៣ខែមកនេះ រាជរដ្ឋាភិបាល បានដើរទាក់ទាញការវិនិយោគបរទេស និងលើកស្ទួយការវិនិយោគក្នុងស្រុក

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ក្នុងរយៈពេល ៣ខែ នៃរាជរដ្ឋាភិបាល អាណត្តិទី ៧នេះ គឺដើរទាក់ទាញការវិនិយោគបរទេស និងលើកស្ទួយការវិនិយោគក្នុងស្រុក។

ការលើកឡើងនេះ ធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវកំណាត់ផ្លូវជាតិលេខ ៥ (ព្រែក​ក្តាម-បាត់ដំបង) និងបើកការដ្ឋានកំណាត់ផ្លូវជាតិលេខ ៥ (សេរីសោភ័ណ-ប៉ោយប៉ែត) នៅស្រុកសាមគ្គីមានជ័យ ខេត្តកំពង់ឆ្នាំង នាព្រឹកថ្ងៃទី ២២ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត បានថ្លែងថា «ខ្ញុំសូមបញ្ជាក់ថា ៣ខែនេះ យើងដើរទាក់ទាញនៅក្នុងគម្រោងកម្ចីមានមួយផ្នែក ប៉ុន្តែក្រៅពីនោះយើងបានទាក់ទាញ ការវិនិយោគបរទេស ទាំងលើកស្ទួយនៅក្នុងការវិនិយោគក្នុងស្រុក ដើម្បីប្រើប្រាស់នៅក្នុងធនធានវិស័យឯកជន រដ្ឋាភិបាល មិនចាំបាច់ខ្ចីទេ ការវិនិយោគហេដ្ឋារចនាសម្ព័ន្ធជាច្រើន គឺប្រើប្រាស់ធនធានឯកជនតាមរយៈ BOT ផ្សេងៗ ខ្ញុំសម្ពោធព្រលានយន្ដហោះនៅខេត្តសៀមរាប អស់ជាង ១ពាន់លាន គឺថវិកា BOT»។

សម្ដេចធិបតី ហ៊ុន ម៉ាណែត មានប្រសាសន៍ថា ការទាក់ទាញវិនិយោគមកកម្ពុជា តាមរយៈក្រុមហ៊ុនវិនិយោគនានា គឺដើម្បីបង្កើនដង្ហើមសេដ្ឋកិច្ច៕