គម្រោងស្តារអូរប្រឡាយធម្មជាតិការពារទឹកជំនន់នៅព្រះសីហនុសម្រេចជាង៩០ភាគរយ

គម្រោងអភិវឌ្ឍន៍ និងស្ដារអូរប្រឡាយធម្មជាតិ ដែលស្ថិតក្នុងខេត្តព្រះសីហនុ ប្រវែង ២៧គីឡូម៉ែត្រ សម្រេចបានជាង ៩០ ភាគរយ (៩៣,៤២%) ហើយ។

ជាគម្រោងដែលប្រើប្រាស់កញ្ចប់ថវិកាសន្សំរបស់ជាតិ ដើម្បីស្តារអូ និងប្រឡាយធម្មជាតិទាំងនេះ ដើម្បីបើកមុខទឹកបញ្ចៀសពីគ្រោះទឹកជំនន់។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំក្រុមការងារជំនាញបច្ចេក​ទេស ចុះពិនិត្យមើលវឌ្ឍនភាពនៃការស្តារអូរសំខាន់ៗនៅក្នុងក្រុងព្រះសីហនុ ដើម្បីពិនិត្យមើលវឌ្ឍនភាពការងារស្ដារអូរប្រឡាយប្រព័ន្ធចម្រោះទឹកកខ្វក់ និងស្ថានីយបូមទឹកមួយចំនួន។

គោលបំណងនៃការស្តារអូរធម្មជាតិសំខាន់ៗទាំងនេះ គឺដើម្បីការពារជំនន់ទឹកភ្លៀងនៅតាមតំបន់ងាយរងគ្រោះក្នុងទីក្រុង ក៏ដូចជារៀបចំកសាងប្រព័ន្ធប្រឡាយទឹកនៅទីក្រុងមួយនេះឱ្យមានបរិស្ថានស្អាត និងអនាម័យល្អដែលអាចទាក់ទាញភ្ញៀវទេសចរណ៍ជាតិ និងអន្តរជាតិបានកាន់តែច្រើនថែមទៀត៕

អត្ថបទ៖​ ឡេង ដេត