៨ខែ ក្នុងឆ្នាំ២០២៣ ខេត្តកំពង់ចាម មានមនុស្សបីនាក់បានស្លាប់ដោយសារជម្ងឺគ្រុនឈាម 

រយៈពេល ៨ខែ ក្នុងឆ្នាំ២០២៣នេះ  ខេត្តកំពង់ចាម  មានមនុស្សដែលបាត់បង់អាយុជីវិតដោយសារជម្ងឺគ្រុនឈាម  ចំនួនបីនាក់មកហេីយ។ នេះយោងតាមការបញ្ជាក់ពី  លោកវេជ្ជបណ្ឌិត  គីមសួ  ភិរុណ  ប្រធានមន្ទីរសុខាភិបាល ខេត្តកំពង់ចាម  នាថ្ងៃទី ២២  ខែកញ្ញា  ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់របស់ លោក​ ប្រធានមន្ទីរសុខាភិបាលខេត្តកំពង់ចាម រយៈពេល ៨ខែចុងក្រោយនេះ  អ្នកមានជម្ងឺគ្រុនឈាមដែលមកសំរាកព្យាបាលនៅតាមមន្ទីរពេទ្យ  មានការកេីនឡេីងគួរឲ្យកំណត់សម្គាល់  ខណៈ ដល់មកបច្ចប្បន្នអ្នកជម្ងឺគ្រុនឈាមដែលបាត់បង់អាយុជីវិតក្នុងខេត្តកំពង់ចាមមានបីករណីហេីយ។ លោក វេជ្ជបណ្ឌិត  បានបន្តទៀតថា  តាមរយៈសកម្មភាពចុះផ្សព្វផ្សាយ  និងបាញ់ថ្នាំសម្លាប់សត្វមូសនៅតាមសាលារៀន  ទីផ្សារ  និងតាមភូមិដ្ឋានរបស់ប្រជាពលរដ្ឋ  គឺចង់ឲ្យប្រជាពលរដ្ឋចូលរួមទាំងអស់គ្នា ដេីម្បីបង្ការការពារជៀសឆ្ងាយពីការមានជម្ងឺគ្រុនឈាម  ពោលគឺត្រូវការពារកូនចៅក្មេងតូចៗ កុំឲ្យមូលខ្លាខាំ  និងត្រូវសម្អាតបរិស្ថានជុំវិញផ្ទះកុំឲ្យមានទឹកដក់  ដែលបង្កជាជំរកសត្វមូលខ្លាពងកូន។

ជាមួយគ្នានេះ លោកវេជ្ជបណ្ឌិត  គីមសួរ  ភិរុណ  ប្រធានមន្ទីរសុខាភិបាល ខេត្តកំពង់ចាម  បានបញ្ជាក់ឲ្យដឹងថា  ជម្ងឺគ្រុនឈាមភាគច្រេីនកេីតឡេីងកុមារតូចៗ ដែលមកបណ្តាលមកពីសត្វមូសខ្លាខាំ ។ បច្ចុប្បន្ន ក្រុមគ្រូពេទ្យ  និងអាជ្ញាធរមូលដ្ឋាន  កំពុងចុះផ្សព្វផ្សាយ  អប់រំណែនាំ  ពីការបង្ការទប់ស្កាត់ពីការឆ្លងរីករាលដាលជម្ងឺគ្រុនឈាម  ដោយបានណែនាំប្រជាពលរដ្ឋ  ត្រូវសម្អាតបរិស្ថានជុំវិញផ្ទះដែលអាចជាជម្រកសត្វមូសខ្លា ពងកូន  ដូចជាមានទឹកដក់ក្នុងសំបកកង់ សំបកកំប៉ុង  និងកន្លែងដែលអាចមានទឹកកត់បង្កេីតជាដង្កូវទឹកជាដេីម។

ជាចុងក្រោយ លោក គីម  សួភិរុណ  ប្រធានមន្ទីរសុខាភិបាល ខេត្តកំពង់ចាម  បានទទូច និងផ្សព្វផ្សាយដល់ប្រជាពលរដ្ឋទាំងអស់ ប្រសិនបេីត្រូវការថ្នាំអាល់ប៊េត ដាក់ក្នុងពាង  អាចមកស្នេីសុំពីមណ្ឌលសុខភាពដែលនៅក្បែរខ្លួន  ហេីយត្រូវតាមដានសុខភាពក្រុមគ្រួសារ បេីមានរោគសញ្ញាណាកេីតឡេីងគួរឲ្យកត់សម្គាល់ត្រូវមកពិគ្រោះយោបល់ ឬព្យាបាលជាមួយមន្ត្រីសុខាភិបាលជាបន្ទាន់ ដេីម្បីកុំឲ្យមានព្យាបាលខុសបច្ចេកទេសដែលអាចឈានដល់គ្រោះថ្នាក់អាយុជីវិតកុមារនិងទារកផង៕

 អត្ថបទ និងរូបភាពដោយ ៖ ឡេក  ចាន់ពេជ្រ