ម្ដាយ រដ្ឋមន្ត្រីក្រសួងអប់រំ ទទួលមរណភាព ក្នុងជន្មាយុ ៨៦ ឆ្នាំ

មហាឧបាសិកាពុទ្ធសាសនូបត្ថម្ភក៍ ម៉ន សាអ៊ុន ត្រូវជាម្តាយបង្កើត ឯកឧត្តមបណ្ឌិត សភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានទទួលមរណភាព។

ក្រសួងអប់រំ យុវជន និងកីឡា បានជូនដំណឹងដល់ មន្ត្រីរាជការ ព្រមទាំងញាតិមិត្តជិតឆ្ងាយទាំងអស់ជ្រាបថា បណ្ឌិត សភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោកស្រី ប៉ែន វិមល ព្រមទាំងបុត្រ មានទុក្ខជាទម្ងន់ ដោយ មហាឧបាសិកាពុទ្ធសាសនូបត្ថម្ភក៍ ម៉ន សាអ៊ុន ត្រូវជាម្តាយបង្កើត ម្តាយក្មេក និង ជាជីដូន បានទទួលមរណភាព នៅថ្ងៃទី២៤ ខែមេសា ឆ្នាំ២០២៣ វេលាម៉ោង ១៨:៥៥ នាទី ក្នុងជន្មាយុ ៨៦ ឆ្នាំ ដោយជរាពាធ។

ទន្ទឹមពេលមានសាររំលែកទុក្ខជាច្រើនពីបណ្ដាមន្ត្រីរាជការ ញាតិមិត្ត និងសាធារណជន បណ្ឌិត ហង់ជួន ណារ៉ុន ផ្ញើសារថ្លែងអំណរគុណវិញថា៖ “ខ្ញុំ ភរិយាខ្ញុំ និងក្រុមគ្រួសារសូមថ្លែងអំណរគុណដល់ឯកឧត្តម និងលោកជំទាវ លោក លោកស្រីទាំងអស់ ដែលចូលរួមរំលែកទុក្ខជាមួយរូបខ្ញុំ និងក្រុមគ្រួសារ។ ខ្ញុំសូមបួងសួងសូមអោយវត្ថុស័ក្តិសិទ្ធិតាមបីបាច់ និងអភិបាលឯកឧត្តម លោកជំទាវ លោក លោកស្រី និងក្រុមគ្រួសារ សូមជួបតែសេចក្តីសុខ និងមានជោគជ័យក្នុងគ្រប់ភារកិច្ច”។

គួរបញ្ជាក់ថា សពមហាឧបាសិកាពុទ្ធសាសនូបត្ថម្ភក៍ ម៉ន សាអ៊ុន កំពុងតម្កល់ធ្វើបុណ្យតាមប្រពៃណី ព្រះពុទ្ធសាសនា ស្ថិតនៅផ្ទះលេខ P27 ផ្លូវ០៥ បុរីពិភពថ្មី២ (ទួលក្រសាំង) ក្រុងតាខ្មៅ ខេត្តកណ្តាល។ ដំណឹងនេះចាត់ទុកជាការជូនជ្រាបជាព័ត៌មាន និងគោរពអញ្ជើញ ញាតិមិត្តជិតឆ្ងាយទាំងអស់ ដើម្បីចូលរួមពិធីបុណ្យសព ដូចបានគោរពជម្រាបជូនខាងលើ។