម ក្រោមដំបូលសន្តិភាព» ដែលមានរយៈពេល ៣ ថ្ងៃចាប់ពីថ្ងៃទី ១៤ ដល់ថ្ងៃទី ១៦ ខែមេសា។

លោក តូច ប៉ូលីវ៉ា អភិបាលរងខេត្តស្វាយរៀង មានប្រសាសន៍ថា​ ការរៀបចំព្រឹត្តិការណ៍សង្ក្រាន្តខេត្តស្វាយរៀង បង្ហាញវប្បធម៌ និងផ្ទាំងទស្សនីយភាពមួយចំនួន ទាំងវប្បធម៌ ប្រពៃណីយបែបសម័យ បុរាណ និងល្បែងប្រជាប្រិយ៍ដែលមិនសូវបានឃើញ យើងធ្វើឱ្យឃើញឡើងវិញទាំងអស់​ដើម្បីបញ្ជាក់ពីអ្វី​ដែលដូនតាខ្មែរមាន។

បើតាមការឱ្យដឹងរបស់រដ្ឋបាលខេត្តស្វាយរៀង ព្រឹត្តិការណ៍នេះ នៅតាមទីតាំងមួយចំនួនក្នុងក្រុងស្វាយរៀងមានកម្មវិធីកម្សាន្តជាច្រើនដូចជា ការលេងល្បែងប្រជាប្រិយ កម្មវិធីប្រគុំតន្ត្រីខ្នាតធំ ការបាញ់ទឹក កម្មវិធីរត់ប្រណាំង ប្រណាំងកង់ និងកម្មវិធីជាច្រើនមួយចំនួនទៀត។ ព្រឹត្តិការណ៍សង្ក្រាន្តខេត្តស្វាយរៀងឆ្នាំនេះ រំពឹងអ្នកចូលរួមជាង ៥០ ម៉ឺននាក់៕