​ទីលានចាក់សំរាមខេត្តកំពត​ចំណាយថវិកាជាង ៣ លានដុល្លារដាក់ឱ្យប្រើប្រាស់ជាផ្លូវការ​

ទីលានទុកដាក់សំរាមនៅក្រុងកំពត ខេត្តកំពតមានផ្ទៃដីជាង ១០ ហិកតា ត្រូវបានដាក់សម្ពោធ​ឱ្យប្រើប្រាស់ជាផ្លូវការនៅថ្ងៃទី ៣០ ខែឧសភា ឆ្នាំ ២០២៣ ក្រោមវត្តមានលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

​គម្រោងសាងសង់ទីលានចាក់សំរាម ក្រុងកំពត ជាផ្នែកមួយនៃគម្រោងអភិវឌ្ឍន៍ក្រុងរបៀង២ របស់រាជរដ្ឋាភិបាលក្រោមកម្ចីរបស់ធនាគារអភិវឌ្ឍន៍អាស៊ី (ADB) ដែលមានថវិកាប្រមាណ ៣ លានដុល្លារ។

ទីលានទុកដាក់សំរាមមានពីរថត មានស្រះសម្អាតទឹកកខ្វក់ចេញពីសំរាមចំនួន២ ទីលានត្រងទឹកកខ្វក់ និងរំហួតទឹក អាគាររដ្ឋបាល និងប៉ុស្តិ៍យាម អណ្តូងទឹកសម្រាប់ត្រួតពិនិត្យគុណភាព ជួសជុលផ្លូវចូលទីលានកប់សំរាម កន្លែងថ្លឹងរថយន្ត កន្លែងស្តុក និងញែកសំរាម និងមានរបងព័ទ្ធជុំវិញ។ បច្ចុប្បន្ន ក្រុងកំពតត្រូវបានគេប្រមូលសំរាមបាន ចម្លោះពី៧០ ទៅ៩០តោនក្នុងមួយថ្ងៃ៕