ចេញពីចិន សម្ដេចធិបតី ធ្វើដំណើរទៅអារ៉ាប៊ីសាអ៊ូឌីតបន្តទៀត

ក្រោយបញ្ចប់កម្មវិធីទស្សនកិច្ចក្នុងប្រទេសចិន នាថ្ងៃទី១៩ ខែតុលានេះ  សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបន្តដឹកនាំគណៈប្រតិភូកម្ពុជា ធ្វើដំណើរទៅកាន់ប្រទេសអារ៉ាប៊ីសាអ៊ូឌីត ដើម្បីចូលរួមកិច្ចប្រជុំកំពូលអាស៊ានក្រុមប្រឹក្សាសហប្រតិបត្តិការឈូងសមុទ្រ ដែលរៀបចំនៅទីក្រុងរីយ៉ាដ តបតាមការអញ្ជើញរបស់ព្រះមហាក្សត្រអារ៉ាប៊ីសាអ៊ូឌីត។

បើតាមសេចក្ដីប្រកាសព័ត៌មានរបស់ក្រសួងការបរទេសបានសរសេរថា “តបតាមការអញ្ជើញរបស់ព្រះចៅអធិរាជគ្រប់គ្រងថែរក្សាការពារព្រះវិហារឥស្លាមដ៏ស័ក្តិសិទ្ធទាំងពីរ ស្តេច សាលម៉ាន ពិន អាប់ឌុលអាហ្ស៊ីស អាល សាអ៊ូឌ (Salman bin Abdulaziz Al Saud) ព្រះមហាក្សត្រ នៃព្រះរាជាណាចក្រអារ៉ាប៊ីសាអូឌីត សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញចូលរួមកិច្ចប្រជុំកំពូលអាស៊ាន- ក្រុមប្រឹក្សាសហប្រតិបត្តិការឈូងសមុទ្រ (ASEAN-GCC Summit) ដែលនឹងប្រព្រឹត្តទៅនៅថ្ងៃទី ២០ ខែតុលា ឆ្នាំ២០២៣ នៅរាជធានីរីយ៉ាដ ព្រះរាជាណាចក្រអារ៉ាប៊ីសាអូឌីត”។

កិច្ចប្រជុំកំពូលនេះគឺជាវេទិកាសម្រាប់ថ្នាក់ដឹកនាំអាស៊ាន និងក្រុមប្រឹក្សាសហប្រតិបត្តិការ ឈូងសមុទ្រ ពិភាក្សារិះរកមធ្យោបាយនានា ដើម្បីបង្កើនកិច្ចសហប្រតិបត្តិការក្នុងវិស័យដែលផ្តល់ ផលប្រយោជន៍ទៅវិញទៅមក រួមមានវិស័យពាណិជ្ជកម្មនិងការវិនិយោគ ទីក្រុងឆ្លាត ថាមពល ការ ប្រយុទ្ធប្រឆាំងភេរវកម្ម និងទេសចរណ៍ ជាដើម។ កិច្ចប្រជុំកំពូលនេះគ្រោងនឹងកត់សម្គាល់នូវ ឯកសារលទ្ធផលចំនួនពីរ៖ (១) សេចក្តីថ្លែងការណ៍រួមសម្រាប់កិច្ចប្រជុំកំពូល និង (២) ឯកសារ ក្របខ័ណ្ឌនៃកិច្ចសហប្រតិបត្តិការអាស៊ាន-ក្រុមប្រឹក្សាសហប្រតិបត្តិការឈូងសមុទ្រ (សម្រាប់ឆ្នាំ ២០២៤-២០២៨)។

អំឡុងពេលនៃកិច្ចប្រជុំកំពូលនេះ សម្ដេចធិបតីនឹងមានជំនួបទ្វេភាគីជាមួយឥស្សរជនបរទេស មួយចំនួននៅទីក្រុងរីយ៉ាដ ដើម្បីជំរុញកិច្ចសហប្រតិបត្តិការទ្វេភាគីរវាងកម្ពុជា និងប្រទេសជាសមាជិក នៃក្រុមប្រឹក្សាសហប្រតិបត្តិការឈូងសមុទ្រ។

​អ្នកនាំពាក្យនាយករដ្ឋមន្ត្រីកម្ពុជា លោក មាស សុភ័ណ្ឌ បានគូសបញ្ជាក់ប្រាប់អ្នកសារព័ត៌មានកាលពីថ្ងៃទី១៦ ខែតុលាថា សម្ដេចមហារបវរធិបតី នឹងធ្វើមាតុភូមិនិវត្តន៍មកដល់កម្ពុជាវិញ នៅរាត្រីថ្ងៃទី២១ ខែតុលា វេលាម៉ោង ៩៖ ០០ នាទីយប់។​ ​

ជាក់ស្ដែង កាល​ពីព្រឹកថ្ងៃទី១៦ កន្លងទៅ តបតាមការអញ្ជើញរបស់​លោក ស៊ី ជីនពីង ប្រធានាធិបតីចិន សម្ដេចធិបតី និងលោកជំទាវ បណ្ឌិត ពេជ ចន្នមុនី ហ៊ុន ម៉ាណែត បានដឹកនាំគណៈប្រតិភូជាន់ខ្ពស់នៃកម្ពុជា ធ្វើដំណើរទៅកាន់ប្រទេសចិន ដើម្បីចូលរួមវេទិកាខ្សែក្រវ៉ាត់ និងផ្លូវលើកទី៣។

 ក្នុងដំណើរទៅកាន់ប្រទេសចិនជាលើកទី២ បន្ទាប់ពីឡើងកាន់តំណែងជានាយករដ្ឋមន្ត្រីនេះ សម្ដេចធិបតី បានជួបជាមួយ ប្រធានាធិបតីចិន នាយករដ្ឋមន្ត្រីចិន សមាជិកគណៈអចិន្ត្រៃយ៍នៃការិយាល័យនយោបាយគណកម្មការមជ្ឈិមបក្សកុម្មុយនីស្តចិន។    សម្ដេចធិបតី បានជួបជាមួយ ប្រធានរដ្ឋវៀតណាម ប្រធានរដ្ឋឡាវ។ សម្ដេចធិបតី ក៏អនុញ្ញាតក្រុមហ៊ុនធំៗចំនួន៨ ចូលជួបសម្ដែងការគួរសមផងដែរ៕

ដោយ៖  ង៉ិល ណារ៉ាត់