ធនាគារជាតិ និង UNDP នឹងរៀបចំសន្និសីទ​ម៉ាក្រូសេដ្ឋកិច្ច ថ្ងៃស្អែកនេះ

ធនាគារជាតិនៃកម្ពុជា បានសហការជាមួយកម្មវិធីអភិវឌ្ឍន៍សហប្រជាជាតិ (UNDP) នឹងរៀបចំសន្និសីទ​ម៉ាក្រូសេដ្ឋកិច្ច​ប្រចាំឆ្នាំលើកទី១០ ឆ្នាំ២០២៣ ស្តីពី “ហានិភ័យអាកាសធាតុ និងអន្តរកាលឆ្ពោះទៅកាន់សេដ្ឋកិច្ចបៃតង” ដែលនឹងប្រ​ព្រឹត្តិទៅនៅថ្ងៃទី៨ ខែធ្នូ ឆ្នាំ២០២៣ នៅសណ្ឋាគារ សូហ្វីតែល ភ្នំពេញ ភូគីត្រា និងផ្សាយផ្ទាល់​តាមគេហទំព័រហ្វេស​ប៊ុកផ្លូវការធនាគារជាតិនៃកម្ពុជា ចាប់ពីម៉ោង ៨:៣០ ព្រឹក រហូតដល់ម៉ោង ៤ រសៀល។ នេះបើតាមធនាគារជាតិ។

ប្រភពដដែលបញ្ជាក់ថា សន្និសីទនេះ នឹងមានវត្តមានចូលរួមជាអធិបតីពីលោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជា និងថ្នាក់ដឹកនាំពីបណ្តាក្រសួង-ស្ថាប័នរដ្ឋ ដៃគូអភិវឌ្ឍន៍ សមាគម សហគ្រាសឯកជន ព្រមទាំងភាគីពាក់ព័ន្ធជាតិ និងអន្តរជាតិផងដែរ។

លើសពីនេះទៀត អ្នកជំនាញស្រាវជ្រាវ ក៏នឹងធ្វើបទបង្ហាញអំពីលទ្ធផលស្រាវជ្រាវសំខាន់ៗ ហើយវាគ្មិនជំនាញ​នឹងពិភាក្សាចែករំលែកបទពិសោធន៍ទស្សនាទានគន្លឹះ ដើម្បីចូលរួមជំរុញដំណើរការ​អភិវឌ្ឍន៍សេដ្ឋកិច្ចប្រកប​ដោយចីរភាព៕