ព័ត៌មានជាតិ
លម្អិតបន្ថែមពីការសាងសង់ស្ពានឆ្លងទន្លេមេគង្គភ្ជាប់ទៅគម្រោងផ្លូវល្បឿនលឿនទៅបាវិត
រដ្ឋាភិបាលនឹងបញ្ចេញថវិកាជាតិសាងសង់ស្ពានឆ្លងទន្លេមេគង្គនៅឃុំដីឥដ្ឋ ដើម្បីតភ្ជាប់ជាមួយគម្រោងផ្លូវល្បឿនលឿន ក៏ដូចជាតភ្ជាប់ទៅតំបន់ត្រើយខាងកើតទន្លេមេគង្គនៅស្រុកល្វាឯមខេត្តកណ្តាល។
នៅក្នុងពិធីចុះហត្ថលេខាលើកិច្ចសន្យាភាពជាដៃគូ រវាងរដ្ឋ និងឯកជនលើគម្រោងសាងសង់ផ្លូវល្បឿនលឿនភ្នំពេញ-បាវិត កាលពីម្សិលមិញនេះ លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានឲ្យដឹងថា ខណៈគម្រោងសាងសង់ផ្លូវល្បឿនលឿនភ្នំពេញបាវិតនឹងបើកការដ្ឋានសាងសង់នៅថ្ងៃ ០៧ មិថុនាខាងមុខនេះ ក៏នឹងមានការសាងសង់ស្ពានដ៏វែងឆ្លងទន្លេមេគង្គនៅដីឥដ្ឋស្រុកកៀនស្វាយ ដើម្បីតភ្ជាប់ជាមួយគម្រោងផ្លូវល្បឿនលឿនពីភ្នំពេញទៅបាវិត។
ស្ពានឆ្លងកាត់ទន្លេមេគង្គដែលរដ្ឋាភិបាលនឹងបញ្ចេញថវិកាជាតិសាងសង់មានប្រវែង ២២៥០ ម៉ែត្រ ទទឹង ២៦ ម៉ែត្រ ដែលនឹងត្រូវចំណាយជាង ២០០ លានដុល្លារអាមេរិក។
លោករដ្ឋមន្រ្តីបានបញ្ជាក់ថា ការប្រើប្រាស់ថវិកាជាតិសាងសង់ដើម្បីបញ្ចៀសការចំណាយរបស់ពលរដ្ឋ បើឲ្យឯកជនសាងសង់ស្ពានរួមទាំងផ្លូវ ក្រុមហ៊ុននឹងត្រូវគិតប្រាក់បន្ថែមលើការឆ្លងស្ពានទៅមក។
«ពលរដ្ឋខ្លះអត់ប្រើផ្លូវល្បឿនលឿនទេ គ្រាន់តែឆ្លងទៅត្រើយខាងកើតឬធ្វើដំណើរជុំវិញខ្សែក្រវាត់ក្រុងប៉ុណ្ណោះ ដូច្នេះក្រសួងសេដ្ឋកិច្ចតាមរយៈឯកឧត្តមឧបនាយករដ្ឋមន្រ្តី អូន ព័ន្ធមុនីរ័ត្ន ស្នើទៅប្រមុខរដ្ឋាភិបាលគួរយកថវិកាជាតិមកសាងសង់ស្ពានដើម្បីពលរដ្ឋប្រើប្រាស់ដោយឥតគិតថ្លៃ»។
ផ្លូវល្បឿនលឿន ភ្នំពេញ-បាវិត នឹងត្រូវសាងសង់ស្ពានមួយកន្លែងមានទីតាំងនៅឃុំដីឥដ្ឋ ស្រុកកៀនស្វាយ ឆ្លងកាត់ទន្លេមេគង្គ ឆ្ពោះទៅតំបន់ល្វាឯមខេត្ដកណ្ដាលក្បែរនឹងផ្លូវក្រវាត់ក្រុងទី៣ និងផ្លូវល្បឿនលឿនទៅបាវិត។
បើតាមលោក ស៊ុន ចាន់ថុល បច្ចុប្បន្នពលរដ្ឋនៅតំបន់នោះត្រូវឆ្លងទូកដទៅមកដែលត្រូវចំណាយជាប្រចាំ។ ដើម្បីសម្រួលការចំណាយ ទើបរដ្ឋាភិបាលទម្លាក់ថវិកាជាតិសាងសង់ស្ពានដើម្បីភ្ជាប់ជាមួយគម្រោងផ្លូវល្បឿនលឿន ក៏ដូចជាតភ្ជាប់ជាមួយផ្លូវក្រវាត់ក្រុងផង និងអាចឲ្យពលរដ្ឋនៅត្រើយខាងកើតទន្លេអាចធ្វើដំណើរឆ្លងកាត់ស្ពានដោយឥតគិតថ្លៃផងដែរ។
កាលពីម្សិលមិញនេះ មានការចុះហត្ថលេខាដែលមានលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន តំណាងរាជរដ្ឋាភិបាលកម្ពុជា ជាមួយតំណាងក្រុមហ៊ុនសាជីវកម្មថ្នល់ និងស្ពានចិន (CRBC) លើគម្រោងហេដ្ឋារចនាសម្ព័ន្ធផ្លូវល្បឿនលឿនភ្នំពេញ-ក្រុងបាវិត ក្រោមកិច្ចសន្យាភាពជាដៃគូរវាងរដ្ឋនិងឯកជន (Public Private Partnership)។
ផ្លូវល្បឿនលឿនភ្នំពេញបាវិត ដែលគ្រោងបើកការដ្ឋានសាងសង់នៅថ្ងៃ ០៧ មិថុនា ខាងមុខនេះមានប្រវែង ១៣៥,១០ គីឡូម៉ែត្រ ដែលប្រើទុនវិនិយោគប្រមាណ ១,៣៥ ពាន់លានដុល្លារអាមេរិក ដោយប្រើប្រាស់រយៈពេលសាងសង់ ០៤ឆ្នាំ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ (Build-Operate-Transfer)។ ក្រុមហ៊ុននឹងធ្វើប្រត្តិបត្តិការរយៈពេល ៥០ ឆ្នាំ មុនពេលផ្ទេរជូនរាជរដ្ឋាភិបាល។
ក្នុងគម្រោងនេះក៏នឹងមានការសាងសង់ស្ពានឆ្លងកាត់ទន្លេមេគង្គ ហើយរដ្ឋាភិបាលបានផ្ដល់កិច្ចសន្យាសាងសង់ទៅឲ្យក្រុមហ៊ុន CRBC ដែលគ្រោងនឹងបញ្ចប់ឱ្យបានរួចរាល់មុនឬដំណាលគ្នាទៅនឹងការបើកដំណើរការផ្លូវល្បឿនលឿនភ្នំពេញ-បាវិត។
ផ្លូវល្បឿនលឿនភ្នំពេញ-ក្រុងបាវិត ក៏សាងសង់តភ្ជាប់ជាមួយគម្រោងផ្លូវល្បឿនលឿនហូជីមិញ-ម៉ុកបៃ របស់ប្រទេសវៀតណាមដែលរំពឹងថានឹងរួចរាល់ក្នុងពេលដំណាលគ្នា៕
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ