សម្ដេចតេជោ ហ៊ុន សែន លើកទឹកចិត្តឲ្យចៅក្រមខិតខំឲ្យអស់លទ្ធភាព ដោះស្រាយសំណុំរឿងក្រៅប្រព័ន្ធតុលាការ​

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា​ បានលើកទឹកចិត្តឲ្យចៅក្រមប្រើប្រាស់ឲ្យអស់លទ្ធភាព ដើម្បីដោះស្រាយសំណុំរឿងក្រៅប្រព័ន្ធតុលាការជាជាងការកាត់ក្ដី ទៅលើសំណុំរឿងរដ្ឋប្បវេណី។

ការលើកទឹកចិត្តរបស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ “អគារសាលាយុត្ដិធម្ម” របស់ក្រសួងយុត្តិធម៌ នៅព្រឹកថ្ងៃទី ២៦ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «សុំលើកទឹកចិត្តឲ្យអស់លោកចៅក្រម អស់លោក-លោកស្រី ជាចៅក្រមទាំងអស់ ប្រើប្រាស់ឲ្យអស់លទ្ធភាពនូវការសម្របសម្រួល ជាជាងការកាត់ក្ដី រឿងនេះយើងអាចធ្វើបាននៅក្នុងគ្រប់សំណុំរឿង ទាក់ទងនឹងរដ្ឋប្បវេណី​ រឿងបញ្ហាព្រហ្មទណ្ឌវាជារឿងមួយផ្សេង ដែលចៅក្រមរបស់យើងពិបាក ហើយក៏អាចមិនមានលទ្ធភាពធ្វើទៅដែរ ព្រោះទាក់ទិននឹងបញ្ហាព្រហ្មទណ្ឌវាជារឿងមួយផ្សេង»។

សម្ដេចតេជោ ហ៊ុន សែន ក៏បានលើកឡើងដែរថា ក្រសួងយុត្តិធម៌ ដែលជាតំណាងឲ្យរាជរដ្ឋាភិបាល នៅក្នុងឧត្ដមក្រុមប្រឹក្សាចៅក្រម ចាំបាច់ណាស់ត្រូវតែគ្រប់គ្រងនយោបាយព្រហ្មទណ្ឌ ឲ្យបានរឹងមាំ ជាពិសេសសម្រាប់ប្រទេសកម្ពុជា ដែលពោរពេញដោយអំពើជ្រុលនិយមហួសហេតុ ដែលបន្តវត្តមាននៅកម្ពុជា៕