សម្ដេច ស ខេង លើកឡើងជាថ្មីថា ការប្រយុទ្ធប្រឆាំងគ្រឿងញៀន មិនអាចមានប្រទេសណាមួយធ្វើតែឯកឯងបាននោះទេ

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងជាថ្មីថា គ្មានប្រទេសណាមួយ អាចប្រយុទ្ធប្រឆាំងគ្រឿងញៀនតែឯកឯងបាននោះទេ ដោយត្រូវមានកិច្ចសហការជាមួយប្រទេសនានា ជាពិសេសប្រទេសមានព្រំដែនជាប់គ្នា។

ការលើកឡើងជាថ្មីនេះ គ្រាដែលសម្ដេចក្រឡាហោម ស ខេង អញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវការមជ្ឈមណ្ឌលបន្សាបព្យាបាល និងស្ដារនីតិសម្បទាអ្នកញៀនគ្រឿងញៀន ស្ថិតនៅភូមិស្ដៅ ឃុំស្ដៅ ស្រុករតនមណ្ឌល ខេត្តបាត់ដំបង នាព្រឹកថ្ងៃទី ២ ខែសីហា ឆ្នាំ ២០២៣នេះ។

សម្ដេចក្រឡាហោម ស ខេង មាន​ប្រសាសន៍ថា កម្មវិធីនយោបាយរបស់រាជរដ្ឋាភិបាល បានយកចិត្តទុកដាក់ជាខ្លាំងទៅលើការប្រយុទ្ធប្រឆាំងគ្រឿងញៀន ដោយរយៈពេល ៥ឆ្នាំចុងក្រោយនេះ អាជ្ញាធរមានសមត្ថកិច្ចពាក់ព័ន្ធ បានបង្ក្រាបរឹបអូសនូវសារធាតុញៀនរាប់រយតោន។

សម្ដេចរដ្ឋមន្ត្រីក្រសួងមហាផ្ទៃ បានឲ្យដឹងថា គ្រឿងញៀនបច្ចុប្បន្ននេះ គឺជាសារធាតុញៀនគួបផ្សំ ដោយអ្នកផលិត យកសារធាតុគីមីផ្សេងៗ លាយបញ្ចូលគ្នា ដែលមិនមែនជាសារធាតុញៀនយកចេញពីដើមអាភៀន នោះទេ។

សម្ដេច ស ខេង ឲ្យដឹងបែបនេះថា «ព្រោះសារធាតុញៀនសព្វថ្ងៃនេះ គឺជាសារធាតុញៀនគួបផ្សំសំយោ​គ បានន័យថា គេយកសារធាតុគីមីផ្សេងៗបូកបញ្ចូលគ្នា ផលិតជាគ្រឿងញៀន មិនមែនជាសារធាតុញៀន ដែលយកចេញពីជ័រដើមឈើធម្មជាតិហៅថា ដើមអាភៀននោះប៉ុន្មានដែរ មានដែរប៉ុនតិចតួចណាស់ ចឹងចំនួននេះវាមានចំនួនច្រើន ហើយបានធ្វើចរាចរណ៍ មិនមែនតែនៅកម្ពុជាយើងទេ នៅបណ្ដាប្រទេសនានាលើសកលលោកជាច្រើនៗ»។

សម្ដេចក្រឡាហោម ស ខេង បានបញ្ជាក់ទៀតថា ការប្រយុទ្ធប្រឆាំងគ្រឿងញៀន មិនអាចមានប្រទេសណាមួយ ធ្វើតែឯកឯងបាននោះទេ ចាំបាច់ត្រូវមានការកិច្ចសហប្រតិបត្តិការជាមួយបណ្ដាប្រទេសដទៃទៀតយ៉ាងម៉ឺងម៉ាត់ ជាពិសេសជាមួយបណ្ដាប្រទេសជាប់ព្រំដែន។ សម្រាប់កម្ពុជា ដែលមានព្រំដែនជាប់ជាមួយប្រទេសថៃ ឡាវ វៀតណាម ត្រូវតែសហការគ្នាប្រយុទ្ធប្រឆាំងគ្រឿងញៀន។

សម្ដេច ស ខេង បន្ថែមបែបនេះថា «ដូចជាកម្ពុជារបស់យើងជាប់ព្រំដែនជាមួយនឹងថៃ ជាប់ព្រំដែនជាមួយនឹងឡាវ ជាប់ព្រំដែនជាមួយនឹងវៀតណាម ចឹងទេ កិច្ចសហប្រតិបត្តិការរវាងប្រទេសជាប់ព្រំដែននេះ គឺពិតជាមានសារៈសំខាន់ជាគន្លឹះ ហើយក៏ផ្អែកទៅលើគោលការណ៍ជាអន្តរជាតិ ដែលអង្គការសហប្រជាជាតិបានដាក់ចេញ ព្រោះយើងជាសមាជិក កម្ពុជាជាសមាជិកនៃអង្គការសហប្រជាជាតិ អង្គការសហប្រជាជាតិ ក៏មានយន្តការមួយដើម្បីនឹងដឹកនាំចាត់ចែង សម្របសម្រួលការប្រយុទ្ធប្រឆាំងគ្រឿងញៀននេះ»៕