គណៈកម្មការបាល់ទាត់ ខេត្តស្វាយរៀង ប្រកាសរៀបចំការប្រកួតពានរង្វាន់បាល់ទាត់ U15

គណៈកម្មការប្រកួតពានរង្វាន់បាល់ទាត់ ខេត្តស្វាយរៀង ដែលទទួលបានការណែនាំ និងការចង្អុលបង្ហាញពីឯកឧត្តម ឌី វិជ្ជា អនុប្រធានសហភាពសហព័ន្ធយុវជនកម្ពុជា និងជាប្រធានសហភាពសហព័ន្ធយុវជនកម្ពុជា ខេត្តស្វាយរៀង នឹងរៀបចំព្រឹត្តិការណ៍ប្រកួតពានរង្វាន់ បាល់ទាត់យុវជនអាយុ ក្រោម១៥ឆ្នាំ លើកទី២ ឆ្នាំ២០២៥ ដែលនឹងប្រព្រឹត្តទៅដូចខាងក្រោម ៖

១. កាលបរិច្ឆេទ

ក. ពាក្យសុំចូលរួមការប្រកួត៖ ចាប់ផ្តើមលក់ពីថ្ងៃជូនដំណឹងនេះតទៅ
ខ. ការទទួលពាក្យសុំចូលរួមប្រកួត ៖ ចាប់ពីខែកក្កដា ឆ្នាំ២០២៥
គ. កាលបរិច្ឆេទប្រកួត៖ ចាប់ពីខែសីហា ឆ្នាំ២០២៤ តទៅ។

២. លក្ខខណ្ឌចូលរួម ៖

• កីឡាករត្រូវមានសញ្ជាតិខ្មែរ និងមានអាយុចាប់ពី ១៣ឆ្នាំដល់១៥ឆ្នាំ (ដែលមានឆ្នាំកំណើត២០១០, ២០១១, និង២០១២)
• ក្រុមកីឡាអាចមានកីឡាករច្រើនបំផុត ២០នាក់ តិចបំផុត ១៧នាក់ និងមន្ត្រីក្រុមចំនួន ០៥នាក់។ – កីឡាករត្រូវមានទីកន្លែងកំណើតក្នុងខេត្តស្វាយរៀង
• កីឡាករមានទីលំនៅបច្ចុប្បន្នក្នុងខេត្ដស្វាយរៀង ហើយបានចុះបញ្ជីក្នុងសៀវភៅស្នាក់នៅក្នុងខេត្តស្វាយរៀង មុនថ្ងៃប្រកួតចំនួន ០៦ខែឡើងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

៣. ប្រាក់រង្វាន់ ៖

• ក្រុមដែលជាប់ជាជើងឯកទទួលបានពាន ០១ មេដាយមាស ២៥គ្រឿង និងថវិកា ៨លានរៀល
• ក្រុមដែលជាប់ចំណាត់ថ្នាក់លេខ២ ទទួលបានមេដាយប្រាក់ ២៥គ្រឿង និងថវិកា ៤លានរៀល
• ក្រុមដែលជាប់ចំណាត់ថ្នាក់លេខ៣ ទទួលបានមេដាយសំរឹទ្ធ ២៥គ្រឿង និងថវិកា ២លានរៀល
• ក្រុមដែលជាប់ចំណាត់ថ្នាក់លេខ៤ ទទួលបានថវិកា ១លានរៀល។

៤. ទីលានប្រកួត ៖

ក. ទីលានកីឡដ្ឋានខេត្តស្វាយរៀង
ខ. ទីលានវិទ្យាល័យ ហ៊ុន សែន ស្វាយរំពារ
គ. ទីលានសាលាបឋមសិក្សា កន្ទុយវៃ។

គួរបញ្ជាក់ថា ការដាក់លក់ពាក្យសម្រាប់ក្រុមចង់ចូលរួមប្រកួត នឹងចាប់ផ្តើមចាប់ពីថ្ងៃផ្សាយដំណឹងនេះតទៅ៕

អត្ថបទ៖ សេម កុសល