ផ្លូវការ! វគ្គផ្តាច់ព្រ័ត្រ Finalissima រវាងអាហ្សង់​ទីន និងអេស្ប៉ាញ នឹងធ្វើនៅ ខែមីនា ២០២៦

ពានរង្វាន់ Finalissima ដែលជាពានរៀបចំឡើងសម្រាប់ការជួបគ្នារវាងក្រុមម្ចាស់ជើងឯកបាល់ទាត់ទ្វីបអឺរ៉ុប Euro ក្រុមជម្រើសជាតិ អេស្ប៉ាញ ទល់នឹងម្ចាស់ជើងឯកទ្វីប អាមេរិកខាងត្បូង Copa America អាហ្សង់ទីន បានប្រកាសអំពីពេលវេលាប្រកួតជាផ្លូវការ។

យោងតាមការចុះផ្សាយដោយអ្នកកាសែត អ៊ីតាលី លោក Fabrizio Romano បានឱ្យដឹងថា ការជួបគ្នាវគ្គផ្តាច់ព្រ័ត្រពាន Finalissima រវាង អេស្ប៉ាញ និង អាហ្សង់ទីន នឹងរៀបចំឡើងនៅចុងខែ មីនា ឆ្នាំ ២០២៦។ ជំនួបដ៏អស្ចារ្យនេះ នឹងក្លាយជាការប្រកួតដ៏ធំមួយប្រចាំប្រវត្តិសាស្ត្របាល់ទាត់ ដោយសារអ្នកគាំទ្រ នឹងបានឃើញការជួបគ្នារវាងកីឡាករជំនាន់ក្រោយ ដែលកំពុងឡើងជើងខ្លាំង Lamine Yamal លេងតទល់នឹងវីរបុរស Lionel Messi។

គួរឱ្យដឹងថា ពាន Finalissima បានរៀបចំឡើង ៣ លើករួចមកហើយ ប៉ុន្តែពាននេះត្រូវបានផ្អាក បន្ទាប់ពីរៀបចំបាន ២ លើកនៅឆ្នាំ ១៩៨៥ និង ១៩៩៣។ លុះនៅឆ្នាំ ២០២២ ទើបពាននេះចាប់ផ្តើមដំណើការឡើងវិញ ដោយ អាហ្សង់ទីន ជាអ្នកក្លាយជាជើងឯក បន្ទាប់ពីយកឈ្នះលើ អ៊ីតាលី ក្នុងលទ្ធផល ៣ ទល់នឹង ០៕

ប្រែសម្រួល៖ សេម កុសល
ប្រភព៖ Fabrizio Romano