ព័ត៌មានជាតិ

រដ្ឋមន្ត្រីកសិកម្ម ស្នើ ឆេក វិនិយោគនៅកម្ពុជា កែច្នៃនាំចេញផលិតផលខ្មែរមានសក្ដានុពលទៅកាន់ ទីផ្សារឆេក

បានផុស

៣ years មុន

នៅ

ថ្ងៃសុក្រ ១២ ឧសភា ២០២៣

ដោយ

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានស្នើសុំភាគីឆេក ធ្វើការពិនិត្យលទ្ធភាពវិនិយោគនៅកម្ពុជា ដើម្បីធ្វើការកែច្នៃនាំចេញផលិតផលកសិកម្មខ្មែរដូចជា ផលិតផលវារីវប្បកម្ម និងផលិតផលផ្សេងទៀតដែលមានសក្ដានុពលទៅកាន់ទីផ្សារប្រទេសឆេក។

ការស្នើសុំនេះបានធ្វើឡើងកាលពីថ្ងៃទី ១១ ខែឧសភា ក្នុងឱកាសលោករដ្ឋមន្ត្រីបានទទួលជួបពិភាក្សាការងារជាមួយគណៈប្រតិភូក្រសួងការបរទេស នៃសាធារណរដ្ឋឆេក នៅទីស្ដីការក្រសួង។

លោករដ្ឋមន្ត្រីបានបញ្ជាក់ប្រាប់គណៈប្រតិភូឆេកថា ក្រសួងកំពុងត្រូវការដៃគូវិនិយោគបន្ថែមទៀតក្នុងការជំរុញការនាំចេញផលិតផលកសិកម្ម ដើម្បីចូលរួមឆ្លើយតបនឹងបញ្ហាសន្តិសុខ និងសុវត្ថិភាពស្បៀងសាកលលោក។ ព្រោះថា ជាគោលនយោបាយ ក្រសួងផ្ដោតអាទិភាពលើផលិតផលកសិកម្មដែលមានតម្លៃបន្ថែមខ្ពស់ និងជំរុញការផលិតផលិតផលមានគុណភាព និងតម្លៃបន្ថែមខ្ពស់ មានប្រសិទ្ធភាពសេដ្ឋកិច្ច និងគិតគូរដល់និរន្តរភាពបរិស្ថាន Eco-Friendly។

នៅក្នុងឱកាសនោះដែរ លោករដ្ឋមន្ត្រី ក៏បានស្នើឲ្យភាគីឆេកជួយបញ្ជូនគ្រូបណ្ដុះបណ្ដាលមកកម្ពុជាផ្ទាល់ ឬតាមរយៈកម្មវិធីផ្លាស់ប្ដូរបទពិសោធន៍ វគ្គបណ្ដុះបណ្ដាលខ្លី ដើម្បីផ្ដល់ និងពង្រឹងសមត្ថភាព និងជំនាញពិតប្រាកដដល់មន្ត្រីកសិកម្មកម្ពុជា ដើម្បីចូលរួមចំណែកក្នុងការអភិវឌ្ឍវិស័យកសិកម្មកម្ពុជាឲ្យកាន់តែរីកចម្រើនថែមទៀត៕

អត្ថបទ ៖ សំអឿន