រដ្ឋមន្ត្រីក្រសួងយុត្តិធម៌ ដាស់តឿនមន្ត្រីក្រោម​ឱវាទត្រូវមានសាមគ្គីឯកភាពគ្នា ដើម្បីសម្រេចឲ្យបាននូវកំណែទម្រង់របស់រាជរដ្ឋាភិបាល

លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានដាស់តឿនមន្ត្រីក្រោម​ឱវាទក្រសួងយុត្តិ​ធម៌ទាំងអស់ ត្រូវមានសាមគ្គីឯកភាពគ្នា ដើម្បីសម្រេចឲ្យបាននូវកំណែទម្រង់ របស់រាជរដ្ឋាភិបាល។

ការដាស់តឿននេះ បានធ្វើឡើងនៅថ្ងៃទី ១៨ ខែតុលា ឆ្នាំ ២០២៣ ក្នុងពិធីប្រកាសចូលកាន់តំណែងលោក រស់ សារាំ ជាព្រះរាជអាជ្ញាខេត្តកំពង់ធំ។ ក្នុងឱកាសនោះ លោក កើត រិទ្ធ រដ្ឋមន្ត្រីក្រសួងយុត្តិធម៌ លើកឡើងថា ក្រសួងយុត្តិធម៌ បានកំណត់ទិសដៅកែទម្រង់ក្នុងវិស័យយុត្តិធម៌ ដែលជាអាទិភាពសម្រាប់រយៈពេល ៥ឆ្នាំខាងមុខនេះ។

លោកសង្កត់ធ្ងន់ថា ក្រសួងយុត្តិធម៌ បានកំណត់ទិសដៅកែទម្រង់ ក្នុងវិស័យយុត្តិធម៌ជាអាទិភាពសម្រាប់រយៈពេល ៥ឆ្នាំខាងមុខនេះ គឺជុំវិញសសរស្ដម្ភទី ២ ដែលហៅថា ជាសសរស្តម្ភកំណែទម្រង់សសរស្តម្ភទី ១ ក្នុងប្រព័ន្ធតុលាការ និងរៀបចំយន្តការថ្មីកែទម្រង់ យន្តការដោះស្រាយវិវាទដីធ្លីកម្ពុជា ដោះស្រាយ វិវាទក្រៅប្រព័ន្ធតុលាការ តាមរយៈការសម្រុះ​សម្រួលផ្សះផ្សាវិវាទ។

សសរស្ដម្ភទី ២ ជាអាទិភាព នៅក្នុងការអនុវត្តគោលនយោបាយកែទម្រង់ របស់រាជរដ្ឋាភិបាល នីតិកាលទី ៧ នៃរដ្ឋសភា ក្រោមការដឹកនាំដ៏ខ្ពង់ខ្ពស់របស់សម្ដេចធិបតី ហ៊ុន ម៉ាណែត ក្នុងការបង្កើតយន្តការដោះស្រាយវិវាទក្រៅប្រព័ន្ធតុលាការ ការជំរុញ និងការពន្លឿនសំណុំរឿងក្តី នៅតាមតុលាការ ដែលកកស្ទះ និងត្រួតពិនិត្យដោះស្រាយភាពមិនប្រក្រតី នៅតាមតុលាការ សំដៅជួយដោះស្រាយរកយុត្តិធម៌ជូនប្រជាពលរដ្ឋ និងលើកកម្ពស់តម្លាភាព សុច្ចរិតភាព និងភាពត្រឹមត្រូវក្នុងការអនុវត្តច្បាប់ ចំណាត់ការរឿងក្តីដោយតុលាការ។

លោកបន្តថា ការកាត់បន្ថយនូវអ្នកទោសក្នុងក្នុងពន្ធនាគារ មិនមែនជាភាពខ្សោយ ក្នុងការអនុវត្តច្បាប់របស់ស្ថាប័នអយ្យការអមសាលាដំបូងរាជធានី-ខេត្តនោះទេ តែជាភាពជោគជ័យមួយ របស់ស្ថាប័នអយ្សការ ជាពិសេសក្រសួងយុត្តិធម៌ក្នុងការអនុវត្ត ផែនការដែលបានដាក់ចេញក្នុងសសរស្តម្ភទី ១។

លោកឧបនាយករដ្ឋមន្ត្រី កើត រិទ្ធ ក៏បានដាស់តឿនមន្ត្រីទាំងអស់ ត្រូវមានសាមគ្គីឯកភាពគ្នា ដើម្បីសម្រេចឲ្យបាននូវកំណែទម្រង់ របស់រាជរដ្ឋាភិបាល ជាពិសេសចៅក្រម ព្រះរាជអាជ្ញា ក្រឡាបញ្ជី និងយកចិត្តទុកដាក់បន្ថែម ក្នុងការចាត់ការឲ្យបានម៉ឺងម៉ាត់ ប្រកបដោយតម្លាភាពនូវសំណុំរឿងនានា ជាពិសេសពាក់ព័ន្ធនឹងបទល្មើសគ្រឿងញៀនផងដែរ៕

អត្ថបទ៖ ឈាង មករា