ព័ត៌មានជាតិ

សង្ក្រាន្តក្រុងដូនកែវឆ្នាំនេះ មានអ្នកមកកម្សាន្តសប្បាយជាង ៩ ម៉ឺននាក់

បានផុស

៣ years មុន

នៅ

ថ្ងៃចន្ទ ១៧ មេសា ២០២៣

ដោយ

សង្ក្រាន្តក្រុងដូនកែវ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ រយៈពេល ៣ ថ្ងៃ មានអ្នកចូលរួមជាតិ និងអន្តរជាតិ ជាង ៩ ម៉ឺននាក់។ នេះបើយោងតាមរបាយការណ៍របស់អាជ្ញាធរខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរខេត្តតាកែវ បានឲ្យដឹងនៅព្រឹកថ្ងៃទី ១៧ ខែមេសា ឆ្នាំ ២០២៣ នេះថា សង្ក្រាន្តក្រុងដូនកែវ បានដំណើរការរយៈពេល ៣ ថ្ងៃ ចាប់ពីថ្ងៃទី ១៤ ខែមេសា ឆ្នាំ ២០២៣ រហូតដល់ថ្ងៃទី ១៦ ខែមេសា ឆ្នាំ ២០២៣ ដោយមានអ្នកចូលរួមកម្សាន្តសប្បាយជាតិ និងអន្តរជាតិ សរុបទាំង ៣ ថ្ងៃ ប្រមាណជាង ៩ ម៉ឺននាក់។

អាជ្ញាធរខេត្តបានបញ្ជាក់ថា ថ្វីបើមានការចូលរួមកម្សាន្តសប្បាយពីសំណាក់ភ្ញៀវជាតិ និងអន្តរជាតិ នាឱកាសបុណ្យចូលឆ្នាំថ្មី ក្នុងក្រុងដូនកែវ យ៉ាងច្រើនកុះករយ៉ាងនេះក្តី សន្តិសុខ សណ្ដាប់ធ្នាប់ ត្រូវបានយកចិត្តទុកដាក់មើលការខុសត្រូវ និងមិនមានបាតុភាពអសន្តិសុខណាមួយបង្កដល់អ្នកមកចូលរួមកម្សាន្តសប្បាយនោះទេ។

ជាមួយនឹងការរៀបចំ តុបតែង លំអក្រុងដូនកែវ ជាពិសេសសណ្ដាប់ធ្នាប់សាធារណៈបានយ៉ាងល្អ ធ្វើឲ្យប្រជាពលរដ្ឋដែលមកកម្សាន្តសប្បាយបានរីករាយសាទរដល់ថ្នាក់ដឹកនាំខេត្ត ដែលមានលោក អ៊ូច ភា អភិបាលខេត្តតាកែវ លោក កង អាណាន់ អភិបាលក្រុង ជាពិសេសសមត្ថកិច្ចប្រដាប់អាវុធ មានលោកឧត្ដមសេនីយ៍ទោ ឈាង ផាន់ណារ៉ា ស្នងការនគរបាលខេត្ត និងលោកឧត្ដមសេនីយ៍ត្រី សេង មហា មេបញ្ជាការកងរាជអាវុធហត្ថតាកែវ ដែលបានសម្រួលសន្តិសុខសណ្ដាប់ធ្នាប់បានយ៉ាងល្អរយៈពេល ៣ ថ្ងៃ នៃថ្ងៃចូលឆ្នាំថ្មីប្រពៃណីជាតិ៕

អត្ថបទ ៖ វីរៈ