ចៅក្រម ឬព្រះរាជអាជ្ញាម្នាក់ អាចចាត់ការសំណុំរឿងបានប្រមាណ ៣០០សំណុំរឿងក្នុងមួយឆ្នាំៗ

រដ្ឋមន្ត្រីក្រសួងយុត្តិធម៌ បានឲ្យដឹងថា ចៅក្រម ឬព្រះរាជអាជ្ញាម្នាក់ អាចចាត់ការសំណុំរឿងបានប្រមាណ ៣០០សំណុំរឿងក្នុងមួយឆ្នាំៗ ដែលនេះគឺជាចំនួនច្រើនមួយ។

ការឲ្យដឹងនេះ បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ “អគារសាលាយុត្ដិធម្ម” របស់ក្រសួងយុត្តិធម៌ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីព្រឹកថ្ងៃទី ២៦ ខែមិថុនា ឆ្នាំ ២០២៣នេះ។

នៅក្នុងឱកាសពិធីនេះ លោក កើត រិទ្ធ រដ្ឋមន្ត្រីក្រសួងយុត្តិធម៌ បានឲ្យដឹងថា នៅក្នុងឆ្នាំ ២០​២២​កន្លងទៅនេះ សាលាដំបូង និងអយ្យការអមសាលាដំបូងរាជធានីភ្នំពេញ បានចាត់ការសំណុំរឿងបានប្រមាណ ២២,០០០សំណុំរឿង ដែលស្មើនឹងប្រមាណ ៦៦ភាគរយ នៃសំណុំរឿងសរុបប្រមាណ ៣៣,០០០សំណុំរឿង។

ចំណែកសាលាឧទ្ធរណ៍ និងមហាអយ្យការអមសាលាឧទ្ធរណ៍ភ្នំពេញ បានចាត់ការសំណុំរឿងបានប្រមាណ ៣,៥៣៩សំណុំរឿង ស្មើនឹង ៥៥ភាគរយ នៃសំណុំរឿងសរុប ៦,៥៤៣សំណុំរឿង។

លោកថា លទ្ធផលបែបនេះ បានបង្ហាញឲ្យឃើញថា បើទោះបីជាធនធានមនុស្សក្នុងវិស័យ​យុត្តិធម៌ ជាពិសេសចំនួនចៅក្រម មានព្រះរាជអាជ្ញានូវមានចំនួនខ្វះខាតនៅឡើយក៏ពិតមែន តែចៅក្រម និងព្រះរាជអាជ្ញាទាំងអស់ បានខិតខំប្រឹងប្រែងដោះស្រាយសំណុំរឿងក្ដីនានា ជូនប្រជាពលរដ្ឋប្រកបដោយការទទួលខុសត្រូវ។

លោក កើត រិទ្ធ បញ្ជាក់បែបនេះថា «ដោយចៅក្រម ឬព្រះរាជអាជ្ញាម្នាក់ៗ អាចចាត់ការសំណុំរឿងបានរហូតដល់ទៅប្រមាណ ៣០០សំណុំរឿងក្នុងមួយឆ្នាំៗ ដែលជាចំនួនដ៏ច្រើន»។

បើតាមលោករដ្ឋមន្ត្រីក្រសួងយុត្តិធម៌ ផ្អែកលើលទ្ធផលនៃការចំណាត់ការ​សំណុំរឿងខាងលើ គឺចំនួនសំណុំរឿងប្រចាំឆ្នាំ ដែលនៅសល់មិនទាន់ចាត់ការរួច និងសំណុំរឿងចូលថ្មី នៅតែបន្តកើនឡើងជាមធ្យមក្នុងកម្រិត ៧ភាគរយ ទៅ ១៤ភាគរយក្នុងមួយឆ្នាំៗ។

លោក កើត រិទ្ធ បានបញ្ជាក់ទៀតថា ចំណុចនេះ បានធ្វើឲ្យតុលាការតែងតែជួបប្រទះនូវការកកស្ទះសំណុំរឿង ដែលត្រូវប្រឈមដោះស្រាយជាប់ជាប្រចាំ ហើយសាលាជំរះក្ដីនីមួយៗ ត្រូវបន្តខិតខំអនុវត្តការងារបន្ថែមទៀត ក្នុងការជំរុញការដោះស្រាយសំណុំរឿងឲ្យបានឆាប់៕

អត្ថបទ៖ សួស សិត