លោក ស៊ុយ សែម និងលោក កែវ រតនៈ ត្រូវបានប្រកាសជាបេក្ខជនឈរឈ្មោះមណ្ឌលពោធិ៍សាត់

លោក ស៊ុយ សែម ដែលកំពុងកាន់ជារដ្ឋមន្ត្រីក្រសួងរ៉ែ និងថាមពល ត្រូវបានគណបក្សប្រជាជនកម្ពុជា តែងតាំងជាបេក្ខជនពេញសិទ្ធិលេខរៀងទី១ ប្រចាំមណ្ឌលពោធិ៍សាត់ ខណៈអគ្គនាយកអគ្គិសនីកម្ពុជា លោក កែវ រតនៈ ឈរនៅលេខរៀងទី២ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ នាពេលខាងមុខ។

គណៈអចិន្ត្រៃយ៍គណបក្សប្រជាជនកម្ពុជា បានសម្រេចតែងតាំងបេក្ខជនឈរឈ្មោះបោះឆ្នោតមណ្ឌលខេត្តពោធិ៍សាត់ចំនួន៨រូប ក្នុងនោះ បេក្ខជនពេញសិទ្ធិ៤រូប និងបេក្ខជនបម្រុង៤រូប។ បេក្ខជនពេញសិទ្ធិទាំង៤រូបនេះ រួមមាន ទី១) លោក ស៊ុយ សែម រដ្ឋមន្ត្រីក្រសួងរ៉ែ និងថាមពល ទី២) លោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា ទី៣) លោក ទី ថានី ដែលជាសមាជិករដ្ឋសភាក្នុងនីតិកាលទី៦ និងទី៤) លោក កែវ វីរៈ ដែលកំពុងកាន់ជាអគ្គនាយករងអគ្គិសនីកម្ពុជា។

ដោយឡែក លោក រូហ្វី អូស្មាន លោក សារី កោសល្យ និងលោកស្រី ឯម ប៉ុណ្ណា ដែលជាសមាជិករដ្ឋសភា និងជាតំណាងរាស្ត្រមណ្ឌលខេត្តពោធិ៍សាត់ក្នុងពេលបច្ចប្បន្ន គឺត្រូវបានតែងតាំងជាបេក្ខជនបម្រុងលេខរៀងទី១ ទី២ ទី៣ ខណៈលោក ចេង ឡៃ បច្ចុប្បន្នជាអភិបាលរងខេត្តពោធិ៍សាត់ ឈរជាបេក្ខជនបម្រុងលេខរៀងក្រោមគេ។

លោក ស៊ុយ សែម ប្រធានក្រុមការងារចុះមូលដ្ឋានខេត្តពោធិ៍សាត់ និងជាបេក្ខជនតំណាងរាស្ត្ររបស់គណបក្សប្រជាជនកម្ពុជា បានអំពាវនាវដល់ក្រុមការងារគណបក្សបក្សប្រជាជនកម្ពុជាខេត្តពោធិ៍សាត់ ត្រូវអនុវត្តតាមប្រតិទិនរបស់ គ.ជ.ប ដែលបានកំណត់ក្នុងចូលរួមប្រកួតប្រជែងសម្រាប់ការបោះឆ្នោតនាពេលខាងមុខ។ ជាមួយគ្នានេះ លោក ក៏បានជំរុញឲ្យក្រុមការងារទាំងអស់ត្រៀមរៀបចំបើកយុទ្ធនាការឃោសនាបោះឆ្នោត ឲ្យស្របតាមស្ថានភាពជាក់ស្តែងរបស់ភូមិសាស្ត្រមូលដ្ឋាននីមួយៗ ខណៈយុទ្ធនាការឃោសនាបោះឆ្នោត គឺមានតែ២១ថ្ងៃប៉ុណ្ណោះ ដូច្នេះបេក្ខជនត្រូវធ្វើសកម្មភាពព្រមៗគ្នានៅគ្រប់មូលដ្ឋាន៕

ដោយ៖ ធឿន វ៉ាន់សុង