ស្ងាត់ៗ អតីតនាយករដ្ឋមន្ត្រីថៃ លោក ថាក់ ស៊ីន អញ្ជើញចូលរួមពិធីខួបកំណើត សម្ដេចតេជោ នាយករដ្ឋមន្ត្រី

អតីតនាយករដ្ឋមន្ត្រីថៃ លោក ថាក់ ស៊ីន ស៊ីណាវ៉ាត្រា និងអ្នកស្រី យ៉ីងឡាក់  បានអញ្ជើញចូលរួមក្នុងកម្មវិធី​ខួបកំណើត​របស់សម្ដេចតេជោ ហ៊ុន សែន ឈានចូលវ័យ៧២ឆ្នាំ កាលពីថ្ងៃទី ៥ ខែសីហា ឆ្នាំ ២០២៣។

ចំពោះវត្តមានរបស់ លោក ថាក់ ស៊ីន និងអ្នកស្រី យ៉ីង ឡាក់ ត្រូវបានបង្ហាញឱ្យដឹង ដោយសម្ដេចតេជោ ហ៊ុន សែន នៅក្នុងវីដេអូឃ្លីបខ្លីមួយតាមរយៈប្រព័ន្ធបណ្ដាញសង្គម Tiktok ផ្លូវការនាព្រឹកថ្ងៃទី០៦ខែ សីហានេះ។

ក្នុងខ្លឹមសារនៃវីដេអូរយៈពេលជាង១នាទី សម្ដេចតេជោ ហ៊ុន សែន មិនបានបញ្ជាក់ឱ្យចំថា លោក ថាក់ ស៊ីន ស៊ីណាវ៉ាត្រា និងលោក ស្រី យ៉ីងឡាក់ ឡើយ ដោយសម្ដេចគ្រាន់តែព្រលយខ្លឹមសារខ្លីថា “ឆ្នាំនេះ មានបងប្អូនធម៌​មកចូលរួមកម្មវិធីខួបកំណើតនៅគេហដ្ឋានសម្ដេចតេជោ” ។

បើទោះសម្ដេចតេជោ មិនបញ្ជាក់ឱ្យចំឈ្មោះថា ជាលោក ថាក់ ស៊ី​ន និងអ្នកស្រី យ៉ីងឡាក់ ស៊ីណាវ៉ាត្រា ចូលរួម​កម្មវិធីខួប​កំណើតសម្ដេច ក៏ប៉ុន្តែបើតាមវីដេអូឃ្លីបដែលសម្ដេចបានផ្សព្វផ្សាយនៅលើបណ្ដាញសង្គមតិកតុកនោះ គេអាចឃើញយ៉ាងច្បាស់ថា លោក ថាក់ស៊ីន និងអ្នកស្រីយ៉ីងឡាក់ ស៊ីណាវ៉ាត្រា ពិតជាមានវត្តមានក្នុងខួបកំណើត​សម្ដេចតេជោពិតប្រាកដមែន។

សូមរំឮកថា លោក ថាក់ស៊ីន ស៊ីណាវ៉ាត្រា បានជាប់ឆ្នោតធ្វើជានាយករដ្ឋមន្ត្រីថៃពេញមួយអាណត្តិ ចាប់ពីឆ្នាំ២០០១ ដល់ឆ្នាំ២០០៥។ ក្រោយជាប់ឆ្នោតអាណត្តិថ្មី លោកកាន់តំណែងបន្តបានមួយឆ្នាំ ពោលគឺ នៅខែកញ្ញាឆ្នាំ២០០៦ លោកថាក់ស៊ីន    ត្រូវបានទម្លាក់ចេញពីអំណាចក្នុងរដ្ឋប្រហារយោធា ហើយចាប់តាំងពីពេលនោះមក    លោកបាន​រស់នៅក្នុងលក្ខណៈនិរទេសខ្លួនអស់រយៈពេល ១៧ ឆ្នាំមកហើយ។ កំឡុងពេលរស់នៅក្រៅប្រទេស​រយៈពេល១៧ឆ្នាំ​មកនេះ លោកបានប្រកាសថា វិលចូលប្រទេស ហើយក៏ពន្យារពេលចូលប្រទេសថៃចំនួន២០ដងរួចមកហើយ។

ជាការកត់សម្គាល់ ថ្មីៗនេះ លោកថាក់ ស៊ីន បានប្រកាសថា នឹងវិលចូលប្រទេសថៃនៅថ្ងៃទី១០ខែសីហាខាងមុខនេះ ក៏ប៉ុន្តែកាលពីថ្ងៃទី៥ម្សិលមិញ លោក ក៏បានប្រកាសពន្យារពេលនៃការវិលចូលប្រទេសថៃក្រោមហេតុផលថា ខ្លួនលោក​ផ្ទាល់ត្រូវពិនិត្យសុខភាព៕

ដោយ៖ ង៉ិល ណារ៉ាត់