មេ YG ​មាន​ទោស​ ពី​បទបិទបាំងគ្រឿងញៀនតារាចម្រៀង B.I និងគំរាមគំហែងសិក្ខាកាម

លោក Yang Hyun-suk ស្ថាបនិក និងជាផលិតកររបស់ផលិតកម្ម YG Entertainment ត្រូវបានគេរកឃើញថាមានពិរុទ្ធពីបទគំរាមកំហែង ដើម្បីបិទបាំងការចោទប្រកាន់គ្រឿងញៀនដែលពាក់ព័ន្ធនឹងអតីតសិល្បករ YG គឺតារាចម្រៀង B.I។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាលក្រមរបស់សាលាឧទ្ធរណ៍លើការផ្តន្ទាទោសដាក់ពន្ធនាគាររយៈពេលប្រាំមួយខែ ព្យួររយៈពេលមួយឆ្នាំ ត្រូវបានតម្កល់ដោយតុលាការកំពូលកាលពីថ្ងៃសុក្រ ពីបទរំលោភលើច្បាប់ស្តីពីការដាក់ទណ្ឌកម្មធ្ងន់ធ្ងរនៃឧក្រិដ្ឋកម្មជាក់លាក់ ដែលរួមមានការគំរាមកំហែងសងសឹក និងការប្រជុំបង្ខិតបង្ខំ។

នាយកប្រតិបត្តិរូបនេះ ត្រូវបានចោទប្រកាន់ដោយគ្មានការឃុំខ្លួនក្នុងខែឧសភា ឆ្នាំ២០២០ បន្ទាប់ពីចោទប្រកាន់ពីបទជ្រៀតជ្រែកក្នុងការស៊ើបអង្កេតរបស់ប៉ូលិសទាក់ទងនឹងការប្រើប្រាស់គ្រឿងញៀនខុសច្បាប់ដោយតារាចម្រៀង B.I ដែលពេលនោះជាសមាជិកក្រុមចម្រៀង iKON ។

នៅពេលដែលអតីតសិក្ខាកាមស្រីក្រោមទ្រនំ YG បានផ្តល់សក្ខីកម្មប្រឆាំងនឹង B.I ដល់ប៉ូលិសក្នុងខែសីហា ឆ្នាំ ២០១៦ ក្នុងអំឡុងពេលស៊ើបអង្កេតផ្ទាល់លើការចោទប្រកាន់ពីបទប្រើប្រាស់គ្រឿងញៀនខុសច្បាប់ លោក Yang ពេលនោះបានទូរស័ព្ទទៅការិយាល័យរបស់គាត់ ហើយបានបង្ខំនាងឲ្យដកសក្ខីកម្មរបស់នាងឡើងវិញ។

ក្រោយមក Yang បានសារភាពថា ពិតជាបានជួបជាមួយសិក្ខាកាម ប៉ុន្តែបានបដិសេធការគំរាមកំហែងនាង ឲ្យផ្តល់សក្ខីកម្មមិនពិត។ ក្រោយមក B.I ទីបំផុតត្រូវបានកាត់ទោសឲ្យជាប់ពន្ធនាគាររយៈពេល៣ឆ្នាំ។

ការកាត់ក្តីលើកដំបូងក្នុងឆ្នាំ ២០២២ បានរកឃើញថា លោក Yang មិនមានកំហុសទេ ដោយលើកឡើងពីភស្តុតាងមិនគ្រប់គ្រាន់ ដែលថាលោកបានគំរាមកំហែងសិក្ខាកាម។ ការកាត់ក្តីលើកទីពីរក្នុងខែវិច្ឆិកា ឆ្នាំ ២០២៣ បានតម្កល់សេចក្តីសម្រេចនេះ ប៉ុន្តែបាននាំមកនូវការចោទប្រកាន់បន្ថែមលើការប្រជុំបង្ខិតបង្ខំ ដែលតុលាការបានចាត់ទុកថាលោកពិតជាមានពិរុទ្ធភាព។ ក្រោយមក មេ YG ត្រូវ​បាន​កាត់ទោស​ឲ្យជាប់​ពន្ធនាគារ​រយៈពេល​ប្រាំមួយ​ខែ​ដោយ​ព្យួរ​រយៈពេល​មួយ​ឆ្នាំ។

តុលាការ​ឧទ្ធរណ៍​បាន​និយាយ​ថា​ «​ផលិតករ Yang មាន​ឋានៈ​សង្គម និង​អំណាច​ល្អ​ជាង​គេ​ក្នុង​ឧស្សាហកម្ម​កម្សាន្ត បើ​ប្រៀបធៀប​នឹង​ជនរងគ្រោះ​។ ការជួបជាមួយជនរងគ្រោះក៏ធ្វើឡើងក្រោមកាលៈទេសៈមានការរឹតត្បិត។ បើទោះបីជា Yang មិនបានអះអាងច្បាស់ពីឋានៈ ឬអំណាចរបស់គាត់ ដោយបានផ្ដល់ទីតាំង កាលៈទេសៈ និងបរិបទដែលកិច្ចប្រជុំនេះកើតឡើងក៏ដោយ វាអាចត្រូវបានគេមើលឃើញថាជាការបង្ខិតបង្ខំ»។

ទោះជាយ៉ាងណាក៏ដោយ លោកបានប្តឹងឧទ្ធរណ៍ចំពោះការចោទប្រកាន់នេះ ប៉ុន្តែការកាត់ទោសត្រូវបានតម្កល់ដោយតុលាការកំពូល។ លោកក៏បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា «ខ្ញុំមានការខកចិត្តចំពោះការសម្រេចចិត្តរបស់តុលាការកំពូល ប៉ុន្តែខ្ញុំទទួលយកសេចក្តីសម្រេចដោយរាបសារបំផុត។ ខ្ញុំនឹងអនុវត្តភារកិច្ចចម្បងរបស់ខ្ញុំដោយមានការប្រុងប្រយ័ត្ន និងការទទួលខុសត្រូវកាន់តែខ្លាំងទៅមុខ»៕

អត្ថបទ៖ សាង ស្រីល័ក្ខ

ចុចអាន៖ឃុំខ្លួនអត្តពលិកជម្រើសជាតិអ៊ីរ៉ង់៣រូប ក្រោយរំលោភបូកលើស្ត្រីជនជាតិកូរ៉េ