អ្វីទៅជាភាពចាំបាច់នៃការប្តូរឈ្មោះទៅជា “ក្រសួងអធិការកិច្ច”?

ក្រសួង​ទំនាក់​ទំនង​ជាមួយរដ្ឋសភា-ព្រឹទ្ធសភា និង​​​​​​​​​​អធិការកិច្ច ត្រូវបានបង្កើតឡើងក្នុងឆ្នាំ​១៩៩៩ បើគិតដល់ពេលនេះ មានរយៈពេលប្រមាណ ២៤ឆ្នាំមកហើយ។ ប៉ុន្តែ ក្នុងអាណត្តិទី៧នេះ រាជរដ្ឋាភិបាលកម្ពុជា បានសម្រេចកែសម្រួលឈ្មោះក្រសួងមួយនេះទៅជា «ក្រសួងអធិការកិច្ច»។ តើអ្វីទៅជាភាពចាំបាច់នៃការប្តូរឈ្មោះទៅជា«ក្រសួងអធិការកិច្ច»?

ក្នុងកិច្ចប្រជុំគណៈរដ្ឋមន្ត្រីជាលើកដំបូង កាលពីថ្ងៃទី២៤ ខែសីហា ឆ្នាំ២០២៣ ក្រោមការដឹកនាំដោយឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចឯកភាពលើសេចក្តីព្រាងច្បាប់ស្តីពីការបង្កើតក្រសួងអធិការកិច្ច ដែលជាការកែសម្រួលពីក្រសួងទំនាក់​ទំនង​ជាមួយរដ្ឋសភា-ព្រឹទ្ធសភា និង​​​​​​​​​​អធិការកិច្ច។

ការបង្កើតក្រសួង​ទំនាក់​ទំនង​ជាមួយរដ្ឋសភា-ព្រឹទ្ធសភា និង​​​​​​​​​​អធិការកិច្ច កាលពីឆ្នាំ​១៩៩៩ គឺគោលបំណងចូលរួម​លើកកម្ពស់ ​និង​ពង្រឹង​អភិបាលកិច្ច ដើម្បីធានាប្រសិទ្ធភាព សុច​រិត​​ភាព​​ មនសិការវិជ្ជាជីវៈ វិន័យការងារ និងភាព​ស្អាត​ស្អំ​របស់​រដ្ឋបាលសាធារណៈ ព្រម​ទាំង​រួមចំណែក​​ទប់ស្កា​ត់ ​ប្រយុទ្ធ​ប្រឆាំង កាត់​បន្ថយ និង​ឈាន​ទៅ​លុប​បំបាត់​អំពើ​ពុក​រលួយ។

ប៉ុន្តែ យោងតាមសាវតារលើវិស័យអធិការកិច្ច និងភាពចាំបាច់របស់រាជរដ្ឋាភិបាលអាណត្តិថ្មីនេះ ក្នុងការ​ប្រគល់​​តួនាទី-​ភារកិច្ចលើវិស័យទំ​នាក់ទំនងជាមួយរដ្ឋសភា-ព្រឹទ្ធសភា ឱ្យស្ថាប័ននានា ទើប​ប្តូរ​ឈ្មោះ​ក្រសួង​ជា​​ «ក្រសួងអធិការកិច្ច» នាពេលនេះ ដើម្បីឆ្លើយតបនឹងកម្មវិធី​នយោបាយ​របស់​រាជរដ្ឋាភិបាល ​អាណត្តិទី៧​​ និង​​យុទ្ធសាស្ត្របញ្ចកោណ-ដំណាក់កាលទី១។

ក្នុងពិធីសំណេះសំណាលដំបូងជាមួយថ្នាក់ដឹកនាំ និងមន្រ្តីរាជការនៃក្រសួងទំនាក់​ទំនង​ជាមួយរដ្ឋសភា-ព្រឹទ្ធសភា និង​​​​​​​​​​អធិការកិច្ច នាពេលថ្មីៗនេះ លោក ហួត ហាក់ ដែលជារដ្ឋមន្ត្រីថ្មីនៃក្រសួងនេះ បានលើកឡើងថា ភាពចាំបាច់នៃការប្ដូរឈ្មោះជា ក្រសួងអធិការកិច្ច គឺដើម្បីបន្តកែទម្រង់ស៊ីជម្រៅ ទូលំទូលាយ មានភាពស៊ីចង្វាក់គ្នា ដោយនឹងផ្តោតលើការលើកកម្ពស់អភិបាលកិច្ច និងសមត្ថភាពស្ថាប័ន។ បើតាមលោករដ្ឋមន្ត្រី ហួត ហាក់ តាមរយៈក្រសួងអធិការកិច្ចនេះ នឹងបង្កើតបរិយាកាសអំណោយផលសម្រាប់ការអភិវឌ្ឍសង្គម-សេដ្ឋកិច្ច ការអភិវឌ្ឍមូលធនមនុស្ស ការធ្វើពិពិធកម្មសេដ្ឋកិច្ច ការបង្កើនភាពប្រកួតប្រជែង ការអភិវឌ្ឍវិស័យឯកជន ដែលប្រកបដោយភាពធន់ ចីរភាព បរិយាប័ន្ន និងសង្គមឌីជីថល។

រដ្ឋមន្ត្រីថ្មីរូបនេះ ក៏បានលើកឡើងអំពីសារៈសំខាន់ៗនៃវិស័យអធិការកិច្ច ដែលលោក ចាត់ទុកថា «អធិការកិច្ច ជាភ្នែក ជាត្រចៀករបស់ថ្នាក់លើ និងជាមិត្តដ៏ជិតស្និទ្ធរបស់ថ្នាក់ក្រោម»។ ក្នុងន័យនេះ ក្នុងនាមជារដ្ឋមន្ត្រីនៃក្រសួងអធិការកិច្ច លោក ហួត ហាក់ បានណែនាំ និងក្រើនរំលឹកដល់ថ្នាក់ដឹកនាំ និងមន្ត្រីរាជការក្រោមឱវាទទាំងអស់ឱ្យពង្រឹងវិន័យផ្ទៃក្នុង របៀបរបបការងារ និងពង្រឹងសមត្ថភាពស្ថាប័ន ជាពិសេសបន្តយកចិត្តទុកដាក់ធ្វើយ៉ាងណាឱ្យមានសុខុមនីយកម្មនៅក្នុងអង្គភាព ទាំងកម្រិតថ្នាក់ដឹកនាំ និងកម្រិតបច្ចេកទេស៕

ដោយ៖ ធឿន វ៉ាន់សុង